Zãmsg sẽn kõt vɩɩm
1 Ad sɩd noogda sũuri, d sã n ne nebã sẽn kɩdemd b sẽn bãng sɩd ning sẽn be Wẽnnaam Gomdã pʋgẽ wã yĩnga! D sã n zãmsd nebã tɩ b bãngd Wẽnnaam la a raabã sẽn tɩ loe ne ãdem-biisã, sɩd kõta sũ-noogo. Zãms-kãng tõe n kɩtame tɩ ned paam vɩɩm sẽn pa sate—Zã 17:3.
2 A sẽn yaa sõma n yɩɩdã võore: Rũndã-rũndã, b maanda b sẽn tõe fãa n zãmsd nebã yɛl buud toor-toore. (Koɛ. 12:12) La b pa tõe n mak zãms-kãens yõodã ne “Wẽnnaam tʋʋm-kãsemsã” bãngr yõod baa bilf ye. (Tʋʋ. 2:11) Rẽ yĩnga dũniyã lekoll dãmbẽ zãmsgã tõog n kɩtame tɩ ãdem-biisã pẽneg Naandã la b bãng a sẽn na n maan bũmb ning ka la bilfã sɩda? A sõnga nebã tɩ b bãng bũmb ning sẽn paamd ned a kũum poorã wall bũmb ning sẽn kɩt tɩ namsgã beẽ wã sɩda? Zãms-kãng kõo nebã saagr bɩ? A manega zagsã pʋs vɩɩmã n paas sɩda? Ayo. Yaa zãmsg ning d sẽn paamd Wẽnnaam Gomdã pʋgẽ wã bal n tõe n kɩt tɩ d paam sogsg nins sẽn tar yõod n yɩɩd vɩɩmã pʋgẽ wã leoore.
3 Zãmsg ning sẽn yit Wẽnnaam nengẽ wã maanda bũmb dũniyã lekoll dãmbẽ zãmsgã sẽn pa tol n tõe n maan ye: Wẽnnaam zãmsgã toeemda neb nins sẽn deegd-a wã tɩ b lebgd sõma n paasdẽ. Neb nins sẽn sakd Wẽnnaam Gomdã basda buud a taab neb kisgr la tẽn-nonglmã. (Heb. 4:12) A kɩtame tɩ neb bas nen-kɛglem buud fãa la b yeelg nedemd paalgã wa fuugu. (Kol. 3:9-11; Mii. 4:1-3) Sẽn paase, zãmsg ning sẽn yit Wẽnnaam nengẽ wã sõnga neb milyõ rãmb tɩ b tõog n bas minimd sẽn pa tat Wẽnnaam yam.—1 Kor. 6:9-11.
4 B sẽn segd n sak zãms-kãng ne yãgbã võore: Tõnd karen-saam-kãsengã wilgda tõnd d wakatã yɛl võore. Yɛl wʋsg sẽn tar loees ne a bʋ-kaoorã sẽn watã la b segd n moon tẽngã gill zug rũndã-rũndã. (Wil. 14:6, 7) Kirist rɩta naam saasẽ, la ka la bilfu, b na n sãama tũudum nins fãa sẽn be dũniyã zug n pa tik sɩdã. Sẽn paase, Wẽnnaam Rĩungã na n sãama goosneema rãmbã fãa sẽn be tẽngã zugã. (Dan. 2:44; Wil. 11:15; 17:16) Rẽ n so tɩ nebã segd n sak Rĩm ning Wẽnnaam sẽn yãk masã t’a rɩt naamã tao-tao, n zoe n yi Babilon kãsengã pʋgẽ, la b pʋʋs ne a Zeova yʋʋrã ne tẽebo. (Yɩɩl 2:11, 12; Rom 10:13; Wil. 18:4) Bɩ d fãa kẽes d mens wa d sẽn tõe tɛk n taas nebã zãmsg ning sẽn kõt vɩɩmã.