D zãms sik-m-mens rãmbã tɩ b kẽn Wẽnnaam sorã zugu
1. Karen-biisã maaneg baoodame tɩ d maan bõe?
1 Pipi kiris-neba wakatẽ wã, nebã ra boonda a Zezi karen-biisã tɩ sẽn tũud-b “Zusoaba sorã.” (Tʋʋ. 9:2, Kãab-paalgã Koe-noogo) Kiris-nedemd hakɩkã segd n pukda ned vɩɩmã nens fãa pʋsẽ. (Yel. 3:5, 6) Rẽnd d sã n wa zãmsd ned Biiblã, pa tẽebã zãms-yẽgã bal la d segd n wilg a soabã ye. D segdame me n sõng karen-biigã t’a kẽn a Zeova sorã zugu.—Yɩɩl 25:8, 9.
2. Bõe n tõe n sõng Biiblã karen-biig t’a tũ Wẽnnaam noyã?
2 A Zeova ne a Zezi nonglem: Ad sɩd yaa toog ne neb sẽn pa zems zãng tɩ b kɩt tɩ b tagsgã, b goamã la b manesmã fãa zems ne Wẽnnaam daabã! (Rom 7:21-23; Ef. 4:22-24) Baasg zãnga, sik-m-mens rãmbã sã n nong Wẽnnaam ne a Biriblã, rẽ na n sõng-b lame tɩ b tõog n maan bũmb ning sẽn wõnd yaa toogã. (Zã 14:15; 1 Zã 5:3) Wãn to la d tõe n sõng d Biiblã karen-biis tɩ b tall nonglem kãngã?
3. Wãn to la d tõe n sõng karen-biisã tɩ b wa nong a Zeova la a Zezi?
3 Sõng-y y karen-biigã t’a bãng a Zeova sẽn yaa Wẽnnaam ning buudu. Saam-biig a ye yeelame: “Ned pa tõe n nong a sẽn pa mi a soab ye. Rẽnd zãmsgã sɩngrẽ bala, mam wilgda karen-biigã Wẽnnaam yʋʋrã Biiblã pʋgẽ, la m baooda soay n gom n tadg a Zeova zʋg-sõmã wã zugu.” Wilg a Zezi makrã yaa manesem sẽn zems sẽn na yɩl n sõng y karen-biigã t’a bãng a Zeova sẽn yaa Wẽnnaam ning buudu. (Zã 1:14; 14:9) Sẽn paase, tũnug-y ne zĩ-gũbrã sẽn be Biiblã yetame sebrã sak fãa baasgẽ wã n sõng y karen-biigã t’a tags a Zeova la a Biriblã zʋg sẽn be yamleoog wʋsgã zugu.
4. a) Bõe yĩng tɩ karen-biis wʋsg getẽ tɩ koe-moonegã yaa toogo? b) Wãn to la d tõe n sõng d karen-biisã tɩ b sɩng koe-moonegã?
4 D zãms d karen-biisã ne tõnd meng makrã: Tõnd sẽn yaa karen-saam dãmb la sor-wilgdbã, yaa ne d tʋʋmã la d wilgd neb a taabã kẽn Wẽnnaam sorã zug sẽn dat n yɛɛlga. (1 Kor. 11:1) Wala makre, Biiblã karen-biis wʋsg ra pa minim n gomd tẽeb yɛl yell ne neb b sẽn pa mi ye. Rẽ wã yĩnga, d segd n talla maag-m-meng la yam, n tõog n sõng-b tɩ b tall nonglem, tẽebo, la raood sẽn na yɩl n kẽes b mens koe-moonegã la karen-biisã maaneg pʋgẽ. (2 Kor. 4:13; 1 Tes. 2:2) Tõnd sẽn sɩd rat n sõng d karen-biisã yĩnga, d na n zĩnda b sɛɛgẽ, b sã n wa na n sɩng koɛɛgã moonego.
5. Wãn to la mak sõng sõngd karen-biisã tɩ b bãng Wẽnnaam noyã tũub sẽn dat n yɛɛlga?
5 Yãmb makrã leb n tõe n zãmsa karen-biisã kiris-ned vɩɩmã nens a taab sẽn tar yõod wʋsgo. Yãmb sã n tʋgd n get bãad dãmbã, la y sã n deegd nebã sõma-sõma tigingã tigissẽ, b nee nonglmã sẽn pukd to-to tõnd sʋka. (Zã 15:12) Yãmb sã n naagd n pɩɩsd Rĩungã Roogo, bɩ y sã n maand yɛl kẽer n sõngd nebã, y wilgda y karen-biisã b sẽn tõe n tʋm neb a taabã nafr yĩng to-to. (Zã 13:12-15) B sã n neẽ tɩ yãmb kʋremsa y vɩɩmã t’a yaa faag-faaga, b bãngda “reng n bao Wẽnnaam soolmã” sẽn dat n yɛɛlga.—Mat. 6:33.
6. D sã n sõng neb a taabã tɩ b balemd a Zeova, bark-bʋg la d paamda?
6 Zãms nebã Wẽnnaam Gomdã la karen-biisã maaneg baooda modgr wʋsgo. La d sã n neẽ tɩ sik-m-mens rãmbã “kẽnda sɩdã pʋgẽ,” yaa bũmb sẽn sɩd kõt-d sũ-noog wʋsgo!—3 Zã 4.