D sõng neb a taabã me tɩ b lebg Wẽnnaam zo-rãmba
1 Rũndã-rũndã, b zãmsda buud toɛ-toɛyã fãa neb a Zeova noyã. (Ezai 2:2,3) La sẽn na yɩl tɩ nin-kãensã tõog “n womd biis ne sũ-mare,” rẽnda b lebg neb sẽn nong a Zeova. (Luk 8:15; Mark 12:30) B sã n pa nong Wẽnnaam, b pa na n paam pãng n tõog n da maan wẽng wa neb a taabã, bɩ n tõog meng n maan sẽn yaa tɩrg ye. Bũmb a ye sẽn na n sõng-b tɩ b paam n lebg a Zeova zo-rãmb hakɩk yaa b sẽn na n nong a zʋgã sẽn yaa sõma wʋsgã. Wilg-y-b tɩ b modg n maag b yĩns n karem Approchez-vous de Jéhovah sebrã sõma.
2 Ne yãmb meng manesmã: Yãmb mengã sẽn maand bũmb ninsã tõe n kɩtame tɩ Biiblã karen-biisã sũy teke. B sã n neẽ tɩ yãmb sɩd nonga zood ning y sẽn tar ne a Zeova wã, la tɩ y sẽn vɩ to-to wã zemsa ne Wẽnnaam daabã, tõe n kɩtame tɩ bãmb me modg n paam n lebg a Zeova zo-rãmba. (Luk 6:40) Sɩd me, tõnd tʋʋmã la nebã nong n get n yɩɩd d sẽn yet bũmb ninsã.
3 Naoor wʋsgo, nong n yaa ne b mens mak-sõngã la roagdbã zãmsd b kambã tɩ b nong a Zeova. (Tõo. 6:4-9) Rao a ye ne a pag n da baood ne b sũur fãa n na n wub b kamb tɩ b yɩ wẽn-sakdba. B kolga roagdb sẽn tõog n maan dẽ, n na n sogs n bãng b sẽn maan to-to. Ad raoã sẽn yeele: “M sẽn sok-b rãmbã fãa yeelame tɩ roagdbã mak-sõngã n yɩɩd bũmb a taaba fãa.” Woto wilgdame tɩ zĩig fãa la wakat fãa, roagdbã sẽn maand bũmb ninsã tõe n wilga kambã yɩ “Wẽnnaam zoa” sẽn dat n yɛɛlga.—Zak 2:23.
4 Pʋʋsg sẽn yit sũurẽ: Y sã n wilg-b me tɩ b kɩtdẽ tɩ b pʋʋsgã goam yit b sũurẽ wã, na n sõng-b lame tɩ b lebg a Zeova zo-rãmba. Y tõe n yeel-b lame tɩ b karem a Zezi sẽn kõ pʋʋsg makr ningã, la pʋʋsg a taab pĩnd wẽndẽ wẽn-sakdb sẽn pʋʋs ne b sũur fãa tɩ b gʋls tɩ be Biiblã pʋgẽ wã. (Mat. 6:9, 10) Yãmb mengã sẽn pʋʋsd to-to wã tõe n zãmsa y kambã la y Biibl karen-biisã b sẽn segd n pʋʋs to-to. Y sã n togsd goam sẽn yit y sũurẽ wã y pʋʋsgã sasa tɩ b kelgdẽ, b na n bãnga yãmb ne a Zeova zoodã sẽn ta zĩig ningã. Wilg-y-b tɩ yaa sõma wʋsg tɩ b sã n wa tar zu-loees bɩ b wɩng ne pʋʋsgo. (Rom 12:12) B sã n wa neẽ t’a Zeova sõngd-b-la b sã n wa rat sõngre, b na n sɩd tõog n teeg-a lame la b nong-a, t’a lebg b zoa.—Yɩɩl 34:9; Fil. 4:6, 7.