Y segla y mens sabaab yĩng bɩ?
1. Bõe yĩng tɩ yaa sõma tɩ d reng n segl d mens sabaab yĩnga?
1 Yʋʋmd fãa, tẽn-digimdsi, seb-bɛd la sa-bɛd namsda neb milyõ rãmba, n paas tõnd saam-biis la d saam-bɩ-pogs kẽere. Sẽn mik tɩ sabaab rãmbã tõe n paama d fãa la b leb n tõe n ling-d lame wã yĩnga, yaa sõma tɩ d reng n segl d mense.—Yel. 21:5.
2. Bõe yĩng tɩ d segd n kɩs kãsem dãmbã d adɛrs rãmb la d telefõn nimero rãmba?
2 D sẽn tõe n maan nand tɩ sabaab wa: Wakat kẽere, tẽngã taoor dãmb mii n tõog n keooga nebã tɩ sabaab rãmb n wate. Tara yõod tɩ d sak keoog-kãensã. (Yel. 22:3) Sã n wa yaa woto, kãsem dãmbã na n modgame n sõng tigingã nebã fãa tɩ b segl b mens sõma. Sabaab sã n wa maane, kãsem dãmbã na n le modgame n tɩ kaag tigingã nebã fãa, sẽn na yɩl n bãng b sã n bee laafɩ, la b ges b sẽn tõe n maan bũmb ning n sõng-ba. La kãsem dãmbã sã n pa tar nin-kãensã adɛrs rãmba, wall b sã n pa mi b sẽn be zĩig ning takɩ, tõe n kɩtame tɩ b gẽes n kaoos n yaool n bãng b sẽn beẽ. Woto yĩnga, tara yõod tɩ koe-moondbã kɩs sekertɛɛrã bɩ sebrã zãmsg yɛl-getã b adɛrs rãmb la b telefõn nimero rãmba.
3. Bõe la d tõe n naag kãsem dãmbã n maane, sã n mikame tɩ d vɩɩ sabaab zĩigẽ?
3 Tigingã sã n be zĩig ning sabaab sẽn mii n maandẽ, kãsem dãmbã tõe n kɩtame tɩ koe-moondbã kɩs b zoa bɩ b roagd sẽn pa vɩ zĩ-kãng yʋʋr la a telefõn nimero. Sabaab sasa, yaa nin-kãng la b na n boole. Woto na n sõnga kãsem dãmbã tɩ b bãng sabaabã sẽn kɩt tɩ kẽer zoe n tɩ be zĩig ningã. Kãsem dãmbã tõeeme me n deng n yãk bũmb ning tigingã neb sẽn na n maane, sabaab rãmb sasa. B tõe n gʋlsa sebr sẽn wilgd bũmb nins ned kam fãa sẽn segd n bĩng yambẽ, n wilg b sẽn tõe n maan to-to n yɩ sabaabã zĩigẽ, la b sẽn na n maan to-to n sõng neb nins sẽn dat sõngr n yɩɩd neb a taabã. Tara yõod tɩ d sak n naag taab n tʋm tʋʋm-kãensã.—Heb. 13:17.
4. Bõe la d segd n maane, sabaab sã n tiig n wa tõnd sẽn be zĩig ningã?
4 Sabaab loogr poore: Bõe la y segd n maane, sabaab sã n tiig n wa yãmb sẽn be zĩig ningã? Modg-y n ges-y y zakã rãmb yell tɩ b paam bũmb nins sẽn yaa tɩlae ne-bã. Rẽ poore, sã n mikame tɩ y tõeeme bɩ y ges neb a taabã me yelle. Baa tɩ y sã n be laafɩ n pa rat sõngre, segdame tɩ y yɩ tao-tao n kɩt tɩ sebrã zãmsg yɛl-get bɩ kãsem soab a to paam y kibare. Y sã n baood sõngre, bãng-y tɩ y saam-biisã maanda b sẽn tõe fãa n na n sõng yãmba. (1 Kor. 13:4, 7) Tẽeg-y t’a Zeova mii yãmb yellã, la y teeg-a t’a sõng-yã. (Yɩɩl. 37:39; 62:9) Y sẽn paam wakat ning fãa bɩ y modg n keng neb a taabã raood tẽebã wɛɛngẽ la vɩɩmã nens a taab wɛɛngẽ. (2 Kor. 1:3, 4) Leb-y n sɩng-y Wẽnnaam tʋʋmdã tao-tao.—Mat. 6:33.
5. Tõnd sẽn yaa kiris-nebã, sabaab wakate, tõnd manesem yaa wãn to?
5 Baa ne sabaab sẽn namsd nebã dũniyã gill zug tɩ b sũyã sãamdẽ wã, d tõe n talla bas-yard ne beoog raare. Ka la bilfu, sabaab fãa na n wa saame. (Wil. 21:4) La nananda, d tõe n segla d mense, sabaab la zu-loees a taab sẽn tõe n wa paam-d yĩnga, la d ket n moond neb a taabã koe-noogã ne yẽesem.