Tigingã neb fãa tõe n kẽesa b toog karen-biisã maanegẽ
1 Sẽn na yɩl tɩ ned lebg a Zezi karen-biiga, pa ned a yembr tʋʋmd ye. A Zeova tõe n tũnuga ne a “tʋmd-n-taasã” fãa n sõng tõnd sẽn zãmsd-b rãmb Biiblã tɩ b tẽebã bɩ. (1 Kor. 3:6-9) Tõnd ned kam fãa sã n kõt leoor tigissã sasa, la d talld manesem sẽn yaa sõma, sẽn wilgd vẽeneg tɩ Wẽnnaam vʋʋsem sõngã tʋmda d vɩɩmã pʋgẽ, d sõngda karen-bi-paalsã. (Zã 13:35; Gal. 5:22, 23; Ef. 4:22, 23) Bõe la d tõe n maan n paas n sõng karen-bi-paalsã?
2 Tigingã sẽn tõe n maan bũmb ninsi: D sã n pʋʋsd neb nins sẽn sɩng tigissã waoongã sõma la d sõsd ne-b tigissã sɩngrẽ la b saab poore, d wilgdame tɩ d nong-b lame. Rao a ye sẽn lebg n tẽeg a pipi raar a sẽn kẽng tiging pʋgẽ yeela woto: “Raar-n-yɛngã bala, mam yãa neb m sẽn zɩ n yã sẽn sɩd tar nonglem hakɩka. Mam zɩ n yã neb woto buud egiliiz ning mam sẽn sɩng n be a pʋgẽ hal m yãadmẽ wã ye. Yaa vẽeneg tɩ yaa sɩdã sor la mam sẽn bãng woto wã.” Kiis a yopoe loogr poore, a reega lisgu.
3 D segd n pẽga karen-biigã, a sẽn kẽngd taoor tẽebã pʋgẽ wã. Rẽ yĩnga neb n gɩdgd-a t’a ket n pa basdẽ bɩ? A wata tigissã wakat fãa bɩ? A modgdame n kõt leoor bɩ? A gʋlsa a yʋʋr Wẽnnaam tʋʋmdã lekollẽ bɩ, bɩ a sɩnga koɛɛgã moonego? Y sã n pẽgd-a a sẽn kẽngd taoorã yĩnga, na n kenga a raoodo.—Yel. 25:11.
4 Sẽn zãmsd-a karen-biigã: Koe-moondb kẽer kɩtdame tɩ tigingã neb a taab yãagd-b tɩ b tʋgd n zãmsd karen-biigã, sẽn na yɩl n sõng-a t’a bãng tigingã neb sõma. Ra bas-y tɩ kaoos la y yaool n bool karen-biigã t’a wat tigissã ye. A sã n sɩng tigissã waoongo, tall-y-yã n wilg saam-biis a taabã. Rẽ yĩnga a maoodame n dat n bas a sẽn da minim n maand bũmb tɩ yaa wẽnga, wala sɩgaar yũub bɩ? Ned n be a zakã pʋgẽ n gɩdgd-a t’a ra zãms Biiblã bɩ? A sã n sõs ne koe-moond sẽn mao ne zu-loees woto buud n tõoge, tõe n naf-a-la wʋsgo.—1 Pɩɛ. 5:9.
5 Tigingã neb segd n sõnga karen-bi-paalsã tẽebã wɛɛngẽ. D fãa sã n wilgdẽ tɩ d nong-b lame, tõe n sõng-b lame tɩ b kẽng taoore.