Ket-y n ‘womd biis wʋsgo’
1 A Zezi maka a meng ne viyn tɩɩgã, a Ba wã ne Koaada, la a karen-biis nins sẽn paam vʋʋsem sõngã zaeebã ne viyn tɩɩgã wil sẽn womd biisi. A Zezi bilga koaadã sẽn yaa a Zeova wã tʋʋmd sẽn yaa a soaba, n wilg tɩ tara yõod tɩ will fãa kell n pa tɩɩgẽ wã. (Zã 15:1-4) Yaa a Zezi Kirist la “viyn tɩɩg mengã.” Woto wilgdame tɩ ned ning fãa sẽn tar zems-n-taar ne a Zeova segd n yɩɩ wa viyn tɩɩgã will sẽn womd biisã. D segd n ket n womda vʋʋsem sõngã biis la Rĩungã biis wʋsgo.—Gal. 5:22, 23; Mat. 24:14; 28:19, 20.
2 Vʋʋsem sõngã biisi: Vʋʋsem sõngã biis sẽn pukd tõnd manesmã pʋgẽ to-to wã tõe n kɩtame tɩ b bãng d sã n bɩta tẽebã wɛɛngẽ. Rẽ yĩnga yãmb zãmsda Biiblã la y bʋgsd a zug sẽn na yɩl n tõog n wom vʋʋsem sõngã biis bɩ? (Fil. 1:9-11) Da bas-y vʋʋsem sõngã kosg ye, bala yaa vʋʋsem sõngã n tõe n kɩt tɩ y tall manesem sẽn waoogd a Zeova, la kɩt tɩ y kell n kẽng taoor tẽebã wɛɛngẽ.—Luk 11:13; Zã 13:35.
3 D sã n womd vʋʋsem sõngã biisi, na n sõng-d lame tɩ d moon koɛɛgã ne yẽesem n paase. Wala makre, nonglem la tẽeb kɩtdame tɩ d maand d sẽn tõe fãa n paamd sẽk n moond koɛɛgã wakat fãa. D sã n tar sũ-mare, sõmblem, sũ-bʋgsem la yõk-m-menga, na n sõng-d lame tɩ d talld manesem sẽn yaa sõma, nebã sã n wa kɩɩsd koɛɛgã. Sũ-noogã kɩtdame tɩ baa nebã sã n pa kelgd tõnd sõma, bɩ d ra koms raood ye.
4 Rĩungã biisi: D ratame me n wom Rĩungã biisi. Woto baoodame me tɩ d “kõ Wẽnnaam maand daar fãa sẽn yaa pẽgre, sẽn dat n togs tɩ d kɩs kaset ne noor goama [a Zeova] yʋʋra yĩnga.” (Heb. 13:15) D wilgdame tɩ d sɩd maanda woto, d sã n moond koɛɛgã ne yẽesem la raoodo. Rẽ yĩnga yãmb modgdame n moond koɛɛgã sõma n paasdẽ, sẽn na yɩl n wom Rĩungã biis wʋsg bɩ?
5 A Zezi ra wilgame t’a karen-biis nins sẽn kɩs sɩd ne Wẽndã na n woma biis toor-toor wʋsgo. (Mat. 13:23) Woto yĩnga, d pa segd n mak d mens ne neb a taabã ye. D segd n maana d sẽn tõe fãa a Zeova tʋʋmdã yĩnga. (Gal. 6:4) D sã n tũnug ne Wẽnnaam Gomdã n sɩd fees d mens sõma n ges d yɛlã neere, na n sõng-d lame tɩ d tõog n “wom biis wʋsgo,” sẽn na yɩl t’a Zeova yʋʋrã paam waoogre.—Zã 15:8.