D sõng naong rãmbã tɩ b paam saagre
1 Naong rãmbã yell ra paka a Zezi wʋsgo. Naoor wʋsgo, a maana yel-soalem n sõng neb tɩ b paam dɩɩb la laafɩ. La sẽn da pak-a n yɩɩd yaa a moon naong rãmbã “koe-noogã.” (Mat. 11:5) Rũndã-rũndã, koe-noogã mooneg ket n nafda naong rãmbã la neb a taabã.—Mat. 24:14; 28:19, 20.
2 Saagr hakɩka: Kiris-neb ne yʋʋr tũudmã taoor dãmb nong n yeta naong rãmbã tɩ b sã n kõt kũun wẽnd-doogẽ wã, b na n paama arzɛka. La Biiblã yetame tɩ yaa Wẽnnaam Rĩungã bal n tõe n kɩt tɩ talemdã sa, la a maneg ninsaalbã yɛl zãnga. (Yɩɩl 9:19; 145:16; Ezai 65:21-23) D sã n wilgd naong rãmbã Biiblã sẽn yet bũmb ninsã, d sõngd-b lame tɩ b bãng Wẽnnaam n tũ-a la b paam saagre.—Mat. 5:3.
3 A Zezi wakatẽ Fariziẽ rãmbã ra pa nand naong rãmbã ye. B ra paoogd-b lame n boond-b tɩ “am-haarɛt” bɩ “tẽng tom neba.” La nin-kãensã “zɩɩm” bɩ b vɩɩm ra yaa “bõn-kãseng” a Zezi nifẽ. (Yɩɩl 72:13, 14) Tõnd me tõe n dɩka a Zezi togs-n-taar n sõngd naong rãmbã la d wilgdẽ tɩ b yell pak-d lame. (Yel. 14:31) D pa segd abada n paoog neb nins sẽn vɩ zĩis nins sẽn yaa rẽgdã bɩ n bas n pa moon-b koɛɛgã ye. Neb wʋsg sẽn sakd Rĩungã koɛɛgã yaa naong rãmba.
4 Sõng-y-b masã menga: D sã n zãmsd Biiblã ne naong rãmb nins sẽn be d moonegã zĩigẽ wã, sõngd-b lame tɩ b naongã boogdẽ. Wala makre, Biiblã gɩdga rã-tɩgrã, reem-n-bao-ligdã, kʋɩɩngã, sɩgaarã yũub la yɛl a taab sẽn tõe n wa ne talemdã. (Yel. 6:10, 11; 23:21; 2 Kor. 7:1; Ef. 5:5) A leb n sagend-d lame tɩ d yɩ pʋ-peelem dãmb la d tʋm ne d “sũy fãa.” Yaa woto me la tʋʋmã taoor dãmb baood b tʋm-tʋmdbã nengẽ. (Kol. 3:22, 23; Heb. 13:18) Vaeesg a ye wilgame tɩ yaa tʋm-tʋmdbã pʋ-peelmã la b burkĩndã la tʋʋmã taoor dãmb get n yɩɩd n yaool n dɩk-b tʋʋma.
5 Naong rãmbã yell paka a Zeova. Ka la bilfu, a Zezi na n fãaga naong rãmbã sẽn yãbd n kot sõngrã. (Yɩɩl 72:12) La nananda, d tara zu-noog n na n sõng naong rãmbã la neb a taabã tɩ b bãng saagr ning Biiblã sẽn kõtã.