D bels neb nins sũy sẽn sãamã
1 Hal pĩnd n tãag masã, yaa rũndã-rũndã la nebã rat belsg n yɩɩda. D sẽn tũud a Zezi Kirist sẽn yaa d Rĩmã mak-sõngã yĩnga, tõnd me belsda “sũ-sãoong rãmbã.”—Ezai 61:1.
2 D sẽn na n bels nebã to-to: Sẽn na yɩl n bels nebã, d segd n gomda goam sẽn kengd raood koe-moonegã pʋgẽ. D sã n pa gomd nebã tʋʋm-wẽnsã la zãmsg nins sẽn pa tik Biiblã zugã yell wʋsgo, na n kɩtame tɩ d wilgd nebã sɩdã la d sõsd ne-b bũmb nins Wẽnnaam sẽn pʋlem tɩ kõt belsgã zug n yɩɩda. La woto pa rat n yeel tɩ d pa segd n gom Armagedõ yell ye. Tõnd tʋʋmd yaa d ‘moon a Zeova bark koɛɛgã, la d togs tõnd Wẽnnaam sũ-dokr daar koɛɛga,’ la d ‘sagl nin-wẽnsã tɩ b bas b manesem wẽnsã.’ D sẽn keoogd nebã la d wilgd-b Armagedõ sãangã sẽn na n yɩ to-to wã pa rat n yeel tɩ d gom rẽ yell n yɩɩg Wẽnnaam soolem koe-noogã sẽn yaa d moonegã gom-zugã ye.—Ezai 61:2; Eze. 3:18; Mat. 24:14.
3 D sã n wa moond zak-zaka: Bãasã, kũumã, wẽgbã la vɩɩmã zu-loeesã yĩnga, kɩtame tɩ d pa tõe n pa seg neb sũy sẽn sãam ye. La d sẽn tũud Kiristã mak-sõngã yĩnga, d kʋmda neb nins d sẽn yãt d koɛɛgã mooneg sasa wã nimbãanega. (Luk 7:13; Rom 12:15) Baa d sã n karem verse a ye bɩ a yiib sẽn gomd b zu-loɛɛgã yelle, d segdame n “wɩng ne kelgre,” la d bas t’a soabã tõog n togs sẽn be a sũurẽ. (Zak 1:19) D sã n deng n kelge, na n sõng-d lame tɩ d tõog n bels-ba.
4 D sã n wa ges tɩ zemsame, d tõe n yeela woto: “M nongẽ lame n wilg-y koɛɛg sẽn kengd raood Biiblã pʋgẽ.” A soabã tõe n wa togsda tõnd gomd sẽn pa sɩd zãnga, la d segd n gũusame n da wa baood n na n kɩɩs-a ye. D segd n tika Biiblã zug n keng a raood la d bels-a. Sẽn na yɩl n bels nebã, y tõe n gesa Comment raisonner à partir des Écritures sebrã neng 119-122 gom-zug ning sẽn yet tɩ “Encouragement” wã, wall y kõ a soabã De l’aide pour les déprimés seb-vãoogã, la y ges sagls nins sẽn be a pʋgẽ wã.
5 D bao soay n bels nebã: Y mii y tʋmd-n-taaga, y karen-bi-taaga, y zakã ned bɩ y yak sẽn dat belsg bɩ? Y tõe n modg n tɩ kaaga nin-kãensã n kell n tik Biiblã zug n bels-ba. Y sã n bãng bũmb ning sẽn kɩt tɩ b sũyã sãamã, y tõe n tika bõn-kãng n segl y mens n yaool n kẽng n tɩ bels-ba. Neb kẽer gʋlsda lɛta wall b wẽed bãng n belsd neb nins sũy sẽn sãamã. D sã n sɩd nong neb a taabã, na n kɩtame tɩ d kʋmd b nimbãaneg la d tikd Biiblã zug n belsd-ba.—Luk 10:25-37.
6 N-yẽe, Wẽnnaam tʋma tõnd tɩ d tɩ bels neb nins sũy sẽn sãamã, n keng b raood la d kõ-b saagr beoog daar yĩnga. Yaa belsg a woto la nebã fãa rata. D sã n gomd bõn-sõma nins Wẽnnaam sẽn pʋlem t’a na n maaname wã yell ne sũ-noogo, na n belsa pʋ-peelem dãmbã la sõng-b tɩ b paam saagre. Bɩ d tẽeg wakat fãa tɩ d segd n belsa sũ-sãoong rãmbã.