Tõnd fãa tõe n kõo a Zeova bũmbu
1 Yãmb miime tɩ ninsaalbã tõe n kõo Wẽnnaam bũmb bɩ? A Abɛll yãka a rũm-sõma wã kẽer n maan maoong n kõ a Zeova. A Nowe la a Zoob me kõo a Zeova kũuni. (Sɩng. 4:4; 8:20; Zoob 1:5) Sẽn yaa naandã n so bũmb fãa wã yĩnga, yaa vẽeneg tɩ kũun-kãensã pa paas a paoong ye. La nin-kãensã kũunã wilgame tɩ b nonga Wẽnnaam hal wʋsgo. Rũndã-rũndã, d tõe n dɩka d sẽkã, d pãngã la d arzɛkã n pẽg a Zeova.—Heb. 13:15.
2 D sẽkã: Neb nins sẽn basd tʋʋm nins sẽn pa tar yõod wʋsgã n moond koɛɛgã n paasdẽ wã toga ne pẽgre. (Ef. 5:15, 16) Yʋʋmd fãa, d tõeeme n maneg d sẽkã sẽn na yɩl n tõog n yɩ sõngr so-pakd kiuug a ye bɩ a yiibu. D leb n tõe n mooname n paam lɛɛr dãmb n paase. Semen fãa, d sã n moond minit 30 n paasdẽ, kiuug fãa d na n tõog n paama lɛɛr a yiib n paase.
3 D pãngã: D sã n dat n paam pãng n moon koɛɛgã, d segd n gũusa ne reem bɩ tʋʋm sẽn wat ne yaams wʋsg n kɩtdẽ tɩ d pa tõe n maan d sẽn tõe fãa n kõ a Zeova wã. Sẽn paase, d pa segd n maan yɩɩr wʋsg sẽn tõe n kɩt tɩ d “sũur sãam” tɩ d kong pãng ning d sẽn da tõe n dɩk n tʋm a Zeova tʋʋmdã ye. (Yel. 12:25) Baa d sã n tara bʋʋm n na n maan yɩɩre, sẽn são n yɩɩd yaa d sẽn na n ‘bas d yellã ne a Zeova’.—Yɩɩl 55:23; Fil. 4:6, 7.
4 D arzɛkã: D tõe n dɩka d arzɛkã me n teel koɛɛgã moonego. A Poll sagla a tẽed-n-taasã tɩ wakat fãa, bɩ b “ned kam fãa yãk ligd n bĩngi,” sẽn na yɩl n tõog n sõng sẽn pa tar-bã. (1 Kor. 16:1, 2) Tõnd me tõe n bĩngda ligd n wa rɩk n sõng d tigingã, la tʋʋmdã sẽn tʋmd dũniyã gill zugã. A Zeova nanda bũmb nins tõnd sẽn kõt-a ne d sũur fãa wã, baa yaa bilfu.—Luk 21:1-4.
5 A Zeova kõo tõnd bũmb wʋsgo. (Zak 1:17) D sã n dɩk d sẽkã, d pãngã, d arzɛkã la bũmb a taabã n tʋmd a tʋʋmdã, d wilgdame tɩ d nanda bũmb nins a sẽn kõ-dã. D sã n maand woto nooma a Zeova, bala a “nonga ned ninga sẽn kõt ne sũ-noogo.”—2 Kor. 9:7.