Tũ-y Kiristã mak-sõngã
1. Bõe n tõe n sõng tõnd tɩ d yɩ koe-moondb sẽn tar minim?
1 A Zezi pa paam zãmsg rabẽ rãmbã lekollẽ ye. La baa ne rẽ, a yɩɩ koe-moond sẽn pa tall to dũniyã gill zugu. D paamame tɩ b gʋls a koe-moonegã kibay n bĩng tõnd nafr yĩnga. Dẽnd sẽn na yɩl n tõog n moond koɛɛgã sõma, d segd n tũu a mak-sõngã.—1 Pɩɛ. 2:21.
2. Wa a Zezi, bõe n kɩt tɩ d rat n wilg nebã tɩ d nong-b lame?
2 D wilg nebã tɩ d nong-b lame: Yaa a Zezi sẽn da nong nebã n kɩt t’a moon-b koɛɛgã. (Mark 6:30-34) D moonegã zĩigẽ neb wʋsg bee ‘namsg’ pʋgẽ n dat ne b sũy fãa n bãng sɩdã. (Rom 8:22) D sã n tags n ges b sẽn namsd to-to wã la a Zeova sẽn nong-b to-to wã me, na n kɩtame tɩ d pẽdgd ne koɛɛgã moonego. (2 Pɩɛ. 3:9) Sẽn paase, nebã sã n bãng tɩ b yell sɩd pak-d lame, b na n sak n kelg-d lame.
3. A Zezi ra moonda nebã sasa bʋse?
3 D moon d sẽn paam wakat la zĩig ning fãa: A Zezi moona nebã koe-noogã a sẽn paam wakat ning la zĩig ning fãa. (Mat. 4:23; 9:9; Zã 4:7-10) Tõnd me segd n segla d mens tɩ sẽn yaa wakat la zĩig ning fãa bɩ d wilg nebã sɩdã. Neb kẽer zãada Biibl la sɛb a taab n kẽnd tʋʋma, lekolle, pa rẽ bɩ b sã n wa togd sor wall b rabd raag bɩ zĩis a taaba. Woto b sẽn paam sor fãa b tõe n moona koɛɛgã.
4. Wãn to la d tõe n wilg tɩ Wẽnnaam Rĩungã n yaa d moonegã gom-zugu?
4 D gomd Rĩungã yell n yɩɩda: A Zezi koe-moonegã pʋgẽ, Wẽnnaam Rĩungã yell la a ra gomd n yɩɩda. (Luk 4:43) Baa tɩ d pa na n gomd Wẽnnaam Rĩungã yell vẽeneg-vẽenega, d segd n ninga d yamẽ tɩ d rat n sõnga d kɛlgdbã tɩ b bãng tɩ yaa Wẽnnaam Rĩungã n na n wa fãag-do. Baa d sã n togsd nebã yel-beed nins sẽn wilgd tɩ d vɩɩ yaoolem wakatã, segd n yɩɩ vẽeneg tɩ yaa koe-noog la d moonda.—Rom 10:15.
5. Sẽn na yɩl n tõog n moon koɛɛgã sõma, wãn to la d segd n tʋm ne Biiblã?
5 D tik Biiblã zug n moon nebã: A Zezi tika Biiblã zug n moon koɛɛgã. A ka maan bũmb wall a zãms nebã yẽ mengã tagsg ye. (Zã 7:16, 18) A ra karemda Wẽnnaam Gomdã la a tũud bũmb nins a sẽn karemdã, tɩ sõngda t’a gind a Sʋɩtãan bẽdsã. (Mat. 4:1-4) Sẽn na yɩl n tõog n zãmsd nebã sõma, d me segd n karemda Biiblã daar fãa la d tũud a saglsã. (Rom 2:21) D sã n wa leokd ned sokr koe-moonegã pʋgẽ, d segd n wilga a soabã tɩ d sẽn yetã yita Biiblã pʋgẽ, tɩ sã n tõe bɩ d lak n karem n wilg-a. Yaa sẽn na yɩl t’a soabã bãng tɩ d sẽn yetã yita Wẽnnaam nengẽ la pa tõnd mens tagsg ye.
6. Bõe la a Zezi maan n tõog n zãms a kɛlgdbã tɩ kẽ b sũy sõma?
6 D modg tɩ d zãmsgã kẽ nebã sũyã: Maan-kʋʋdbã kãsem dãmb la Fariziẽ rãmbã sẽn sok gũudbã tɩ bõe yɩng tɩ b pa tõog n yõk a Zezi wã, b leok-b lame tɩ “ned nan ka gom wa ra-kãngã abada ye.” (Zã 7:46) A Zezi ra pa togsd neba kibay bal ye. A ra maagda a yĩng n zãmsd-b sẽn na yɩl tɩ kẽ-b sũy sõma. (Luk 24:32) A ra tikda yɛl nebã sẽn mi zut n dɩkd makr tɩ b wʋmd a sẽn yetã võor sõma. (Mat. 13:34) A Zezi ra pa zãmsd a kɛlgdbã bũmb wʋsg wakat yɛng ye. (Zã 16:12) A ra gomda a Zeova yell la kae pa yẽ menga yell ye. Wa a Zezi, tõnd me na n tõog n zãmsa nebã sõma d sã n ‘gũusd ne koɛɛg ning d sẽn zãmsd nebã.’—1 Tɩm. 4:16.
7. Bõe yĩng t’a Zezi pa bas koɛɛgã moonego?
7 D ra bas tɩ kɩɩsgã la yam-kaalgã koms d raood ye: Baa ne a Zezi sẽn maan yel-soalma, neb wʋsg pa kelg-a ye. (Luk 10:13) A zakã rãmb meng ra ‘tagsame t’a zʋbsdame.’ (Mark 3:21) La rẽ pa kɩt t’a Zezi bas ye. A kell n moona koɛɛgã, bala a ra mii vẽeneg tɩ yẽ tara sɩdã sẽn tõe n fãa nebã. (Zã 8:32) Ne a Zeova sõngre, tõnd me pa na n tol n bas koɛɛgã mooneg ye.—2 Kor. 4:1.
8, 9. Wa a Zezi, wãn to la d tõe n mong d mens n moon koe-noogã?
8 D mong d mens n moon koɛɛgã: A Zezi basa laogã la teed a taab baoob koɛɛgã mooneg yĩnga. (Mat. 8:20) A moona koɛɛgã n pa zoe yaams ye. Sasa ning menga, hal tɩ wĩndgã kẽ. (Mark 6:35, 36) A Zezi ra miime tɩ wakat ning a sẽn na n dɩk n tʋm tʋʋmd ning b sẽn bobl-a wã pa waoog ye. Sẽn mik tɩ ‘wakatã sẽn ketã lebga bilfã’ yĩngã, tõnd me segd n dɩka d sẽkã, d pãngã la d tarmã n moon koɛɛgã wa a Zezi.—1 Kor. 7:29-31.
9 Pipi kiris-nebã ra moonda koɛɛgã sõma, bala b tũu a Zezi sẽn zãms-b bũmb ningã. (Tʋʋ. 4:13) Tõnd me sã n dɩk a Zezi sẽn yɩ koe-moond sẽn ka to wã togs-n-taare, d na n tõog n moona koɛɛgã sõma.—2 Tɩm. 4:5.