Rɩk-y mam golã n pidi
1 D sẽn sak a Zezi boolã n dɩk a golã, d paama yolsg dũni kãngã sẽn pid ne zu-loees la sũ-sãamsã pʋgẽ. (Mat. 11:29, 30) Sak n dɩk a Zezi golã n pid n yɩ a karen-biig baoodame tɩ d tʋm tʋʋmd sẽn pa nana n yaool n kõt sũ-noogã. D segd n moona Rĩungã koe-noog la d sõng nebã tɩ bãmb me sak n dɩk Kiristã golã n paam sũ-noogo.—Mat. 24:14; 28:19, 20.
2 Koɛɛgã mooneg kõta sũ-noogo: A Zezi pa kos a karen-biisã tɩ b wa tʋk zɩɩb n paas b sẽn zoe n tar zɩɩb ningã ye. A yeel-b lame tɩ b bas b zɩɩbã la b wa rɩk yẽ golã sẽn pa zɩsã. Dẽnd d pa segd n bas tɩ d sũ-sãamsã la yɛl a taab dũni kãngã sẽn wat ne wã koms d raoodo, bɩ n namsd d mens n baood laogã sẽn yaa bũmb sẽn satã ye. (Luk 21:34; 1 Tɩm. 6:17) Baa ne d sẽn segd n tʋm n paam bũmb nins sẽn yaa tɩlae d vɩɩmã pʋgẽ wã, yaa Wẽnnaam daabã maaneg la d segd n lʋɩɩs taoore. (Mat. 6:33) D sã n lʋɩɩsd bũmb nins sẽn tar yõodã taoore, d na n mikame tɩ koɛɛgã mooneg kõta sũ-noogo, lakae a pa zɩɩb ye.—Fil. 1:10.
3 D nong n gomda bũmb nins d sẽn nongã yelle. (Luk 6:45) Yaa a Zeova la bũmb nins a sẽn kãab t’a na n tũnuga ne a Rĩungã n kɩt tɩ wa wã yell n pak kiris-nebã fãa n yɩɩda. Dẽnd koɛɛgã mooneg sasa, d sã n bas d yɩɩrã la d gomd bõn-sõma nins sẽn watã yelle, d sũur na n yɩɩ noog wʋsgo! (Rom 10:15) Sɩda, d sã n nong n tʋmd tʋʋm n paasdẽ, d paamda minim n paasdẽ tɩ kɩtdẽ tɩ d sũ-noogã paasdẽ. Dẽnd d sã n tõe n dɩkd sẽk wʋsg n moond koɛɛgã, na n kɩtame tɩ d paam sũ-noog n paase. Sɩd-sɩda nebã sã n sakd n kelgd koɛɛgã, kengda d raoodo! (Tʋʋ. 15:3) Baa nebã sã n pa kelgd-d bɩ b sã n kɩɩsd-do, d ning d yamẽ tɩ d sẽn modgdã tata a Zeova yam, la t’a sẽn ningd-d barkã yĩnga d modgrã na n woma biis la keng d tẽebã.—Tʋʋ. 5:41; 1 Kor. 3:9.
4 D sẽn sak a Zezi boolã, d lebga a Zeova Kaset rãmb wa yẽ, n naagd-a n tʋmd Wẽnnaam tʋʋmdã. (Ezai 43:10; Wil. 1:5) Bũmb a to pa tõe n kõ tõnd sũ-noog n ta woto ye!