Yãmb ne y zakã rãmb segendame n na n wa põs bɩ?
1 Biiblã bãngr-goam sẽn pidsdã yaa kaset sẽn wilgd vẽeneg tɩ dũni-wẽn-kãngã saab ta n saame. Tõnd vɩɩ wakat sẽn yaa toog sẽn wõnd a Nowe wakatã, nand tɩ sa-kãsengã ni wã. (Mat. 24:37-39) A Nowe põsa pĩnd wẽndẽ dũniyã sãoongo, bala a “ra tũuda Wẽnnaam.” (Sɩng. 6:9) A Nowe ra segd n zãmsda a zakã neb a Zeova noyã, bala bãmb me paam n põsame. Wãn to la tõnd ne d zakã rãmb tõe n dɩk a Nowe togs-n-taare, n segl d mens sẽn na yɩl n wa põs dũni-wẽn-kãngã sãoong sasa.
2 Tɩrlem koe-moonda: A Nowe sẽn da “yaa tɩrlem koe-moondã,” a kell n modg n moona koɛɛgã sẽn na ta yʋʋm 40 n digd yʋʋm 50. (2 Pɩɛ. 2:5) A yagsã ra yaand-a-la a koe-moonegã yĩnga. Tõe tɩ yaa malɛg-wẽnsã sẽn da sig tẽng zug n lebg wa ninsaalbã n kɩt tɩ b maand rẽ, bɩ yaa b yam daabo. D koe-moonegã sasa, d segda neb sẽn pa rat n kelg bɩ sẽn yaand tõndo, tɩ rẽ wilgd vẽeneg tɩ dũni kãngã saab ta n saame. (2 Pɩɛ. 3:3, 4) Bũmb sẽn kɩt tɩ tõnd wakatã yaa toor ne a Nowe wakatã, yaa neb wʋsg sẽn sakd n wat a Zeova tũudmã pʋgẽ wã. (Ezai 2:2) Yaa d sẽn na n kell n pẽdg ne koɛɛgã mooneg la d na n fãag d mens la sẽn kelgd-b tõndã. (1 Tɩm. 4:16) Dẽnd tara yõod wʋsg tɩ roagdbã tũnugd ne b mak-sõng la ne b no-goam n wilgd b kambã tɩ koe-moonegã yaa yãgb tʋʋmde.—2 Tɩm. 4:2.
3 A maana Wẽnnaam sẽn yeelã kɛpɩ: Yaa a Nowe ne a zakã rãmb sẽn sak n tũ a Zeova noyã fãa kɛpɩ wã yĩng n kɩt tɩ b põse. (Sɩng. 6:22) Rũndã-rũndã, d segd n saka Biiblã la tʋm-tʋmd sẽn tũud sɩd la sẽn tar yamã sor-wilgri. (Zak 3:17) Rao a ye wilga yẽ ba wã sẽn da tũud sagls nins a sẽn da paamd a Zeova siglgã pʋgẽ wã to-to. Semen fãa a ba wã ne zakã rãmb ra zãmsda Biiblã la b moond ne taab wa a Zeova siglgã sẽn sagend roagdbã to-to wã. Semen fãa, a ra kɩtdame t’a biig a ye yãag-a tɩ b moond koɛɛgã. A sẽn modg n tũ siglgã saglsã kɛpɩ wã sõnga a kambã hal wʋsgo. Bãmb b yoobã fãa wa n lebga a Zeova Kaset rãmb sẽn yaa kɩs-sɩd rãmba.
4 Dũni-kãngã saab na n yɩɩ lingri. (Luk 12:40) D sã n dɩk a Nowe togs-n-taare, la d tall tẽebo, tõnd ne d zakã rãmb na n tõog n segla d mens sõma.—Heb. 11:7.