Kell-y n pa-y Wẽnnaam nonglmã pʋgẽ
1. Bõe yĩng tɩ b yiis Kell-y n pa-y Wẽnnaam nonglmã pʋgẽ sebrã?
1 D sũy nooma wʋsgo, d sẽn na n zãms Kell-y n pa-y Wẽnnaam nonglmã pʋgẽ sebrã d Tigingã Biibl zãmsg sasa wã. D na n sɩnga seb-kãngã zãmsg sɩpaolg kiuugã rasem a 5 semennã. Sebrã pʋgẽ, Siglgã taoor lʋɩtb Sull gʋlsa lɛtr n tool neb nins fãa sẽn nong a Zeova wã. Lɛtrã baasgẽ, b yeela woto: “Wẽnd na kɩt tɩ seb-kangã sõng yãmb tɩ y tũ Biiblã sẽn yetã, la sõng-y tɩ y kell n pa ‘Wẽnnaam nonglmã pʋgẽ, yãmb sẽn gũud . . . vɩɩm sẽn pa sɛtã.’—Ziid 21.”
2. Seb-kãngã na n sõnga tõnd zĩ-bʋs wɛɛngẽ?
2 A sẽn na n sõng tõnd to-to: Bõe la Biiblã yet tũud-n-taarã, reemã, taoor-dãmbã sakre, kãadmã, rog-m-migsã, d minimdã la d no-goamã wɛɛngẽ? Noy nins Biiblã sẽn kõt tɩrlmã wɛɛngẽ wã tũub na n sõng-d lame tɩ d tall sũur-kaset sẽn yaa sõma. (Yɩɩl 19:8, 9) D sã n tõog n bãng sẽn tat a Zeova yam, d na n sakd-a-la bũmb fãa pʋgẽ, d sẽn dat n maan sẽn noom-a ne d sũy fãa wã yĩnga.—Yel. 27:11; 1 Zã 5:3.
3. Bõe yĩng tɩ d segd n modgd n kẽesd d mens zãmsgã pʋgẽ semen fãa?
3 D kẽesd d mens zãmsgã pʋgẽ: D sã n wa segend zãmsgã, bɩ d ning d yamẽ tɩ d rat n pẽga a Zeova a tigingã pʋgẽ. (Heb. 13:15) Tigingã neb fãa na n naagda taab n zãmsd seb-kãngã. Sẽn mik tɩ yaa sull a wãn bal la d na n zãmsd semen fãa wã yĩngã, d na n tõog n segenda sõma. Woto na n sõng-d lame tɩ d kõt leoor n da zoe rabeem ye. D sã n segend zãmsgã sõma la d leokd koɛɛg-koɛɛga, na n kenga d taabã raoodo, n kɩt tɩ d nong taab la d tʋmd tʋʋm-sõma. Rẽ me, zãmsgã na n talla yamleoogo, tɩ d fãa wʋm a võor n paase. (Heb. 10:24) Sẽn paase, tõnd ned kam fãa sã n kõt leoore, d sũ-noogã na n paasdame.
4. Bõe yĩng tɩ yaa tɩlae tɩ d tũud a Zeova noyã?
4 Yʋng ning b sẽn na n yõk a Zezi wã, a wilgame tɩ sẽn na yɩl n pa Wẽnnaam nonglmã pʋgẽ, yaa tɩlae tɩ d tũ a Zeova noyã. (Zã 15:10) “Wẽnnaam nonglmã” sebrã na n sõnga tõnd tɩ d modgd n tũud Biiblã sẽn yet bũmb ninsã sõma n yɩɩd raasenkamã, la d kell n ‘pa Wẽnnaam nonglmã pʋgẽ.’—Ziid 21.