D koɛɛgã mooneg wilgdame tɩ d nonga Wẽnnaam
1. A Zezi sẽn nong Wẽnnaamã kɩtame t’a maan bõe?
1 Yaa a Zezi sẽn nong Wẽnnaamã n kɩt t’a ra moond koɛɛgã. Bũmb nins fãa a sẽn maan koɛɛgã mooneg pʋgẽ wã wilgda vẽeneg t’a nonga a Zeova ne a sũur fãa. A yeela woto: “Mam maanda wa m Ba sẽn kõ maam tõogã, tɩ dũniyã neba bãng tɩ mam nonga m Ba.” (Zã 14:31) Tõnd me sẽn tũud a Zezi mak-sõngã, d tara zu-noog n na n moon koɛɛgã n wilg tɩ d nonga a Zeova.—Mat. 22:37; Ef. 5:1, 2.
2. D sẽn nong Wẽnnaamã kɩtdame tɩ d maand bõe?
2 Bɩ “yãmb yʋʋr yi ne waoogre”: D sẽn paam segb fãa, d sã n gomd a Zeova yʋʋrã yell la d moond Rĩungã ne yẽesem, d wilgdame tɩ d nonga Wẽnnaam. D sã n maand woto, d kɩtdame tɩ Wẽnnaam yʋʋrã paamd waoogre. (Yɩɩl 83:19; Eze. 36:23; Mat. 6:9) Wala a Zezi, tõnd me moonda koɛɛgã ne d sũy fãa, n dat tɩ Wẽnnaam yʋʋrã paam waoogre, la t’a raabã pidsi.—Mat. 26:39.
3. D sẽn nong Wẽnnaamã kɩtdame tɩ d tõogd n maand bõe?
3 D sã n nong Wẽnnaam kɩtdame tɩ d maood n tõogd zu-loeesã: D sã n nong Wẽnnaam kɩtdame tɩ d tõogd n maood ne zu-loees buud fãa. (1 Kor. 13:4, 7) A Zezi sega zu-loees toɛy-toɛy sẽn da tõe n kɩt t’a pa moon koɛɛgã ye. La a sẽn da nong a Zeova ne a sũur fãa wã la a rat n maan a raabã, kɩtame t’a tõog n mao ne zu-loees buud fãa. (Mark 3:21; 1 Pɩɛ. 2:18-23) Tõnd me segda zu-loeese, la d sẽn nong Wẽnnaamã sõngd-d lame tɩ d maood n tõogdẽ. D sã n tũud a Zezi mak-sõngã ne d sũy fãa, d na n talla raoodo, la d moon koɛɛgã d sẽn tõe fãa. Laafɩ kaalem, kʋʋlem, nebã sẽn pa kelgd koɛɛgã, bɩ d sã n segd zu-loees d zakã pʋgẽ d tẽebã yĩnga, tõe n namsd-d lame. La pa tõe n kɩt tɩ d bas koɛɛgã mooneg ne d pãng fãa n wilg tɩ d nong a Zeova ye.
4. D sẽn nong a Zeova wã kɩtame tɩ d tar zu-no-bʋgo?
4 Nonglem tara pãnga. D sẽn paam n tõe n moon koɛɛgã n wilg tɩ d nong a Zeova ne d sũy fãa wã yaa bark tɛkẽ! (1 Kor. 13:13) Daar ning a Zeova yʋʋrã sẽn na n paam waoogr zãng-zãngã sẽn tar kolgrã yĩnga, bɩ d fãa ‘nonglmã paasd daar fãa.’—Fil. 1:9; Mat. 22:36-38.