Y tõe n moona koɛɛgã wʋsg n paas bɩ?
1. Bõe n kɩt tɩ d segd n wɩng ne koɛɛgã moonego?
1 A Zezi sẽn bãng tɩ neb wʋsg rat n kelga koe-noogã, a yeela a karen-biisã tɩ b “kos tigisga soaba tɩ b tʋm tigisdba tɩ b kẽng bãmb tigisgã.” (Mat. 9:37, 38) Sẽn mik tɩ d bee tigisgã saab wakatã, yaa masã la d segd n wɩng ne tʋʋmdã n yɩɩda. Woto rat n yeelame tɩ d segd n pʋʋsa a Zeova sẽn na yɩl t’a sõng-d tɩ d bãng d sẽn tõe n maan to-to n moon koɛɛgã wʋsg n paase.—Zã 14:13, 14.
2. Bõe la neb wʋsg maan n tõog n na n moon koɛɛgã wʋsg n paase?
2 D sẽn tõe n moon koɛɛgã n paas to-to: Neb wʋsg tõog n lebga so-pakdb ne a Zeova sõngre. (Yɩɩl 26:2, 3; Fil. 4:6) Yʋʋmd fãa, kẽer modgd n yɩta sõngr so-pakdb kiuug a ye bɩ sẽn yɩɩd rẽ. Woto sõngd-b lame tɩ b sɩd moond koɛɛgã n paasdẽ. Sõngr so-pakrã sẽn kõt-b sũ-noog ningã kɩtame tɩ b baood n na n lebg wakat fãa so-pakdba.—Tʋʋ. 20:35.
3. Sã n mik tɩ yãmb da yɩɩ so-pakd pĩndã, bõe yell la y tõe n tags yɛsa?
3 Y tõe n le yɩɩ so-pakda: Y sã n da yɩɩ so-pakd pĩndã, yaa vẽeneg tɩ y ket n tẽra sũ-noog ning y sẽn da paamã yelle. Y sã n dat n le yɩ so-pakda, y tõe n kosa a Zeova sõngr y pʋʋsg pʋgẽ. Tõe tɩ bũmb nins sẽn da kɩt tɩ yãmb bas so-pakrã le pa gɩdgd-y ye. Y tõe n le yɩɩ so-pakd yɛsa.—1 Zã 5:14, 15.
4. Zu-no-bʋg la tõnd ned kam fãa tara?
4 D ket n moondã koɛɛgã, la ka la bilfu tʋʋm-kãngã na n saame. (Zã 4:35, 36) Bɩ d fãa ges d sẽn tõe n maan bũmb nins sẽn na yɩl n tõog n moon koɛɛgã wʋsg n paase. La sã n mikame tɩ d pa tõe n moon koɛɛgã n paase, d tõe n bao n paasa d koe-moonegã minim. (Mark 12:41-44) Rũndã-rũndã, d sẽn paam n tõe n moon koɛɛgã a Zeova sẽn bobl-dã sɩd yaa zu-noog tɛkẽ!—Yɩɩl 110:3.