Wãn to la y na n leok nebã?
1. Nebã sã n wa sokd-d sogsgo, bõe yĩng tɩ d segd n dɩk a Zezi togs-n-taare?
1 Hal n taag rũndã-rũndã, d sã n karemd a Zezi sẽn leok nebã sogsg sõma wã ket n tara yamleoogo. Nebã sã n wa sokd-d sogsg koe-moonegã sasa, d segd n dɩka a Zezi togs-n-taar n leok-ba.—1 Pɩɛ. 2:21.
2. Bõe n tõe n sõng-d tɩ d bãng n leok ned sõma?
2 D reng n kelg sõma: Ned sã n da sok a Zezi bũmbu, a rengd n bao n bãnga bũmb nins sẽn kɩt t’a soabã wa sokd-a woto wã. Sasa ninga, d segd n soka a soabã n bãng a sẽn dat n sɩd yeel bũmb ningã. Ned sẽn baood n na n bãng bũmb nins sẽn kɩt tɩ d pa maand Nowɛllã tõe n sok-d-la woto: “Yãmb tẽeda a Zezi bɩ?” D sã n sɩd bãng bũmb nins sẽn kɩt t’a sokd rẽ wã, d na n tõog n leok-a-la sõma.—Luk 10:25-37.
3. Bõe la d tar tɩ tõe n sõng-d tɩ d bãng n leok nebã sõma?
3 D tik Biiblã zug n leoke: D segd n tikda Biiblã zug n leokd nebã. (2 Tɩm. 3:16, 17; Heb. 4:12) Comment raisonner sebrã, la “ Sujets de conversation bibliques ” sẽn be Les Saintes Écritures —Traduction du monde nouveau wã pʋgẽ wã tõe n sõng-d lame tɩ d bãng n leok nebã sõma. Baa a soabã sã n pa tẽed Biiblã, ne yam, d tõe n sõsa ne-a Biiblã sẽn yet bũmb ninsã zugu. D sõng-a t’a bãng tɩ yam ning sẽn be Biiblã pʋgẽ wã ka to ye. D sã n dɩk a Zezi togs-n-taare, d sẽn na n leok nebã to-to wã na n yɩɩ “sõma wa sãnem tʋblondo,” rat n yeel tɩ d leokrã na n naf-b lame, n tall yamleoogo, la wilgdẽ tɩ d waoogd-b lame.—Yel. 25:11.
4. Sasa bʋs la d pa segd n baood n na n leok sokr buud fãa?
4 D segd n leoka sokr buud fãa bɩ? Ned sã n wa sok tõnd bũmb tɩ d pa mi a leoorã, bɩ d ra zoe yãnd ye. D yeel-a woto: “M pa mi a leoorã ye. La m na n tɩ maana vaeesg n lebg n wa leok-yã.” D sẽn sik d mens woto, la d wilg t’a soabã yell pak-d lame wã tõe n kɩtame t’a sak tɩ d lebg n wa sõs ne-a. Ned sã n wa sok-d bũmb tɩ d mi tɩ yaa sẽn na yɩl n wẽ no-koɛɛm ne tõndo, wala a Zezi sẽn da maand to-to wã, d leokrã segd n yɩɩ koɛɛga. (Luk 20:1-8) Ned sã n wẽed no-koeem ne tõnd tɩ mik t’a pa rat n bãng sɩdã, d segd n kʋʋga d sõsgã la d rɩk d sẽkã n bao neb nins sẽn sɩd rat n kelgã.—Mat. 7:6.
5. Nebã sogsg leokr wɛɛngẽ, mak-sõng bʋg la a Zezi kõ-yã?
5 A Zezi ra miime tɩ sẽn na yɩl n tõog n ‘kõ kasetã’ la a leok pʋ-peelem dãmbã sogsgo, yaa tɩlae t’a teeg a Zeova. (Zã 18:37) Ad d sẽn paam n tõe n dɩk a Zezi togs-n-taar n leok “neb nins fãa sẽn dat vɩɩm sẽn kõn sa wã” yaa zu-noog tɛkẽ!—Tʋʋ. 13:48, NW.