‘Koe-noogã na n mooname’!
1. Bõe n kɩt tɩ d tõe n yeel tɩ bũmb pa tõe n gɩdg tɩ koɛɛgã pa moone?
1 Baa fʋɩ pa tõe n gɩdg a Zeova t’a pa pids a raabã ye. (Ezai 14:24) Bʋ-kaood a Zedeõ ne a rap 300 wã sẽn wa n seg Madiã tab-biis 135 000 wã, ra wõnda b pa na n tõog-b ye. La a Zeova yeela a Zedeõ woto: “Kẽng n tɩ fãag Israɛll nebã Madiã nebã nugẽ. Yaa maam n tʋm-fo.” (Bʋk. 6:14) Rũndã-rũndã, tʋʋm-bʋg la a Zeova sõngd tõnd tɩ d tʋmdẽ? A Zezi yeela woto: “Koe-no-kãngã na n moona dũniyã tɛk fãa tɩ yɩ kaset buud fãa yĩnga.” (Mat. 24:14) Ned kae n tõe n gɩdg tɩ koɛɛgã pa moon ye!
2. Bõe yĩng tɩ d tõe n kɩs sɩd t’a Zeova na n sõnga tõnd ned kam fãa koɛɛgã mooneg pʋgẽ?
2 A Zeova sõngda tõnd ned kam fãa: D kɩsa sɩd t’a Zeova sõngda a nin-buiidã. La rẽ yĩnga a na n sõnga tõnd yembr-yembr sɩda? Tʋm-tʋmd a Poll sẽn da wa n be yell pʋgẽ, a yãame t’a Zeova tũnuga ne a Biig a Zezi n sõng-a. (2 Tɩm. 4:17) Tõnd me tõe n kɩsa sɩd t’a Zeova na n ninga tõnd ned kam fãa sẽn modgd n maand a raabã barka.—1 Zã 5:14.
3. Yel-bʋs pʋsẽ la a Zeova sõngd tõndo?
3 Daar fãa zu-loeesã mi n kɩtame tɩ y yɛ n pa tar raood n na n moon koɛɛgã bɩ? Biiblã yetame tɩ “ned sã n yɛ, [Wẽnnaam] kõt-a-la pãnga.” (Ezai 40:29-31) Nebã gɩdgda yãmb bɩ n namsd yãmb y tẽebã yĩng bɩ? “Bas f yell ne Zusoabã la bãmb na kogl foom.” (Yɩɩl 55:23) Wakat ninga y mi n tagsdame tɩ y pa tõe n moon bɩ? Wẽnnaam yeta woto: “Bɩ f kẽnge. La mam na n zĩnda ne fo noore.” (Yik. 4:11, 12) Yãmb laafɩ wã paoodame tɩ kɩt tɩ y pa tõe n moon wʋsg bɩ? A Zeova sũur yaa noog ne bũmb nins y sẽn maand ne y sũur fãa wã, baa yaa bilfu.—1 Kor. 3:6, 9.
4. D sã n teeg a Zeova bõe la d na n tõog n maane?
4 A Zeova ‘zẽka a nugu. Yaa ãnda n na n kɩt t’a sik-a?’ (Ezai 14:27) D sẽn kɩs sɩd t’a Zeova ningda d koe-moonegã barkã, bɩ d kell n teeg-a la d moon ne raoodo.—Tʋʋ. 14:3.