Mam maanda m sẽn tõe tɛk bɩ?
1. Zu-loe-bʋs la kiris-ned tõe n paame?
1 Yãmb zoe n soka y meng sok-kãngã bɩ? Tõe tɩ kʋʋlmã, bãasã, bɩ y zakã zɩɩb sẽn paasã yĩng kɩtame tɩ y pa tõe n moon wa pĩndã, tɩ rẽ sãamd y sũuri. Saam-bi-poak sẽn tar kamb a tãab yeelame t’a sũur-kasetã mi n ningd-a-la taale, bala a sẽn dɩkd a sẽkã la a pãngã n get a kambã yellã kɩtame t’a pa tõe n moon koɛɛgã wʋsg ye. Bõe n na n sõng tõnd tɩ d ges yɛlã wa a Zeova sẽn get-b to-to wã?
2. Bõe la a Zeova rat tɩ tõnd maane?
2 A Zeova sẽn dat tɩ d maane: Yaa vẽeneg tɩ tõnd fãa rat n moona koɛɛgã wʋsgo. La naoor wʋsgo, d sẽn dat n maanã ne d sẽn sɩd tõe n maanã pa yembr ye. D sẽn dat n maan n paasã wilgdame tɩ d miime tɩ d sẽn maandã pa sek ye. D segd n tẽegame t’a Zeova mii tõnd sẽn tõe n maan tɛka, la t’a pa baood tɩ d maan sẽn yɩɩd d pãng ye. (Yɩɩl 103:13, 14) Bõe la a rat tɩ d maane? A ratame tɩ d tũ-a ne d sũur fãa, la d tʋm a tʋʋmdã wa d sẽn tõe tɛka.—Kol. 3:23.
3. Wãn to la d tõe n bãng d sã n maanda d sẽn tõe tɛk koɛɛgã mooneg pʋgẽ?
3 Bõe n na n sõng tõnd tɩ d bãng d sẽn tõe n maane? D segd n kosa a Zeova t’a sõng tõnd tɩ d bãng d sã n maanda d sẽn tõe tɛka. (Yɩɩl 26:2) D tõe n kosa kiris-ned sẽn bɩ tẽebã pʋgẽ sẽn mi tõnd sõma, la sẽn na n sak n togs-d sɩda, t’a wilg-d zĩis nins d sẽn segd n demse, sã n beeme. (Yel. 27:9) D tẽeg me tɩ yɛlã sẽn toeemdã yĩnga, wakat-wakate, d segd n geta d yɛlã sẽn lebgd to-to wã.—Ef. 5:10.
4. Wãn to la d segd n ges saglsã b sẽn kõt-d koɛɛgã mooneg wɛɛngẽ wã?
4 D sẽn segd n ges saglsã to-to: Neb sã n zoet n wagsd taaba, neb nins sẽn yas n getẽ wã nong n kaasdame n daoond zoɛtbã. B sẽn maand woto wã yaa sẽn na yɩl n sõng-b tɩ b tõog n ta b sẽn datẽ wã, la pa sẽn na n koms b raood ye. B sẽn tik Biiblã zug n sagend tõnd me tigissẽ wã la sɛbã pʋsẽ tɩ d ‘nang pãng ne koɛɛgã moonegã’ yaa sẽn na yɩl n sõng tõndo, la pa sẽn na n wilg tɩ d sẽn maandã pa sek ye. (2 Tɩm. 4:2) D tõe n kɩsa sɩd tɩ d sã n maand d sẽn tõe tɛka, a Zeova pa na n yĩm d ‘tʋʋmdã ne d nonglmã’ abada. A na n ning-d-la barka.—Heb. 6:10.