“Ra zoe-y rabeem ye”
1. Wala a Zeremi, zu-loe-bʋg la tõnd me tõe n tarẽ?
1 A Zeova sẽn wa n yãk a Zeremi t’a yɩ a no-rɛɛsã, a Zeremi tẽeme tɩ yẽ pa na n tõog tʋʋmdã ye. La a Zeova yeel-a lame t’a ‘ra zoe rabeem,’ n keng a raood t’a tõog n tʋm a tʋʋmdã. (Zer. 1:6-10) Rũndã-rũndã, yãn-zoeer bɩ rabeem tõe n kɩtame tɩ tõnd me pa moon koɛɛgã sõma ye. Wakat ninga, d sã n yɛɛsd nebã sẽn na n tall manesem ning ne tõndo, tõe n kɩtame tɩ d pa moon koɛɛgã ye. Wãn to la d tõe n mao ne zu-loe-kãngã n tõoge, la nafa bʋs la d na n paame?
2. Wãn to la d tõe n segl d mense, tɩ sõng-d tɩ d ra zoe rabeem koe-moonegã sasa?
2 Reng-y n segl y meng sõma: D sã n deng n segl d sẽn na n yeel bũmb ningã, tõe n booga d rabeemã. Wala makre, d tõe n deng n tagsa nebã sẽn tõe n yeel tõnd bũmb ningã, la d bao n bãng d sẽn na n leok-b to-to. (Yel. 15:28) Y zakã zaabr Biibl zãmsgã sasa, y tõe n mamsa nebã sẽn tõe n yeel bũmb ning lekollẽ wã la koe-moonegã sasa, la y sẽn na n leok to-to, n tik rẽ zug n maan mak-n-wilgi.—1 Pɩɛ. 3:15.
3. D sã n teeg a Zeova, bõe yĩng tɩ rẽ na n sõng tõnd tɩ d rabeemã sa?
3 Teeg-y a Zeova: Rabeemã tɩɩm yaa f sẽn na n teeg Wẽnnaam. A Zeova yeelame t’a na n sõnga tõndo. (Ezai 41:10-13) Ad sɩd yaa sõngr tɛkẽ! Sẽn paase, a Zezi yeelame tɩ tõnd sã n wa be yel-lingdem taoore, Wẽnnaam vʋʋsem sõngã na n sõnga tõnd tɩ d kɩs kasetã sõma. (Mark 13:11) Woto yĩnga, bɩ d pʋʋs a Zeova daar fãa n kos a vʋʋsem sõngã.—Luk 11:13.
4. Tõnd sã n kell n moon koɛɛgã baa ne zu-loeesã, nafa bʋs la d na n paame?
4 Nafa nins d sẽn na n paame: Tõnd sã n kell n moon koɛɛgã baa ne zu-loeesã, d na n wa tõog n maoa ne zu-loees a taab beoog daare. D na n tõog n moonda ne raood la yẽesem, tɩ wilgdẽ tɩ Wẽnnaam vʋʋsem sõngã bee ne-do. (Tʋʋ. 4:31) Sẽn paase, a Zeova sã n sõngd tõnd tɩ d tõogd n maood ne rabeemã, d tẽebã pãng paasdame, la d na n kɩsa sɩd me n paas t’a na n fãag-d lame. (Ezai 33:2) D sẽn mi tɩ d sẽn maandã taa d saasẽ Ba wã yamã kõt-d-la sũ-noog me. (1 Pɩɛ. 4:13, 14) Woto yĩnga, bɩ d ra zoe rabeem ye. D moon Rĩungã koɛɛg ne raoodo, la d kɩs sɩd t’a Zeova na n sõng-d lame!