Pʋtã pelgame n ta tigsgu
1. Tʋʋm-bʋg sẽn tar yõod wʋsg la d tʋmda?
1 A Zezi sẽn wa n moon Samari pagã poore, a yeela a karen-biisã woto: “Bɩ y zẽk y nens n ges pʋtã, tɩ bõe, bãmb pelgame n ta tigsg masã.” (Zã 4:35, 36) Yaa neb nins sẽn na n sak n kelg Wẽnnaam koɛɛgã la b ra segd n tigsi. La a Zezi ra miime tɩ b na n wa maana woto dũniyã gill zugu. A Zezi sẽn be saasẽ masã wã, a kẽesda a toog tigsgã pʋgẽ. (Mat. 28:19, 20) Bõe n wilgd tɩ tʋʋm-kãngã sẽn kolgd a saabã yãngdame n paasdẽ?
2. Bõe n wilgd tɩ koɛɛgã mooneg paamda pãng dũniyã gill zugu?
2 Yaa dũni gill zug tʋʋmde: Yʋʋmd 2009 wã pʋgẽ, dũniyã gill zugu, koe-moondb 100 fãa zugu, neb a 3 n paase. Tẽns nins b sẽn da gɩdg koɛɛgã moonegã pʋsẽ, koe-moondb 100 fãa zugu, neb 14 n paase. Neb nins d sẽn zãms Biiblã kiuug fãa wã sõor yɩɩda 7 619 000. Rat n yeelame tɩ b sõorã yɩɩda yʋʋmd 2009 koe-moondbã fãa sõore, la yɩɩda neb nins b sẽn zãms Biiblã yʋʋmd 2008 wã ne sẽn kolg neb 500 000. Tʋʋmdã sẽn paamd pãng tẽns wʋsg pʋsẽ wã yĩnga, b kota misioneer dãmb sẽn maan Galaad lekollã. Tẽns kẽer pʋsẽ, sãambã moonegã womda biis wʋsgo. Woto wilgda vẽeneg t’a Zeova kɩtame tɩ tʋʋmdã paamd pãnga, saabã sẽn kolgdã yĩnga. (Ezai 60:22) Yãmb tara tagsg sẽn yaa sõma ne neb nins y sẽn moondã bɩ?
3. Kaset rãmb kẽer tõe n wa tagsda wãn-wãn b moonegã zĩigẽ neb zugu?
3 Yãmb moonegã zĩiga: Neb kẽer tõe n yeelame tɩ bãmb moonegã zĩigẽ nebã wʋsg pa kelgd ye. Yaa sɩd tɩ zĩis kẽere, tõe n wõnda wa pa womd biis wa pĩndã ye. Woto yĩnga, Kaset rãmb kẽer tõe n wa tagsdame tɩ neb nins sẽn na n sakã zoe n sakame, la tɩ keta yembr-yembr bala. Rẽ yĩnga woto yaa sɩd bɩ?
4. Tags-bʋg la d segd n tall koɛɛgã mooneg wɛɛngẽ, la bõe yĩnga?
4 Tigsgã wakate, sasa ka be d sẽn segd n maan laas-laas ye. Ges-y bũmb ning a Zezi sẽn yeel tɩ wilgd rẽ. A yeela woto: “Tigsgã yaa wʋsgo la tigisdbã yaa bilfu. Dẽ yĩnga, bɩ y kos tigsgã soab tɩ b tʋm tigisdb tɩ b kẽng bãmb tigsgã.” (Mat. 9:37, 38) A Zeova sẽn yaa tigsgã soabã, yẽ n mi zĩis nins sẽn na n wom biisã, la wakat ning b sẽn na n womã. (Zã 6:44; 1 Kor. 3:6-8) La tõnd tʋʋmd yaa bõe? Biiblã yeta woto: “Bʋd f bõn-buud yibeoogo, la ra bas f nus tɩ yɩ zaalem zaabr ye.” (Koɛ. 11:4-6) Koɛɛgã mooneg sẽn debd a saabã pa wakat d sẽn segd n bao n na n vʋʋs ye.
5. Bõe yĩng tɩ d segd n kell n moon ne yẽesem baa sã n wõnd pa womd biisi?
5 D ket n moondẽ: Baa d sã n moona d moonegã zĩig n yɩlem tɩ wõnd pa womd biisi, bʋʋm n be sẽn kɩt tɩ d segd n ket n moond ne yẽesem. (2 Tɩm. 4:2) Yɛlã sẽn maand dũniyã zugã tõe n kɩtame tɩ nebã tõeem yam, la kɩt tɩ b tagsd beoog daarã yell masã n yɩɩd pĩndã. Kambã sẽn bɩtã, b tõe n wa rat n bãnga yɛlã sẽn na n yɩ to-to beoog daare. D sã n ket n moondẽ, tõe n kɩtame tɩ neb nins sẽn da pa kelgd tõnd pĩndã sak n kelg masã. D segd n keooga neb nins sẽn pa nong koɛɛgã baa bilfã menga.—Eze. 2:4, 5; 3:19.
6. Baa tõnd moonegã zĩig sã n pa nana, bõe n na n sõng-d tɩ d kell n tall yẽesem?
6 Baa tõnd moonegã zĩig sã n pa nana, bõe n na n sõng-d tɩ d kell n tall yẽesem? Zak-zak moonegã toor sẽn ka be, d tõe n moonda koosmã zĩisẽ, soayã zutu, la zĩis a taaba. D tõe n toeemda d sẽn sõsd ne nebã to-to wã me. D tõe n toeema d sẽn moond sasa ningã, n moond zaabre, bɩ sasa ning d sẽn mi tɩ neb wʋsg bee yiri. D tõe n zãmsa buud-gomd a to sẽn na yɩl n moon neb wʋsgo. D tõeeme me n lebg wakat fãa so-pakda, wall d yik n kẽng zĩig koe-moondbã sẽn pa waoogẽ. D sã n sɩd tagsdẽ tɩ koɛɛgã mooneg yaa tʋʋmd sẽn tar yõod wʋsgo, d na n nanga pãng a pʋgẽ wa d sẽn tõe tɛka.
7. D segd n moona koɛɛgã n tãag wakat bʋgo?
7 Ka-koaad fãa miime tɩ kẽebg wakate a segd n maana tao-tao. Rẽ n so t’a nangd pãng hal tɩ tʋʋmdã wa sa. Koɛɛgã mooneg me yaa woto. La tõnd segd n moona koɛɛgã n tãag wakat bʋgo? D segd n mooname hal n tãag “dũniyã sɛɛbo.” (Mat. 24:14; 28:20) Wala a Zeova koe-moond kãseng a Zezi sẽn maanã, tõnd me segd n tʋma tʋʋmd ning a sẽn bobl-dã n baase. (Zã 4:34; 17:4) Bɩ d tall tagsg sẽn yaa sõma, n kell n moon koɛɛgã ne yẽesem la ne sũ-noog hal n tãag dũniyã sɛɛbo. (Mat. 24:13) Ad tʋʋm sɩd keta!
[Goam sẽn tar pãnga, seb-neng a 2]
Tigsgã wakate, sasa ka be d sẽn segd n maan laas-laas ye