‘ Rends pleinement témoignage au sujet du Royaume de Dieu ’

1. Tʋʋlg kiuugã rasem 14 semennã, seb-bʋg la d na n sɩng zãmsg tigingã Biibl zãmsg sasa?

¹ Yʋʋmd 2011 tʋʋlg kiuugã rasem 14 semennã, d na n sɩnga ‘ Rends pleinement témoignage au sujet du Royaume de Dieu ’ sebrã zãmsg tigingã pʋgẽ. Seb-kãng wɛgsda Tʋʋm sebrã pʋgẽ kibayã, hal tɩ f sã n karemd-a bɩ sɩd be yamleoog wʋsgo. Sebrã pa wɛgsd Tʋʋm sebrã pʋgẽ vɛrse fãa ye. A wilgda kibar fãa sẽn zãmsd tõnd bũmb ninga, la sõngd tõnd tɩ d bãng d sẽn tõe n tũ rẽ to-to.—Rom 15:4.

2. Wilg-y yɛl kẽer sẽn be Rends témoignage sebrã pʋgẽ.

² Sebrã pʋgẽ yɛl kẽere: Sebrã neng a 2 wã zĩigẽ, Siglgã taoor lʋɩtb Sull lɛtr n be beenẽ, sẽn wilgd b sẽn dat tɩ sebrã naf tõnd to-to. Sẽn sɩng ne sak a 2 wã, sak fãa tara sɩngr goam sẽn wilgd b sẽn dat tɩ d gãd bũmb ning takɩ wã, la Tʋʋm sebrã vɛrse nins b sẽn wɛgsdã. Sags wʋsg tara zĩ-gũb sẽn kõt vẽnegr yɛl kẽer zutu, wala nebã, zĩisã, la yɛl kẽer sẽn zĩndi. Seb-vãoog fãa kɩrenga, b basa vɩʋʋg tɩ d tõe n gʋls yɛl kẽere. Sebrã pʋgẽ, foto rãmb wʋsg n be sẽn sõngd-d tɩ d mams yɛlã sẽn yɩ to-to. Sebrã baasgẽ wã foto kɩds sẽn naag ne goam sẽn wilgd foto wã võor n be be. Yaa sebrã pʋgẽ foto kẽere. Sebrã sɩngrẽ la a baasgẽ me, kart n be n wilgd pipi kiris-nebã sẽn moon koɛɛg ning sẽn segd n ta “dũniyã tɛk fãa” wã n ta zĩis ninsã.—Tʋʋ. 1:8.

3. D sã n wa zãmsd Tʋʋm sebrã, sogs-bʋs sẽn tar yõod leoor la d na n yã?

³ Sogsg sẽn tar yõod leoore: D sã n vaees Tʋʋm sebrã, na n sõng-d lame tɩ d bãng sogsg kẽer sẽn tar yõod leoore. Wala makre, tʋʋm bʋgo, la koe-bʋg n kɩtd tɩ b bãng a Zezi Kirist karen-biis hakɩkã n bake? Ãnd n get dũniyã gill zug koɛɛgã mooneg yelle, la wãn-wãna? B sẽn namsd kiris-nebã kɩtdame tɩ b tõogd n maand bõe? Vʋʋsem sõngã tʋʋm yaa bõe koɛɛgã mooneg pʋgẽ?

4. Wãn to la d tõe n dɩ sebrã zãmsg nafa sõma?

⁴ Y sã n dat n dɩ sebrã zãmsg nafa sõma, y segd n deng n zãmsa sebrã sõma, la y modg n leokd tigingã Biibl zãmsg sasa. Ra vaal-y tigisgã baa daar a yembr ye. Zãmsg fãa poor bɩ y tags n ges y sẽn tõe n tũ bũmb nins y sẽn zãmsã koɛɛgã mooneg pʋgẽ to-to. Wẽnd na kɩt tɩ seb-kãngã zãmsg sõng-d tɩ d tõog n kɩs kasetã sõma Wẽnnaam Rĩungã wɛɛngẽ.—Tʋʋ. 28:23.