Koɛɛgã mooneg baooda sũ-mare
1. Wãn to la a Zeova maan sũ-mar ne ninsaalbã?
1 Wẽnnaam maanda sũ-mar ne ninsaalbã. (Yik. 34:6; Yɩɩl 106:41-45; 2 Pɩɛ. 3:9) Koɛɛgã a Zeova sẽn kɩt tɩ b moond dũniyã gill zugã naaga bũmb nins sẽn sɩd wilgd t’a maanda sũ-mar ne ninsaalbã. Yaa sẽn kolg yʋʋm 2000 la woto a Zeova sẽn kɩt tɩ b moond koɛɛgã. La a ket n tũnugda ne koɛɛgã mooneg n boond sũ-tɩrs rãmbã tɩ b wat a siglgã pʋgẽ. (Zã 6:44) Koɛɛgã mooneg pʋgẽ, wãn to la d tõe n dɩk a Zeova togs-n-taar sũ-marã wɛɛngẽ?
2. Wãn to la d tõe n maan sũ-mar ne d moonegã zĩigẽ nebã?
2 Zak-zak moonegã: Tõnd rɩkda a Zeova togs-n-taar sũ-marã wɛɛngẽ n moond koɛɛgã ‘n pa basdẽ,’ baa zĩis nins nebã sẽn pa rat n kelgã. (Tʋʋ. 5:42) Baa nebã sã n pa kelgdẽ, b sã n yaand tõndo, bɩ b sã n tolg n kis tõnd me, d ket n maanda sũ-mare. (Mark 13:12, 13) Ned sã n wilg t’a rat n bãng n paasame, baa d kẽnd n pa mikd-a, d maanda sũ-mare, n ket n kẽnd n yɩlemdẽ sẽn na yɩl n paam n sõng-a.
3. Bõe yĩng tɩ maag-m-mengã yaa tɩlae, nebã lebg n tɩ gesã la Biibl zãmsgã wɛɛngẽ?
3 Biiblã zãmsg ne nebã: Ned sã n sel tɩɩga, a pa tõe t’a lebg bedr zĩig pʋgẽ ye. Baooda maag-m-menga. A tõe n zãgsd-a-la koom, n ningd-a birga, la a pa tõe n kɩt t’a lebg bedr zĩig pʋgẽ ye. (Zak 5:7) Yaa bilf-bilf me la d segd n sõng ned t’a wa lebg Kirist karen-biiga. (Mark 4:28) Tõe n yɩɩ toog ne neb nins tõnd sẽn zãmsd Biiblã tɩ b bas yɛl kẽer b sẽn tẽede, bɩ rog-n-migs kẽere. D pa segd n pẽdg ned n dat t’a toeem zĩig pʋgẽ ye. D segd n maaga d menga, tɩ vʋʋsem sõngã sõng-a tɩ zãmsgã kẽ a sũurã bilf-bilf t’a toeeme.—1 Kor. 3:6, 7.
4. Wãn to la sũ-marã tõe n sõng tõnd tɩ d bãng n moon d zakã la d buudã neba?
4 D sẽn tõe n sõng d nebã to-to: Baa ne d sẽn dat ne d sũur fãa tɩ d zakã la d buudã neb wa lebg a Zeova Kaset rãmbã, d segd n maaga d meng n baood wakat sẽn zems n kõt-b kasetã la d gũusd n da gomd ne-b wakat fãa tɩ b yam wa yi ye. (Koɛ. 3:1, 7) Tõnd mak-sõngã meng tõe n kõo kaseto, tɩ d paam sor n gom n wilg d tẽebã. La d segd n gomda ne bʋgsem la waoogre. (1 Pɩɛ. 3:1, 15) D sã n sɩd maand sũ-mar koɛɛgã mooneg pʋgẽ, na n woma biisi, la d saasẽ Ba wã me sũur na n yɩɩ noogo.