Maan-y sũ-noog ne y tʋʋmdã
1. Bõe n tõe n wa boog d yẽesmã?
1 Wẽnnaam naana ninsaal t’a tõe n tʋme, la a ‘maan sũ-noog ne a tʋʋmde.’ (Koɛ. 2:24) Baasgo, d sã n moond koɛɛgã n pa ne d tʋʋmdã biisi, komsda d raoodo, tɩ rẽ tõe n boog d yẽesmã, tɩ d pa le tar sũ-noog ye. Bõe n na n sõng tõnd tɩ baa d pa ne d tʋʋmdã biis bɩ d ra koms raoodo?
2. Bõe yĩng tɩ d pa segd n mag tɩ nebã fãa na n saka koɛɛgã?
2 D ra mag tɩ nebã fãa na n sakame ye: Tẽeg-y tɩ yɩɩ neb bilf bal n sak a Zezi koɛɛgã, la pa rat n yeel t’a tʋʋmdã pa wom biis ye. (Zã 17:4) Yel-bũnd ning a Zezi sẽn wẽ n gom ka-fẽrgd yellã pʋgẽ, a pĩnd n togsame tɩ neb wʋsg sũy sẽn yaa to-to wã kɩtame tɩ b pa na n sak Rĩungã koɛɛgã a sẽn mak ne bõn-buudã ye. (Mat. 13:3-8, 18-22) La d tõe n kɩsa sɩd tɩ d sã n kell n modge, d tʋʋmdã na n woma biis wʋsgo.
3. Wãn to la d tʋʋmdã womd biisi, baa yaa neb bilf bal n kelgde?
3 D tʋʋmdã sẽn womd biis wʋsg to-to: A Zezi yel-bũndã wilgdame tɩ ned sã n sak n kelg koɛɛgã, “womda biisi.” (Mat. 13:23) Kaaf sã n yi n bɩ, a pa womd kẽnkẽ-bõones ye. A womda ki sẽn tõe n le yɩ ka-buudu. Woto me, pa tɩlae tɩ kiris-ned koe-moonegã biis yɩ karen-bi-paals ye. Tõe n yɩɩ a sẽn kɩtd tɩ koɛɛgã sẽn wõnd bõn-buudã yelgdẽ wã la a tʋʋmdã biisi. Woto kɩtame tɩ d tõe n paam sũ-noogo, nebã kelgd tɩ b pa kelgdẽ. Tõnd tʋʋmdã sõngdame t’a Zeova yʋʋrã paamd waoogre. (Ezai 43:10-12; Mat. 6:9) Tʋʋmdã kɩtame tɩ d paam n yaa Wẽnnaam tʋmd-n-taase. (1 Kor. 3:9) Koe-moonegã sasa, tõnd “noorã goamã” nooma a Zeova.—Heb. 13:15, 16.
4. Bi-bʋs la d koe-moonegã tõe n womd tɩ d pa miẽ?
4 Sẽn paase, d tʋʋmdã tõe n womda biis tɩ d pa miẽ ye. Tõe tɩ neb kẽer sẽn wʋm koɛɛgã a Zezi sẽn da moondã pa lebg a karen-biis t’a ket n be tẽngã zug ye. Tõnd me tõe n moona koɛɛgã tɩ ned wʋme, tɩ kaoosg zugẽ bɩ wom biis a sũurã pʋgẽ, hal t’a wa lebg a Zeova Kaset soab tɩ d pa bãng ye. Koɛɛgã mooneg sɩd sõngda tõnd la nebã wʋsgo. Woto yĩnga, bɩ d kell n modg ne d tʋʋmdã tɩ “wom biis wʋsgo,” tɩ wilg tɩ d sɩd yaa a Zezi karen-biisi.—Zã 15:8.