D rɩk no-rɛɛsdbã togs-n-taare: A Zoɛll
1. Koe-moonegã sasa, wãn to la d tõe n rɩk a Zoɛll togs-n-taar sik-m-mengã wɛɛngẽ?
1 No-rɛɛs a Zoɛll yɩɩ ãnda? A meng yeelame bal tɩ yẽ yaa “a Petuɛll biiga.” (Zoɛll 1:1) No-rɛɛs kãngã sẽn yɩ sik-m-meng soabã taasa nebã a Zeova koɛɛg bala, n pa bao n na n wilg yẽ sẽn yaa ned ning ye. Tõnd me rɩkda a togs-n-taar koe-moonegã sasa. D pa baood pẽgr wall yʋʋr ye. D ratame tɩ nebã waoog a Zeova la b nan Biiblã sẽn yaa Gomdã. (1 Kor. 9:16; 2 Kor. 3:5) Sẽn paase, koɛɛg ning tõnd sẽn moondã kengda d raoodo. A Zoɛll bãngr-gomdã zĩ-bʋs n tõe n sõng-d tɩ d tall yẽesem d tʋʋmdã pʋgẽ la kɩt tɩ d gũ d tẽebã pidsgu?
2. A Zeova daarã sẽn kolgã segd n kɩtame tɩ d maan bõe?
2 “A Zeova raarã kolgdame” (Zoɛll 1:15) Baa sẽn yaa na maan yʋʋm tusa la b togs gom-kãensã wã, rũndã-rũndã , b pidsgã wakat ta n saame. Dũniyã sẽn tar sãoong n dabdã, nebã sẽn pa nand koɛɛg ning tõnd sẽn moondã la b yaand-dã wilgda vẽeneg tɩ d bee dũni kãngã yaoolem dayã sasa. (2 Tɩm. 3:1-5; 2 Pɩɛ. 3:3, 4) Tõnd ned kam fãa sã n tagsd dũniyã saab sẽn kolgdã yelle, na n sõng-a lame t’a lʋɩɩs koe-moonegã taoore.—2 Pɩɛ. 3:11, 12.
3. To-kãsengã sẽn kolgdã, bõe yĩng tɩ koɛɛgã mooneg maneg n tar yõod n yɩɩda?
3 A Zeova na n yɩɩ “zĩ-soalgdg a nebã yĩnga” (Zoɛll 4:16): Rigimdg ning yell sẽn gomd vɛrse kãngã pʋgẽ wã na n paama pidsg to-kãsengã sasa, wakat ning a Zeova sẽn na n kao dũniyã bʋʋdã. La rabeem pa tar tõnd ye. Bala, d miime t’a Zeova na n fãaga a nin-buiidã sẽn tũud-a ne b sũy fãa wã. (Wil. 7:9, 14) Koe-moonegã sasa, d sã n ne a Zeova sẽn sõngd tõnd la a kengd d raood to-to wã, paasda d tẽebã pãng la kɩtdẽ tɩ d bɩɩsd tõog-toogo, n miẽ t’a na n sõng-d-la to-kãsengã sẽn watã sasa.
4. Bõe yĩng tɩ d tõe n kɩdem sũ-noog la d bas d yam ne bũmb ning sẽn watã?
4 Baa neb kẽer sẽn get a Zoɛll koɛɛgã wa koe-beedã, koe-kãngã kɩtdame tɩ Wẽnnaam nin-buiidã tõe n tẽ ne b sũy fãa tɩ b sɩd na n paama fãagre. (Zoɛll 3:5) Woto yĩng bɩ d bas d yam n moon Wẽnnaam Rĩungã koe-noogã ne yẽesem, n pa yĩmd goam nins sẽn be Zoɛll 2:23 ningd pʋgẽ wã. Be b yeta woto: ‘Kɩdm-y n maan sũ-noog Zu-soab a Wẽnnaam yĩnga.’