D rɩk no-rɛɛsdbã togs-n-taare: A Oze
1. Tõe tɩ y zoe n soka y meng sok-bʋgo?
1 Tõe tɩ y zoe n tagsa a Zeova nimbãan-zoeerã la bõn-neeb nins fãa a sẽn maan n kõ-yã yelle, n sok y meng woto: ‘Bõe la m na n maan n kõ a Zeova?’ (Yɩɩl 103:2-4; 116:12) No-rɛɛs a Oze sakame n maan bũmb a Zeova sẽn yeel-a, baa rẽ sẽn bao t’a sak n maan yɛl kẽer sẽn yaa toogã. Wãn to la d tõe n dɩk a togs-n-taare?
2. Mak-sõng bʋg la a Oze kõ tõnd koɛɛgã mooneg wɛɛngẽ?
2 D moon koɛɛgã baa toog wakate: Yaa Israyɛll buud piigã neb la a Oze koɛɛgã ra pak n yɩɩda. Nin-kãensã fãa la bal ra basa a Zeova tũubu. Rĩm a Zeroboam a yiib-n-soabã beega a Zeova, n kɩt tɩ nin-buiidã ra ket n pʋʋsd sãnem nag-bilã a Zeroboam pipi soab sẽn da maanã. (2 Rĩm 14:23, 24) Rĩm-dãmb nins sẽn pʋglã yɩɩ sabab tɩ Israyɛll buud piigã neb kell n kɩɩs Wẽnnaam n tãag b soolmã sãoongo, yʋʋmd 740 sẽn deng a Zezi rogmã. La baasgo, a Oze kell n tũ a Zeova, n yɩ a no-rɛɛs yʋʋm 59 pʋgẽ. Tõnd me na n sakame n moond koɛɛgã wakat fãa, baa nebã pa kelgd wall b namsd tõnd bɩ?—2 Tɩm. 4:2.
3. Wãn to la a Oze kibarã wilgd t’a Zeova yaa nimbãan-zoɛta?
3 D gomd a Zeova nimbãan-zoeerã yelle: A Zeova yeela a Oze t’a “bao pag sẽn yaa yoaad” n kẽ kãadem. (Oze 1:2) A pag a Gomeer roga bi-ribl n kõ-a. La bi-kãng rogem poore, tõe t’a Gomeer sẽn dog kamb a yiib ninsã yaa yoob kamba. A Oze sẽn sak n kõ a pagã sugr tɩ b kell n zĩnd ne taabã, wilga a Zeova sẽn maan Israyɛll nebã sẽn da yaa tõatbã nimbãan-zoeer to-to, b sẽn wa n tek yamã. (Oze 3:1; Rom 9:22-26) Rẽ yĩnga tõnd me na n sak n maana yɛl kẽer sẽn pa noom-do, n sõng nebã tɩ b rɩ a Zeova nimbãan-zoeerã yõod bɩ?—1 Kor. 9:19-23.
4. Bõe la a Zeova Kaset rãmb kẽer sak n maan tũudum hakɩkã yĩnga?
4 A Zeova Kaset rãmb kẽer sak n basa tʋʋm sẽn da kẽesd-b ligd wʋsgo, sẽn na yɩl n moon koɛɛgã n paase. Sãnda yãka yam n pa kẽ kãadem wall b pa rog kamba, n tõog n lʋɩɩs Wẽnnaam Rĩungã taoore. D sã n bʋgs a Oze kibarã zugu, tõe tɩ d tags tɩ d pa tol n tõe n maan bũmb ning a sẽn maanã ye. La d sã n bãngd a Zeova nimbãan-zoeerã n paasdẽ, n teegd a vʋʋsem sõngã, na n sõng-d lame tɩ d tõog n maan bũmb d sẽn da tagsd tɩ yɩɩda d pãnga, wa sẽn yɩ to-to ne a Oze wã.—Mat. 19:26; Fil. 2:13.