Mam yaa nin-bʋg buud a Zeova nifẽ?
1. Bõe yĩng tɩ d tõe n yeel tɩ Biiblã yaa wa nin-gɛtga?
1 Yãmb wae n geta y meng nin-gɛtgẽ bɩ? Tõnd fãa la bal geta d mens nin-gɛtgẽ, bala, sõngd-d lame tɩ d maneg zĩig ning fãa sẽn dat manegre. Wẽnnaam Gomdã yaa wa nin-gɛtga. A kareng sõngda tõnd tɩ d bãng d sẽn sɩd yaa ned ning d sũur pʋgẽ wã, rat n yeel t’a Zeova sẽn getã. (1 Sãm. 16:7; Zak 1:22-24) Wẽnnaam Gomdã “yaa sũur tagsg la ratem bʋ-kaooda.” (Heb. 4:12) Wãn to la Biiblã kareng la a goamã zug bʋgsg daar fãa tõe n sõng-d tɩ d maneg n yɩ koe-moondb sẽn tʋmd b tʋʋmd sõma?—Yɩɩl 1:1-3.
2. Wãn-wãn la Biiblã tõe n sõng-d tɩ d fees d menga?
2 Kɩt-y tɩ Biiblã yɩ wa y nin-gɛtga: Biiblã kibay nins sẽn wilgd neb sẽn tũ a Zeova ne b sũur fãa wã sõngd-d lame tɩ d bãng a Zeova sẽn nonge. Wala makre, a Davɩɩd ra waoogda Wẽnnaam yʋʋrã ne a sũur fãa. (1 Sãm. 17:45, 46) A Ezai talla raoodo, n moon neb sẽn pa nana koɛɛgã. (Ezai 6:8, 9) A Zezi sẽn da nong a saasẽ Ba wã wʋsgã kɩtame t’a ra pa get koe-moonegã wa zɩɩb ye. Tʋʋm-kãngã ra kõt-a-la sũ-noogo. (Zã 4:34) Pipi kiris-nebã me moona koɛɛgã ne yẽesem, n teeg a Zeova, hal n da pa rat n bas moonegã ye. (Tʋʋ. 5:41, 42; 2 Kor. 4:1; 2 Tɩm. 4:17) D sã n bʋgsd mak-sõma kãensã fãa zugu, d na n tʋlg n tũu Wẽnnaam sõma n paase.
3. Bõe yĩng tɩ d segd n yɩt tao-tao n toeemdẽ?
3 Bũmb sã n dat toeeng bɩ y toeeme: Ned sã n ges a meng nin-gɛtgẽ n yã bũmb sẽn dat manegr n pa manege, pa zems ye. D tõe n kosa a Zeova t’a sõng-d tɩ d fees d mengã neere, la a sõng-d tɩ d toeeme. (Yɩɩl 139:23, 24; Luk 11:13) Wakatã sẽn ketã lebg bilfu. Sẽn paase, neb n dat fãagre. Woto yĩnga, d yɩt tao-tao n toeemd bũmb ning fãa sẽn segd ne toeengo.—1 Kor. 7:29; 1 Tɩm. 4:16.
4. Nafa bʋs la ned sẽn karemd Biiblã, n tũud a sẽn karemdã paamda?
4 Yaa ned sẽn sɩd yaa a soab a sũur pʋgẽ wã la a Zeova geta, pa a soabã sẽn yaa to-to nif gesg pʋgẽ wã n tar yõod ye. (1 Pɩɛ. 3:3, 4) Ned sẽn karemd Wẽnnaam Gomdã n sakd n toeemd bũmb ning fãa sẽn dat toeeng paamda nafa bʋse? Biiblã yetame tɩ “ned ning sẽn kelgda n ka yĩmdẽ, la sẽn sakda, bark na n zĩnda yẽ zugu, a sẽn maand woto wã yĩnga.” (Zak 1:25) D na n sɩd paama sũ-noog la d yɩ koe-moondb sẽn tar minim, d ‘nens sẽn pilg tɩ nebã ne Zu-soabã ziirã’ wa nin-gɛtg pʋgẽ wã yĩnga.—2 Kor. 3:18, Kãab-paalgã Koe-noogo.