D rɩk no-rɛɛsdbã togs-n-taare: A Nahũm
1. Yam bʋg la d tõe n dɩk a Nahũm sebrã pʋgẽ?
1 Pĩnd wẽndẽ Niniiv tẽngã raboog wilgda vẽeneg t’a Zeova roka a sũur ne Niniiv nebã sẽn da yaa a bɛɛbã, wa no-rɛɛs a Nahũm sẽn pĩnd n wilgã bal kɛpɩ. Leb n wilgdame t’a Zeova bɛ baa a ye, baa a wẽnem sẽn zem to-to, pa tõe n dɩk a zug n wẽ ne-a ye. (Nah. 1:2, 6) D sã n maag d yĩng n vaees a Nahũm bãngr-gomdã, d paamda sagls sẽn na n sõng-d koe-moonegã pʋgẽ.
2. Bõe la tõnd maand tɩ d koɛɛgã kengd raoodo?
2 D taas nebã koɛɛg sẽn belsde, la kõt saagre: F sã n sɩng a Nahũm sebrã karengo, wõnda a pa tar koɛɛg a to n zʋʋg toog ning sẽn da na n paam Niniiv sẽn da yaa Asiiri na-tẽngã neb sẽn yaa tɩtaam dãmbã ye. (Nah. 1:1; 3:7) La baasgo, a koɛɛgã belsa a Zeova nin-buiidã. A Nahũm yʋʋrã võor meng yaa “Bɛlsa,” la a sɩd belsa a zʋɩf-taasã n kɩt tɩ b bas b yam tɩ ka la bilfu, b bɛɛbã na n menema zãnga! A Nahũm pʋd n tẽeg-b lame t’a Zeova yaa a “nebã pãng toog wakate.” (Nah. 1:7) Tõnd me sã n moond koɛɛgã, d belsda nebã la d sagend-b tɩ b bao a Zeova koglgo.—Nah. 2:1.
3. Wãn to la d tõe n dɩk a Nahũm togs-n-taare?
3 D mi n dɩk makre: A Zeova vẽnega a Nahũm t’a mak Niniiv baasg sẽn na n yɩ to-to wã ne Tɛɛb bɩ No-Ammo sẽn da yaa Ezipt galʋ-tẽng a ye wã. Pʋd n yaa Asiiri n da sãam tẽn-kãnga. (Nah. 3:8-10) D sã n gomd dũni-kãngã sãoong yell ne nebã, d tõe n goma Biiblã bãngr-goam sẽn wilgd t’a Zeova gomd fãa pidsdame wã. Makre, yʋʋmd 632 sẽn deng a Zezi rogmã, Babilon ne Meed sodaasã sẽn wa n na n sãam Niniiv tẽngã, sa-kẽeng n ni hal tɩ Tɩɩgr kʋɩlgã pid n puugi. Koomã rɩɩ tẽngã babg a ye tɩ lalsã lʋɩ, tɩ sodaasã toog n kẽ n saam Niniiv wa a Zeova sẽn da pĩnd n togsã.—Nah. 1:8; 2:7.
4. Koe-moonegã sasa, wãn to la d tõe tɩ d goamã yɩ vẽenese, tɩ b võorã wʋmb me yaa nana?
4 D mao tɩ d goamã yɩ vẽenese, tɩ b wʋmbã yaa nana: A Nahũm sebrã pida ne bilsgu, t’a goamã me tar pãnga. A koɛɛgã yɩɩ vẽenega. (Nah. 1:14; 3:1) Tõnd me ratame tɩ d goamã yaa vẽenese, tɩ b võorã wʋmb yaa nana. (1 Kor. 14:9) D sã n ta zak noor bɩ d wilgd d waoongã võore. D sã n wa zãmsd ned Biiblã bɩ d sõng-a t’a bɩɩs tẽeb ne a Zeova la ne a Gomdã, la a bãng a sẽn tõe n tũ bũmb ning a sẽn wʋmã to-to.—Rom 10:14.
5. Bõe la a Nahũm togs a bãngr-gomdã pʋgẽ tɩ kengd raoodo?
5 D sã n karemd Nahũm sebrã, d yãtame tɩ no-rɛɛsã ra kɩsa sɩd ne a sũur fãa t’a Zeova koɛɛgã na n pidsame. A Sʋɩtãan dũniyã sãoong sẽn kolgdã, Wẽnnaam sẽn kɩt t’a Nahũm yeel bũmb ningã kengda d raoodo. A yeela woto: “Bãmb menesda b bɛɛbã vugr bala, ka baood a yiib soab n paas ye.”—Nah. 1:9.