Tõnd koe-moonegã tʋʋm-teedo
1. Wãn to la koe-moondbã wõnd nug-tʋʋmã rãmba?
1 Nug-tʋʋmã rãmb tara tʋʋm-teed toor-toor n tʋmdẽ. B tara kẽer n tʋmd tʋʋmd takɩ, n tar sãnda n tʋmd wakat fãa. Sẽn mi-b b tʋʋmã sõma wã, tara zĩig n bĩngd teed nins b sẽn tar n tʋmd wakat fãa wã, bala, b tara yõod wʋsg ne-ba. Biiblã sagenda kiris-ned fãa t’a moon koɛɛgã, la a modg n “yɩ tʋm-tʋmd sẽn kõn zoe yãnd ye.” (2 Tɩm. 2:15) Tʋʋm-te-bʋg n tar yõod ne-d n yɩɩda? Yaa Wẽnnaam Gomdã, bala, yaa rẽ la d pipi tʋʋm-teoog d sẽn tar n ‘maand karen-biisi.’ (Mat. 28:19, 20) Dẽnd d segd n modgame n paasd d minimã, n tõog n “togsd sɩd koɛɛgã tɩrg bala.” Tʋʋm-teed a taab n be, tɩ koe-moond fãa segd n bãng a sẽn tõe n tall-b n moond koɛɛgã to-to tɩ womd biisi.—Yel. 22:29.
2. Tʋʋm-te-bʋs la d tar n zãmsd nebã Biiblã?
2 D koe-moonegã tʋʋm-teedo: Biiblã sẽn yãk a toogo, tʋʋm-te-bʋs la d tara? Pipi tʋʋm-teoog d sẽn tar n zãmsd nebã Biiblã yaa Biiblã sɩd yetame tɩ bõe? sebrã. D sã n zãms ned seb-kãng n sa, d zãmsda a soabã Kell-y n pa-y “Wẽnnaam nonglmã pʋgẽ” sebrã, n sõng-a t’a bãng n tũ Biiblã saglsã. Woto yĩnga, d segd n modgame n tall seb-kãensã n zãms nebã Biiblã sõma. Sɛb kẽer me n be n sõngd wʋsgo. Wala makre, Koe-noog sẽn yit Wẽnnaam nengẽ! sebrã sõngd-d lame tɩ d paamd n sɩngd Biiblã zãmsg ne nebã. Tõnd moonegã zĩigẽ nebã sã n pa mi kareng sõma, pa rẽ bɩ d sã n pa tar sɛb ne b buudã gomde, d tõe n talla Kelg-y Wẽnnaam sebrã wall Kelg-y Wẽnnaam n paam n vɩɩmd wakat sẽn kõn sa wã sebrã n sõng-ba. D tõeeme me n tall Ãnd dãmb n maand a Zeova raabã rũndã-rũndã? sebrã, n sõng d Biibl karen-biisã tɩ b bãng tõnd siglgã. D leb n tara video-rãmb sẽn tõe n sõng-d tɩ d maan karen-biisi. Makre, Bõe yĩng tɩ y tog n zãms Biiblã? Bõe la b maand Rĩung roogẽ? n paas Wẽnnaam tara yʋʋr bɩ? video-rãmbã. D modg n tall-b n moond koɛɛgã sõma.
3. Wãn to la sõss nins b sẽn na n ning Rĩungã Tʋʋmd sebrã pʋgẽ wã na n sõng-do?
3 B na n wa ninga sõss Rĩungã Tʋʋmd sebrã pʋgẽ, tɩ sõng-d tɩ d bãng n tʋm ne d tʋʋm-teedã sõma. D sã n modgdẽ n tʋmd ne tʋʋm-te-kãensã sõma, na n wilgame tɩ d tũuda Biiblã sagl-kãngã: “Gũus f meng ne koɛɛg ning fo sẽn zãmsd nebã, la ges bõn-kãens n da bas ye. Tɩ bõe, yaa woto la fo na n fãag f menga, la neb nins sẽn kelgd foomã.”—1 Tɩm. 4:16.