D rɩk no-rɛɛsdbã togs-n-taare: A Habakuk
1. Bõe n tõe n kɩt tɩ tõnd me wa tagsd wa no-rɛɛs a Habakuki?
1 Wẽnemã sẽn tar paasg dũniyã zugã, tõnd me tõe n wa tagsda wa a Habakuki. A ra soka a Zeova woto: “Bõe yĩng tɩ yãmb bas tɩ m yãt tʋʋm-wẽnsã, bõe yĩng tɩ y get tõnd tɩ d be namsg pʋga?” (Hab. 1:3; 2 Tɩm. 3:1, 13) D sã n bʋgsd a Habakuk sebrã goam zugu, la d tagsd a mak-sõngã yelle, tõe n sõng-d lame tɩ d gũ a Zeova bʋ-kaoorã daar sẽn watã.—2 Pɩy. 3:7.
2. Wãn to la d tõe n wilg tɩ d kɩsa Wẽnnaam sɩda?
2 D wilg tɩ d kɩsa Wẽnnaam sɩda: A Habakuk pa bas tɩ yɛlã sẽn da sãamd a sũurã koms a raood ye. A kell n talla tẽebo, n tʋm tʋʋmd ning Wẽnnaam sẽn bobl-a wã. (Hab. 2:1) A Zeova yeela a no-rɛɛsã t’a bas a yam tɩ yẽ na n pidsa a gomdã wakat ning a sẽn yãkã bal kɛpɩ, la tɩ “nin-tɩrg na n vɩɩmda a tẽebã yĩnga.” (Hab. 2:2-4) Bõe la woto wilgd kiris-nebã sẽn vɩ dũni-kãngã yaoolem wakatã? Wilgdame tɩ pa dũniyã saab sẽn na n yɩ wakat ningã n segd n pak tõnd ye. Yaa d modg n kɩs sɩd ne d sũur fãa tɩ dũniyã sɩd na n saame. D sã n tar tẽebo, d na n tũuda Wẽnnaam ne yẽesem, la d lʋɩɩsd koe-moonegã taoore.—Ebre. 10:38, 39.
3. Bõe yĩng tɩ d segd n tũ a Zeova ne sũ-noogo?
3 D tũ a Zeova ne sũ-noogo: Goog sẽn yit Magoogã sã n wa na n zab ne a Zeova nin-buiidã, d tẽebã na n paama makre. (Eze. 38:2, 10-12) Zabr wata ne toogo, tɩ namsd nebã fãa, baa sẽn wat n baas n tõog-b zabrã. Rɩɩb tõe n wa paoogame, neb kẽer tõe n bõna b paoongo, tɩ vɩɩmã pa le noomẽ ye. A buudã sã n paam-do, d na n maana wãna? A Habakuk sẽn da mi tɩ toog n watã, a yãka yam n na n kell n tũ a Zeova ne sũ-noogo. (Hab. 3:16-19) Toog ning sẽn watã sasa, “yaa sũ-noog ning sẽn yit Sẽn-Ka-Saab nengẽ wã” me n na n kõ tõnd pãnga.—Nee. 8:10; Ebre. 12:2.
4. Sũ-no-bʋg la d tõe n paam masã, la beoog-daare?
4 Neb nins a Zeova sẽn na n fãag a bʋ-kaoorã sẽn watã sasa wã na n kell n paamame tɩ b wilg-b Wẽnnaam daabã. (Hab. 2:14) Sẽn na n vʋʋg-bã me na n paam n bãnga a Zeova. Bɩ d tũnugd ne segb buud fãa d sẽn paame, n sõng nebã tɩ b bãng a Zeova la a tʋʋm-kãsemsã.—Yɩɩn. 34:2; 71:17.