Wẽnnaam Gomdã a sẽn da kɩt tɩ b gʋlsã toeemame bɩ?

Neb kẽer sokda b mens Wẽnnaam Gomdã sã n pa toeeme. No-rɛɛs a Ezayi yeelame tɩ Wẽnnaam gomd “paada wakat fãa!” (Ezayi 40:8) D maanda wãn n kɩs sɩd tɩ Wẽnnaam pʋlemsã pa tol n toeeme?

Wẽnnaam tara tõog n tõe n kogl a Gomdã tɩ ra meneme, la a kɩt me tɩ ned pa tol n toeem-a ye. Pĩnd wẽndẽ wã, neb nins sẽn da lebgd n gʋlsd Wẽnnaam Goamdã ne nusã ra maagda b yĩng n sõd gom-biisã yembr-yembre, n na n bãng tɩ b sɩd pa paas bũmbu, tɩ b pa toeem bũmbu, wall b pa yãk bũmb ye. Sɩda, gʋlsdb kẽer tudgame tɩ gom-biis sãnda yõs bilfu, ninsaal sẽn pa zems zãngã yĩnga. La rẽ pa toeem goamã võor ye.

D MAANDA WÃN N KƖS SƖD TƖ WẼNNAAM SEBRÃ D SẼN TAR RŨNDÃ-RŨNDÃ WÃ KET N YAA WẼNNAAM GOAMDÃ?

Wẽnnaam sebrã tõrã b sẽn lebg n gʋls ne nus pĩnd wẽndẽ wã sõor taa bãmb tusa. Sã n mikame tɩ gomd n yõsg sebr a ye pʋgẽ, b tõe n dɩkame n mak ne sɛb a taabã, n bãng sẽn yaa sɩdã. Y sã n dat vẽenem n paase, bɩ y kẽ jw.org pʋgẽ n karem sõsg ning gom zug sẽn yaa: “La Bible a-t-elle été modifiée ou falsifiée ?”

Wala makre, pĩnd wẽndẽ sɛb la b yã tãens bogdẽ Mog-kɩɩngã sɛɛgẽ yʋʋmd 1947 wã, tɩ b boond seb-kãens tɩ Mog-kɩɩngã seb-pindmã. Wẽnnaam sebrã goam kẽer n da be-be. B sẽn gʋls gom-kãensã ra yɩɩda yʋʋm tus a yiibu. Bãngdb n dɩk seb-kãens goamã n mak ne tõnd rũndã-rũndã Wẽnnaam sebrã. Bõe la b yã-yã?

Bãngdbã yãame tɩ goam nins sẽn be Wẽnnaam sebrã pʋgẽ tõnd sẽn tar rũndã-rũndã wã yaa a ye ne b sẽn da gʋls a soab ne nus pĩnd wẽndẽ wã.a Dẽnd yaa goam nins Wẽnnaam sẽn kɩt tɩ b gʋls pĩnd wẽndẽ wã la tõnd sẽn ket n tar rũndã-rũndã wã. D tõe n kɩsa sɩd tɩ Wẽnnaam gesame tɩ ned pa tol n toeem bũmb a Gomdã pʋgẽ ye.

Dẽnd d sã n wa karemd Wẽnnaam sebrã, d tõe n basa d yam t’a goamã zemsa kɛpɩ n pa toeem ye. Masã, bɩ d ges Wẽnnaam no-rɛɛsdbã sẽn sõng tõnd tɩ d bãng bũmb ning Wẽnnaam zugu.