D sẽn tõe n maan to-to tɩ koɛɛgã mooneg yɩ-d noogo

Koɛɛgã mooneg zoe n yɩɩ toog ne yãmb bɩ? Tõnd sʋkã neb wʋsg na n leokame tɩ n-ye. Bõe yĩnga? Tõe n yaa nebã sã n pa rat n kelg koɛɛgã. Leb n tõe yaa b sã n sãbsd tõndo, wall mi n yaa toog ne-d tɩ d gom ne sãana. Yaa vẽeneg tɩ yel-kãensã tõe n booga d sũ-noogo. La tõnd Wẽnnaamã yaa sũ-noog soaba, n dat tɩ d tũ-a ne sũ-noogo. (Yɩɩn. 100:2; 1 Tɩm. 1:11) Ad bʋʋm a tã sẽn kɩt tɩ d segd n moon koɛɛgã ne sũ-noogo.

Pipi, tõnd sẽn moond koɛɛg ningã wilgdame tɩ manegr n wate. Baa rũndã-rũndã nebã sẽn pa tẽed manegrã, d tõe n sõng-b lame tɩ b tẽ “sũ-noog koɛɛgã.” (Eza. 52:7) Wẽnnaam Rĩungã koe-noogã tõe n kõo tõnd mengã sũ-noogo. Dẽnd, nand tɩ d yi koɛɛgã moonego, yɩta sõma tɩ d bʋgs Wẽnnaam Rĩungã sẽn na n wa ne bark ninsã zugu.

Yiib-n-soaba, koe-noog ning tõnd sẽn moondã sõngda nebã tɩ b manegd b vɩɩmã, la b tõe n paam Wẽnnaam zoodo. B sẽn bãngd bũmb ningã, kɩtame tɩ b basd b tʋʋm-wẽnsã, la b tõe n wa paam vɩɩm sẽn kõn sa. (Eza. 48:17, 18; Rom. 1:16) Tõnd tʋʋmdã fãagda yõya. Baa neb kẽer sẽn pa rat tɩ d sõng-bã, d ket n baooda sẽn dat-bã.—Mat. 10:11-14.

Tãab-n-soaba, d sẽn moond koɛɛgã yaa bũmb sẽn waoogd a Zeova. Bʋʋm-kãngã n tar yõod n yɩɩda. A Zeova sũur nooma ne tõnd koe-moonegã hal wʋsgo. (Eza. 43:10; Ebre. 6:10) A pʋd n kõta tõnd a vʋʋsem sõngã tɩ d tʋmd tʋʋm-kãngã. Woto yĩnga, bɩ d pʋʋsd a Zeova n kot-a sũ-noogã sẽn naag vʋʋsem-sõngã bilã. (Gal. 5:22) Ne a Zeova sõngre, d na n tõog n maoa ne d zu-loeesã, la d ket n moond koɛɛgã ne yẽesem. (Tʋʋ. 4:31) Woto, baa nebã manesem sẽn yaa to-to koɛɛgã mooneg sasa, d na n kell n talla sũ-noog d tʋʋmdã pʋgẽ.—Eze. 3:3.

GES-Y VIDEO KÃNGÃ: ZÃMSD-Y BIIBLÃ LA Y BƲGSD A GOAMÃ ZUGU, N TALL SŨ-NOOGO. RẼ POOR BƖ Y LEOK SOGSGÃ:

• Baa d sã n moonda koɛɛgã wʋsg kiuug fãa, bõe yĩng tɩ d segd n zãmsd Biiblã n pa vaandẽ?

• Bõe la d tõe n maan n dɩk a Mary togs-n-taare?

• Wakat bʋg la yãmb yãk n bʋgsd Wẽnnaam Gomdã zugu?

• Y sã n wa n moond koɛɛgã, bõe n noom yã??