D WILG TƖ D YAA KIRIS-NEB HAKƖƖKA
D sẽn tõe n maan n wɩng ne Biiblã zãmsgo
Y tʋll n kell n saka Wẽnnaam toog pʋgẽ wa a Dãniyɛll bɩ? A Dãniyɛll ra wɩngda ne Wẽnnaam Gomdã zãmsgo, hal baa no-rɛɛsdbã goam nins sẽn tagmã. (Dãn. 9:1, 2) D sã n wɩngd ne Biiblã zãmsgo, na n sõng-d lame tɩ d kell n sak Wẽnnaam. Bõe yĩnga? Bala, na n kɩtame tɩ d maneg n kɩs sɩd t’a Zeova na n pidsa a pʋlemsã. (Zoz. 23:14) D na n maneg n nonga a Zeova, la d tʋll n maan sẽn yaa tɩrga. (Yɩɩn. 97:10) La bõe la d segd n maan sẽn na n yɩl n tõoge? Ad sagls a wãna.
Bõe la d segd n zãmse? Sẽn na yɩl tɩ d Biiblã zãmsg yɩ sõma, tigissã seglg segd n naagame. D sã n maand vaeesg Biiblã babg ning d sẽn karem semennã pʋgẽ wã zug n bao n wʋm zĩis kẽer võor sõma, na n naf-d lame. Kẽer me maanda vaeesg no-rɛɛsdbã goam nins sẽn tagmã zugu, wall zʋg-sõma nins vʋʋsem sõngã sẽn sõngd tɩ d bɩɩsdẽ wã zugu. Sãnda me baood n bãnga yɛl kẽer tʋm-tʋmd a Poll misioneeremdã sasa so-togsã wɛɛngẽ, wall b pʋd n mi n tik bũmb a Zeova sẽn naane, n maan vaeesgo. Sokr sã n tiig n wa y yamẽ, bɩ y gʋls-a n wa maan vaeesg y nindaar zãmsgã sasa.
Yɛ la d tõe n paam vẽenem n paase? D sã n ges Tʋʋm-teoog sẽn sõngd tɩ d vaees Biiblã n bãng bũmb a taab video wã na n sõng-d lame. D sã n dat n bãng d bãngrã sẽn taẽ, d tõe n bao n bãnga Dãniyɛll sak a 7 pʋgẽ we-rũmsã sẽn makd pãn-soaadb ninsi.
Zãmsgã segd n kaoosa lɛɛr a wãna? Yɩl tɩ d tẽebã tall pãnga, d segd n zãmsda Biiblã n pa vaandẽ ye. Sɩngrẽ wã, d tõeeme n da rɩk sẽk wʋsg ye. La kaoosg zugẽ, d tõe n paasda bilf-bilfu. F sã n zãmsd Wẽnnaam Gomdã, yaa wa f sẽn tuud sãnem. F sã n paamdẽ, f nangda pãng ne tuubu! (Yel. 2:3-6) Woto me, d vaeesgã sã n nafd-do, d na n maneg n nonga Wẽnnaam Gomdã, tɩ kɩt tɩ d vaeesd-a wakat fãa.—1 Pɩy. 2:2.
DÃNIYƐLL SAK A 7 PƲGẼ WE-RŨMSÃ MAKDA BÕE?
SOKR A TO:
Wãn to la Dãniyɛll 7:8, 24 goamã pids-yã?
NINDAARE:
Vẽnegr sak 13 pʋgẽ we-rũmsã makda bõe?