D WILG TƖ D YAA KIRIS-NEB HAKƖƖKA

D sã n dat n maan karen-biisi, d segd n moona koɛɛgã la d zãms nebã

A Zeezi kõo a karen-biisã noor tɩ b kẽng n tɩ maan karen-biisi. (Mat. 28:19) Yɩl n maan dẽ, b segd n moona koɛɛgã la b zãms nebã. Segdame tɩ d mii n sok d menga: ‘Bõe la m tõe n maan n tõog n moon koɛɛgã sõma, la m paas m sẽn zãmsd nebã to-to wã sõmblem?’

MOON KOƐƐGÃ

D ra gũudẽ tɩ nebã wa d nengẽ ye, d gẽes sẽn dat-b n kelg koɛɛgã. (Mat. 10:11) D sã n wa moond koɛɛgã, bɩ d modg n sõs ne neb nins d sẽn yãtã. (Tʋʋ. 17:17) Tʋm-tʋmd a Poll sẽn moon koɛɛgã ne yẽesmã yɩɩ sabab t’a Lidi lebg kiris-neda.—Tʋʋ. 16:13-15.

A Sãmwɛll sẽn kõt a Ezekɩyɛll sebre; A Salomo ne a Maari sẽn taasd a Ezekɩyɛll ne a Abigayɛll koɛɛgã — “Bʋd f bõn-buud yibeoogo, la f ra bas f nus tɩ yɩ zaalem zaabr ye” (Koɛ. 11:6)

NING VIDEO-KÃNGÃ: MOON-Y KOƐƐGÃ N ‘DA BAS YE’—SEGB SẼN PAAM FÃA LA ZAK NE ZAKA. RẼ POOR BƖ Y LEOK SOGSGÃ:

Bõe la a Sãmwɛll maand a tʋʋmã zĩigẽ tɩ wilgdẽ t’a wɩngda ne koɛɛgã moonego?
Bõe yĩng tɩ sẽn yaẽ fãa bɩ d segd n pẽdg ne koɛɛgã moonego?
Y tʋʋmã zĩigẽ wall sẽn yaẽ fãa, ãnd soab la y tõe n taas koɛɛgã?

ZÃMS NEBÃ BIIBLÃ

D sã n dat n maan karen-biisi, d pa segd n tek sɛbã pʋɩɩb ye. D tog n lebg n tɩ kaaga sẽn deeg-b sɛbã, la d bao n zãms-b Biiblã. (1 Kor. 3:6-9) La d sã n mao n na n sõng ned t’a bãng sɩdã tɩ pa womd biis sõma, d maanda wãna? (Mat. 13:19-22) B maka sẽn dat-b n bãng sɩdã sũy ne ‘zĩ-sõngo.’ D segd n ket n baooda bãmb dãmbã.—Mat. 13:23; Tʋʋ. 13:48.

A Salomo ne a Maari sẽn zãmsd a Ezekɩyɛll ne a Abigayɛll; A Ezekɩyɛll ne a Abigayɛll sẽn moond koɛɛgã zãma sʋka — “Maam n sele, t’a Apoloos zãgs koom, la yaa Wẽnnaam n kɩtd tɩ koodã bɩtẽ” (1 Kor. 3:6)

NING VIDEO-KÃNGÃ: MOON-Y KOƐƐGÃ N ‘DA BAS YE’—ZÃMA SƲKA, LA MAAN-Y KAREN-BIISI. RẼ POOR BƖ Y LEOK SOGSGÃ:

Bõe la a Salomo ne a Maari maan n sõng a Ezekɩyɛll ne a Abigayɛll tɩ b sak sɩdã?
D koe-moonegã neng buud fãa pʋgẽ, zãma sʋk koe-moonegã sẽn naage, bõe la d rat n maane?
Bõe la d tõe n maan n paam n zãms neb Biiblã?