Yãmb nee a Zeova sẽn yaa Wẽnnaam ning buudã naanegã pʋgẽ bɩ?

Yãmb sã n get fɩlɛɛr sẽn tar kulɛɛr toor-toore, ãdsã sẽn pid sa-gãongã, bɩ koom sẽn zoet ne pãnga, y neeme tɩ yaa Naandã nug tʋʋm bɩ? Bũmb nins a Zeova sẽn naanã wilgda a sẽn yaa Wẽnnaam ning buudã vẽenega. (Rom. 1:20) D sã n maag d yĩng n tags bũmb nins d sẽn ne wã zutu, d tõe n yãa Wẽnnaam pãngã, a nonglmã, a yamã la a tɩrlmã. D tõe n bãngame me t’a yaa kõata.—Yɩɩn. 104:24.

Bũmb nins a Zeova sẽn naanã sʋka, bʋs la y yãt daar fãa tɩ noom-y-yã? Baa yãmb sã n vɩ galʋ-tẽng pʋgẽ, y tõe n yãa liuuli wall tɩɩse. D sã n get bũmb nins a Zeova sẽn naanã, tõe n sõngame tɩ d yɩɩr booge, tõe n kɩtame tɩ d tagsd bũmb ning sẽn tar yõod n yɩɩdã yelle, la kɩt tɩ d maneg n kɩs sɩd t’a Zeova tõe n gesa d yell wakat sẽn kõn sa yĩnga. (Mat. 6:25-32) Y sã n tara kamb bɩ y sõng-b tɩ b yã bũmb nins sẽn wilgd t’a Zeova yaa Wẽnnaam sẽn ka mak-n-taagã. D sũur sẽn noom to-to ne bũmb nins d Naandã sẽn naanã sã n paasdẽ, d sẽn nong-a to-to wã me na n paasdame.—Yɩɩn. 8:4, 5.

GES-Y VIDEO WÃ: BŨMB NINS WẼNNAAM SẼN NAANÃ WILGDA A ZIIRÃ: VẼENEMÃ LA KULƐƐR-DÃMBÃ, TƖ RẼ POOR BƖ Y LEOK SOGSGÃ:

• Bõe n kɩt tɩ d tõe n yã bũmb kulɛɛre?

• Bõe n kɩt tɩ d sã n get bũmb kẽer bɩ yaa wa b kulɛɛrã toeemdame?

• Bõe yĩng tɩ sa-gãongã kulɛɛr mi n toeemdẽ?

• Bõe la yãmb mi n yã yãmb babgẽ wã t’a kulɛɛrã noom yãmb wʋsgo?

• Bõe yĩng tɩ d segd n mi n maag d yĩng n ges bũmb nins Wẽnnaam sẽn naanã?