D WILG TƖ D YAA KIRIS-NEB HAKƖƖKA
A Zeova nonga neb nins sẽn yaa yɩlmã
“Pek f nusã. Maneg f roogã. Pɩɩs zakã. Tɩ lob sagdã.” Roagdb wʋsg wilgda b kambã b sẽn tõe n yɩ yɩlem to-to. La noy nins b sẽn wilgd b kambã yita tõnd Wẽnnaamã sẽn yaa sõngã nengẽ. (Yik. 30:18-20; Tõo. 23:15; 2 Kor. 7:1) D sã n modg tɩ d yĩngã la d teedã yaa yɩlem wakat fãa, d waoogda a Zeova. (1 Pɩy. 1:14-16) La d zakã pʋgẽ la a yɩngã yẽ? Nebã lobda sagdã zĩig fãa. La kiris-nebã modgda ne b sũy fãa n pa rẽgemd tẽngã ye. (Yɩɩn. 115:16; Vẽn. 11:18) Baa yel-bõonesã wilgda tõnd tagsg sẽn yaa a soab yɩlemdã wɛɛngẽ. Makre, d sẽn lobd bombom pagdã, zi-rãmbã saase la sĩngom-dãmbã zĩig ningã. Bũmb fãa pʋgẽ, tõnd dat n “wilgdame tɩ d yaa Wẽnnaam tʋm-tʋmdba.”—2 Kor. 6:3, 4.
GES-Y VIDEO WÃ: “WẼNNAAM NONGA NEB NINS SẼN YAA YƖLMÃ,” TƖ RẼ POOR BƖ Y LEOK SOGSGÃ:
Neb kẽer pa modgd tɩ b teedã yaa yɩlem wakat fãa ye. Padems-bʋs la b baood rẽ wɛɛngẽ?
Bõe la a Moyiiz tõogã yeta, tɩ wilgd a Zeova tagsg sẽn yaa soab yɩlemdã wɛɛngẽ?
Bõe la d tõe n maan n waoog a Zeova tɩ pa tũ ne goama?
Bõe la m tõe n maan n wilg tɩ m dɩkda a Zeova togs-n-taar yɩlemdã wɛɛngẽ?