Bõe n ket yãmb sẽn segd n maan n wa tõog n deeg lisgu?
D WILG TƖ D YAA KIRIS-NEB HAKƖƖKA
Yãk-y yam n na n tũ a Zeova
Yãmb roagdbã yaa a Zeova Kaset rãmba, tɩ y yaa koe-moond sẽn nan pa reeg lisgu, wall y yaa ned sẽn nan zãmsd Biiblã, n magd n na n wa reeg lisg bɩ? Bõe yĩng tɩ segd tɩ y bao n na n deeg lisgu? Ned sã n dɩk a meng n kõ a Zeova la a reeg lisgu, yaa yẽ ne a Zeova zoodã sɩngr la rẽ. (Yɩɩn. 91:1) Ne rẽ maasem me, a na n wa paama fãagre. (1 Pɩy. 3:21) Bõe la y tõe n maane, n wa paam n deeg lisgu?
Rẽnda yãmb mengã kɩs sɩd tɩ yaa tũudum hakɩɩkã la woto. Bũmb sã n pa vẽeneg y yamẽ, bɩ y maan vaeesg y toore. (Rom. 12:2) Bao-y n bãng-y y manesem bɩ y zʋgd nins y sẽn segd n toeemã, la y toeeme. La segd n yɩɩ y sẽn dat n ta a Zeova yamã yĩnga. (Yel. 27:11; Efɛ. 4:23, 24) Wakat fãa bɩ y pʋʋsd a Zeova n kot sõngre. Bas-y y yam t’a Zeova na n kõ-y-la raoodo, la a sõng-y ne a vʋʋsem sõngã sẽn yaa pãn-kãsengã maasem. (1 Pɩy. 5:10, 11) Modgr ning y sẽn na n maanã pa na n yɩ zaalem ye. A Zeova tũub n kɩtd tɩ ned vɩɩm tall barka.—Yɩɩn. 16:11.
GES-Y VIDEO WÃ: BŨMB NINS SẼN TÕE N SÕNG NED T’A WA REEG LISGU. RẼ POOR BƖ Y LEOK SOGSGÃ:
Yɩɩ tɩlɛ ne neb kẽer tɩ b mao ne zu-loe-bʋs n yaool n na n tõog n deeg lisgu?
Y maanda wãn n paam tẽeb sẽn sek y na sak n dɩk y meng n kõ a Zeova?
Bõe n wa n kɩt tɩ kẽer sak n dɩk b meng n kõ a Zeova n deeg lisgu?
Bark-bʋs la neb nins sẽn yãk yam n tũud a Zeova wã paamda?
Rɩk f meng n kõ a Zeova wã rat n yeelame tɩ bõe, la lisgã reegr me võor yaa bõe?