D WILG TƖ D YAA KIRIS-NEB HAKƖƖKA

D sõng neb nins sẽn pa tẽed tɩ Wẽnnaam beeme wã tɩ b wa tõog n bãng b Naandã

Yãmb zoe n basame n pa moon ned sẽn pa tẽed tɩ Wẽnnaam beeme koɛɛgã, y sẽn da tagsd t’a pa na n kelg-y yĩng bɩ? Sã n yaa woto, bɩ y tẽeg tɩ neb wʋsg sẽn pa tẽed tɩ Wẽnnaam beeme, la sẽn da maand b toog kae ne tũudmã yɛl wa n lebga a Zeova Kaset rãmba. Naoor wʋsgo, b sẽn dat bal yaa d sõng-b tɩ b paam kaset sẽn wilgd tɩ Wẽnnaam sɩd beeme.—Rom. 1:20; 10:14.

GES-Y VIDEO WÃ: TẼEG-Y-YÃ, NED SẼN PA TAR TẼEB TÕE N WA TALLA TẼEBO: SẼN PA TAR-B TŨUDMÃ. RẼ POOR BƖ Y LEOK SOKRÃ:

Wãn to la a Tommaso kibarã tõe n sõng yãmb tɩ y tall tagsg sẽn yaa sõma neb nins sẽn pa tẽed tɩ Wẽnnaam beeme wã zugu?

Y leoorã

D sẽn tõe n maan rẽ to-to

Ned sã n yeel-y t’a pa tẽed tɩ Wẽnnaam beeme, bɩ y tall sũ-mare, n gom ne bʋgsem, la y bao n bãng bũmb ning sẽn kɩt t’a tagsd woto wã. (2 Tɩm. 2:24) Sõs-y ne-a bũmb kẽer sẽn tõe n yɩ-a noog zugu. Tõe t’a na n sak n sõsa ne yãmb bũmb ning sẽn sõng neb wʋsg tɩ b wa tẽed tɩ Naand n be wã zugu. Sã n wa yaa woto, bɩ y tik sɛb la video nins b sẽn yiis rẽ yĩngã zug n sõs ne-a. B paasa la La vie a-t-elle été créée? borsiirã, ne Cinq questions à se poser sur l’origine de la vie borsiirã d koe-moonegã tʋʋm-teedã sʋka, tɩ y tõe n paam-b nana-nana.

Koɛɛgã mooneg sasa, y sã n wa seg ned sẽn pa tẽed tɩ Wẽnnaam beeme, sɩngrẽ wã y tõe n yɛɛsdame n pa rat n sõs ne-a ye. Y tõe n kosa koe-moond sẽn tar minim t’a sõng-yã. Tẽeg-y me t’a Zeova tõe n sõng-d lame tɩ d tõog n taas koɛɛgã neb nins sẽn tar yam ning sẽn zemsã tɩ kẽ b sũyã, baa b sã n da pa tẽed sɩngrẽ wã tɩ Wẽnnaam beeme.—Tʋʋ. 13:48.