Yãmb segl n saame n tõe n deeg lisg bɩ?

1. Nand tɩ ned sɩng roog meebo, bõe la a segd n deng n maane?

RƖK-Y makr ne ned sẽn yãk yam n na n me roogo. A zoe n mii roog ning buud a sẽn datã. Sẽn ket bal yaa a tɩ ra teedã n wa sɩng meeb bɩ? Ayo! Nand t’a sɩnge, bũmb sẽn tar yõod wʋsg la a tog n deng n maane. A segd n deng n geela roogã meeb sẽn na n dɩ ligd ningã. Bõe yĩnga? Bala yaa tɩlɛ t’a bãng a sã n tara ligd sẽn sekd a na me n baase. A sã n deng n geel n bãng roogã meeb sẽn na n dɩ ligd ningã n yaool n sɩnge, rẽ tõe n sõng-a lame t’a tõog n baas tʋʋmdã.

2. Wa Luk 14:27-30 wã sẽn yetã, y segd n deng n bʋgsa bõe zug neer n yaool n deeg lisgu?

² Y sẽn nong a Zeova, la y rat n pʋʋs-a barkã kɩtame tɩ y tʋll n deeg lisg bɩ? Sã n yaa woto, rẽnd y yam-yãkrã wõnda raoã sẽn dat n me roogã. Bõe yĩng tɩ d yet woto? Tẽeg-y-yã a Zeezi goam nins sẽn be Luk 14:27-30 wã. (Karm-y-yã.) A Zeezi goma woto n na n wilg nebã b sẽn segd n maan bũmb ning n tõog n lebg yẽ karen-biisi. Yɩl n lebg a Zeezi karen-biiga, yaa tɩlɛ tɩ d sak n na n maan d “sẽn segd” n maanã fãa, rat n yeel tɩ n sak n na n mao ne zu-loees toor-toore, la d sak n na n mong d meng bũmb kẽere. (Luk 9:23-26; 12:51-53) Rẽ wã, nand tɩ y reeg lisgu, y segd n deng n bʋgsa neer n ges bũmb nins fãa y sẽn segd n maanã, y sã n wa lebg a Zeezi karen-biiga. Woto, y tõogd n segla y meng n kell n maan sɩd ne Wẽnnaam y lisgã poore.

3. Bõe yell la d na n gom sõs-kãngã pʋgẽ?

³ La tara yõod tɩ y modg n deeg lisgu, n lebg a Zeezi karen-biiga, baa ne y sẽn mi tɩ pa na n yɩ nana wã bɩ? N-ye! Y sã n deeg lisgu, y na n paama bark ka tɛk masã menga, la beoog sẽn wate. Bɩ d leok sogsg a wãn lisgã wɛɛngẽ. Yãmb sẽn na n leok sogsgã to-to wã na n sõng-y lame tɩ y bãng y sã n segl n saame.

Y SẼN SEGD N BÃNG RƖK F MENG N KÕ A ZEOVA, LA LISGÃ REEGRÃ WƐƐNGẼ

4. a) Rɩk f meng n kõ a Zeova rat n yeelame tɩ bõe? b) Wa Matiye 16:24 sẽn yetã, ‘kɩɩs f mengã raabã’ võor yaa bõe?

⁴ Rɩk f meng n kõ a Zeova rat n yeelame tɩ bõe? Nand tɩ y reeg lisgu, y segd n dɩka y meng n kõ a Zeova. Y maanda rẽ wãn to? Y pelgda y pʋg n pʋʋs-a, n yeel-a tɩ y na n tũ-a-la wakat fãa. Y sã n dɩk y meng n kõ Wẽnnaam, y ‘kɩɩsda y mengã raabo.’ (Karm-y Matiye 16:24.) Rẽ tɛka, lebga a Zeova n so yãmba. Ad yaa zu-zẽkr tɛkẽ! (Rom. 14:8) Yaa wa y sẽn yet a Zeova tɩ masã tɛka, sẽn pak yãmb n yɩɩd yaa a raabã maanego, pa sẽn noom yãmb mengã ye. Y sã n dɩk y meng n kõ a Zeova, yaa pʋlenga. A Zeova pa modgd tõnd tɩ d pʋlm-a tɩ d na n maana a raabã ye. La d sã n paam n pʋlm-a n sa, a getame tɩ lebga tɩlɛ tɩ d pidsi.—Yɩɩn. 116:12, 14.

5. Bõe n kɩt tɩ rɩk f meng n kõ a Zeova wã yaa toor ne lisgã?

⁵ Bõe n kɩt tɩ rɩk f meng n kõ a Zeova wã yaa toor ne lisgã? Rɩk f meng n kõ a Zeova wã yaa yãmb ne a Zeova sʋk bala. Ned pa tõe n bãng ye. La lisgã yẽ yaa zãma sʋka, nebã taoore. Naoor wʋsgo, yaa tigis-kãseng sasa. Yãmb sã n wa reegd lisgu, y wilgda neb a taabã tɩ y zoe n dɩka y meng n kõ a Zeova.b Woto kɩtdame tɩ nebã bãng tɩ y nonga a Zeova ne y sũurã fãa, ne y sɩɩgã fãa, ne y yamã fãa, ne y pãngã fãa, la tɩ y yãka yam n na n tũ-a wakat fãa.—Mark 12:30.

6-7. Wa 1 Pɩyɛɛr 3:18-22 sẽn wilgdã, bõe ne bõe n wilgd tɩ lisgã yaa tɩlɛ?

⁶ Sɩd-sɩdã, segdame tɩ y reeg lisg bɩ? Ges-y goam nins sẽn be 1 Pɩyɛɛr 3:18-22. (Karm-y-yã.) Wala koglgã sẽn da wilgd vẽeneg t’a Nowe tara tẽebã, yãmb lisgã me wilgda vẽeneg tɩ y rɩka y meng n kõ a Zeova. La rẽ yĩnga, lisgã sɩd yaa tɩlɛ bɩ? N-ye. A Pɩyɛɛr wilga bũmb a ye sẽn kɩt tɩ yaa tɩlɛ. Pipi, lisgã “fãagda yãmba.” Wãn to? Yaa y sã n wilg ne y tʋʋm-tʋmdɩ wã tɩ y tẽeda a Zeezi, la tɩ y tẽedame t’a sɩd kii tõnd yĩnga, n vʋʋg n kẽng saasẽ, la tɩ masã a “bee Wẽnnaam nug-rɩtgo.”

⁷ Yiibu, lisgã sõngda ned t’a paam “sũur-kaset sẽn yaa sõma.” Yãmb sã n dɩk y meng n kõ a Zeova n deeg lisgu, y lebga a zoa meng-menga. Y sẽn tek yam n kos sugr ne y sũur fãa wã yĩnga, la y tall tẽeb ne a Biigã maoongã, Wẽnnaam kõt-y-la y yel-wẽnã sugri. Rẽ wã, y tõe n paama sũur-kaset sẽn yaa sõma Wẽnnaam taoore.

8. Yãmb sã n wa reegd lisgu, segd n yɩɩ bõe yĩnga?

⁸ La y sã n wa reegd lisgu, segd n yɩɩ bõe yĩnga? Yãmb sẽn zãms Biiblã sõma wã, y bãnga bũmb wʋsg a Zeova zugu, rat n yeel t’a sẽn yaa Wẽnnaam ning buudã, la a manesem sẽn yaa to-to. Y sẽn bãng bũmb ning a Zeova zugã kɩtame tɩ y sũur lebg noogo. Kɩtame me tɩ y nong-a wʋsgo. Segdame tɩ y sã n wa reegd lisg bɩ mik tɩ sẽn yɩɩd fãa, yaa yãmb sẽn nong a Zeova wã yĩnga.

9. Matiye 28:19, 20 wã pʋgẽ, b sẽn yeel tɩ nebã segd n deega lisg ne Ba wã la Biigã la vʋʋsem sõngã yʋʋrã rat n yeelame tɩ bõe?

⁹ D tõe n yeelame me tɩ yaa y sẽn bãng bũmb nins Biiblã sẽn yetã, n kɩt tɩ y yãk yam n na n deeg lisgu. A Zeezi sẽn wa n na n yeel a poorẽ dãmbã tɩ b tɩ sõng nebã tɩ b lebg a karen-biisã, a togsa bũmb sẽn wilgd rẽ. (Karm-y Matiye 28:19, 20.) A Zeezi gom-kãensã wilgdame tɩ nebã segd n deega lisg “ne Ba wã la Biigã la vʋʋsem sõngã yʋʋre.” Gomdã võor yaa bõe? Rat n yeelame tɩ y sã n bãng Biiblã sẽn yet a Zeova zugã, a Biig a Zeezi zugã, la vʋʋsem sõngã wɛɛngẽ wã, y segd n tẽe ne y sũur fãa. Yaa bãngr hakɩɩk sẽn tõe n kẽ sũur sõma. (Ebre. 4:12) D tẽeg bũmb a wãn y sẽn bãng Biiblã pʋgẽ.

10-11. Bõe la b sõng yãmb tɩ y bãng d saasẽ Ba wã zugu, n sak n deege?

¹⁰ Tẽeg-y y tagsg sẽn yɩ to-to, y sẽn wa n bãng sɩdã d saasẽ Ba wã zugã. Makre, y sẽn wa n bãng t’a yʋʋr la a Zeova, tɩ yẽ n “yaa Sẽn-Ka-To sẽn so dũniyã gilli,” la tɩ yẽ a ‘yembr bal n yaa dũniyã soolem-dãmbã fãa Wẽnnaamã.’ (Yɩɩn. 83:19; Eza. 37:16) Yẽ la d Naanda, leb n yaa yẽ n “yaa fãagda.” (Yɩɩn. 3:9; 36:10) A zoe n maana bũmb sẽn na n wa fãag-d ne yel-wẽnã la kũumã. A kɩtame me tɩ d tõe n tẽ tɩ d na n wa paam n vɩɩmda wakat sẽn kõn sa. (Zã 17:3) Y sã n dɩk y meng n kõ a Zeova n deeg lisgu, na n wilgame tɩ y lebga a Kaset soaba. (Eza. 43:10-12) Y paamd n naaga a nin-buiidã sẽn be dũniyã gill zug n yaa wa zak a ye nebã. A boonda tõnd t’a Kaset rãmb hal tɩ yaa zu-zẽkr tɛkẽ, tɩ d wilgd neb a taabã a yʋʋrã.—Yɩɩn. 86:12.

¹¹ Y sẽn paam n bãng Biiblã sẽn yet Ba wã zugã yaa zu-zẽkr meng-menga! Yaa bãngr sẽn nafd ned sõma. Yaa y sã n tẽ rẽ la y na n dat ne y sũur fãa n dɩk y meng n kõ a Zeova n deeg lisgu.

12-13. Wilg-y bũmb a wãn y sẽn bãng Wẽnnaam Biig a Zeezi zugu, n sak n deege.

¹² Bɩ d gom y sẽn bãng Wẽnnaam Biig a Zeezi zugã yell masã. Y sẽn wa n bãng t’a Zeova sẽn yãk a toogo, a Zeezi n yɩɩd bũmb fãa sẽn be yĩngr la tẽngã, y tagsg yɩɩ wãna? Yẽ n ki n na n dol tõnd yel-wẽnã. A sak n kii tõnd yĩnga. Y sã n wilgd ne y tʋʋm-tʋmdɩ wã tɩ y kɩsa sɩd t’a kũumã ronda d yel-wẽnã, y tõe n paama sugri, la y paam Wẽnnaam zoodo, la y wa paam vɩɩm sẽn kõn sa. (Zã 3:16) A Zeezi n yaa d maan-kʋʋdb kãsma. A rat n sõng-y lame tɩ y paam n dɩ a maoongã nafa, tɩ yãmb ne Wẽnnaam zoodã tall pãng sõma. (Ebre. 4:15; 7:24, 25) A sẽn yaa Wẽnnaam Rĩungã rĩmã, Wẽnnaam na n tũnuga ne-a n kɩt t’a yʋʋrã paam waoogre, tɩ wẽng buudã fãa me sa, tɩ ãdem-biisã paam bark wakat sẽn kõn sa, arzãnã pʋgẽ. (Mat. 6:9, 10; Vẽn. 11:15) A Zeezi togs-n-taar la d fãa segd n dɩke. (1 Pɩy. 2:21) A maana Wẽnnaam raabã a vɩɩmã tõre, tɩ yaa mak-sõng n kõ tõndo.—Zã 4:34.

¹³ Yãmb sẽn tẽ bũmb nins Biiblã sẽn yet Wẽnnaam Bi-nongr a Zeezi zugã, kɩtame tɩ y nong-a. Nonglem kãng yĩnga, yãmb me rat n maana Wẽnnaam raabã y vɩɩmã pʋgẽ wa yẽ. Woto fãa kɩtame tɩ y rat n dɩk y meng n kõ a Zeova n deeg lisgu.

14-15. Bõe la b sõng yãmb tɩ y bãng vʋʋsem sõngã wɛɛngẽ, n sak n deege?

¹⁴ Y sẽn bãng vʋʋsem sõngã wɛɛngẽ wã yell la d na n gom masã. Y tagsg yɩɩ wãna, y sẽn bãng tɩ vʋʋsem sõngã pa Wẽnnaam, pa malɛka, pʋd n pa bõn-vɩɩga, la tɩ yaa Wẽnnaam pãngã? Yaa ne vʋʋsem sõngã maasem la a Zeova vẽneg neb tɩ b gʋls Biiblã. Vʋʋsem sõngã me n sõngd tõnd tɩ d wʋmd Biiblã goamã võor la d tũudẽ. (Zã 14:26; 2 Pɩy. 1:21) Ne vʋʋsem sõngã maasem, a Zeova kõta tõnd “pãng ning sẽn yɩɩd ninsaal rẽndã.” (2 Kor. 4:7) Vʋʋsem sõngã kõta tõnd pãng tɩ d moond koe-noogã, n yalsd kãn-kãe makr sasa, n pa komsd raoodo, la d tõogd toog baa ne zu-loeesã. Leb n yaa vʋʋsem sõngã n sõngd tõnd tɩ d bɩɩsd zʋg-sõma nins a sẽn sõngd ned t’a paamã. (Gal. 5:22) Ned sẽn teeg Wẽnnaam sã n kot-a a vʋʋsem sõngã ne pʋ-peelem, a sakd n kõ-a lame.—Luk 11:13.

¹⁵ Tõnd sẽn mi tɩ sẽn tũud-b a Zeova wã tõe n paama vʋʋsem sõngã sõngr n tõog n tũ-a wã, kengda d sũyã, la belsd tõndo. Yãmb sẽn tẽ bõn-kãensã y sẽn bãng vʋʋsem sõngã wɛɛngẽ wã, kɩtame tɩ y rat ne y sũur fãa n dɩk y meng n kõ a Zeova n deeg lisgu.

16. Bõe la d zoe n bãng sõs-kãnga pʋgẽ?

¹⁶ Yãmb sẽn dat n dɩk y meng n kõ Wẽnnaam n deeg lisgã yaa yam-yãkr yõod sẽn ka to. La wa d sẽn zoe n wilgã, yaa tɩlɛ tɩ y sak n na n maan y “sẽn segd” n maanã fãa, rat n yeel tɩ n sak n na n mao ne zu-loees toor-toore, la y sak n na n mong y meng bũmb kẽere. La seka modgre, bala wata ne bark ka tɛka. Lisgã tõe n fãaga yãmba. Leb n kɩtdame tɩ y paam sũur-kaset sẽn yaa fasɩ Wẽnnaam taoore. Y sã n wa reegd lisgu, sẽn yɩɩd fãa, segd n yaa y sẽn nong a Zeova wã yĩnga. Segdame me tɩ y gãd bũmb nins y sẽn bãng Ba wã zugã, Biigã zugã, la vʋʋsem sõngã wɛɛngẽ wã, n tẽ rẽ ne y sũur fãa. D sẽn lebg n tẽeg woto fãa wã, rẽ yĩnga, y mii y sã n segl n saame n tõe n deeg lisg masã bɩ?

Y SẼN SEGD N MAAN NAND TƖ Y REEG LISGU

17. Sõdg-y bũmb kẽer ned sẽn segd n maan n wa tõog n deeg lisgu.

¹⁷ Y sã n tagsdame tɩ y segl n saame n tõe n deeg lisgu, dẽnd yaa vẽeneg tɩ bũmb kẽer la y zoe n maan n paam zood sõma ne a Zeova.c Biiblã zãmsgã sõnga yãmb tɩ y bãng bũmb wʋsg a Zeova ne a Zeezi zugu. Sõngame tɩ y tẽebã paam pãnga. (Ebre. 11:6) Y basa y yam fasɩ tɩ bũmb nins a Zeova sẽn pʋlem tɩ be Biiblã pʋgẽ wã na n pidsame. Y kɩsa sɩd zãng me tɩ y sẽn tẽed a Zeezi maoongã, y tõe n paama y meng ne yel-wẽnã la kũumã. Y zoe n teka yam n kos y yel-wẽnã sugri, rat n yeel tɩ y sũur sãama ne yel-kɛg nins y sẽn da maan pĩndã, tɩ y kot a Zeova t’a kõ-y sugri. Y basa y pĩnd tʋʋmã, rat n yeel tɩ y toeema y sẽn vɩ to-to wã fasɩ, n sɩng masã n maand bũmb nins sẽn noom Wẽnnaamã. (Tʋʋ. 3:19) Y rata ne y sũur fãa n togs nebã bũmb nins y sẽn tẽedã. Y lebga koe-moond sẽn nan pa reeg lisgu, n naagd tigingã nebã n moond koɛɛgã. (Mat. 24:14) A Zeova sũur nooma ne-yã, y sẽn zoe n maan woto fãa wã. Y noogda a Zeova sũur hal wʋsgo.—Yel. 27:11.

18. Bõe me la y segd n maan n wa tõog n deeg lisgu?

¹⁸ Nand tɩ y reeg lisgu, bũmb a taab me la y segd n maane. Wa d sẽn zoe n yeelã, y segd n dɩka y meng n kõ Wẽnnaam. Pelg-y y pʋg n pʋʋs-a, n pʋlm-a tɩ y na n maana a raabã y vɩɩmã tõre. (1 Pɩy. 4:2) Rẽ poor bɩ y togs kãsem-dãmbã sull yel-gɛtã tɩ y rat n deega lisgu. A na n kosa kãsem-dãmb a wãn tɩ b wa sõs ne-yã. Ra maan-y yɩɩre, y sẽn segd n sõs ne-bã yĩng ye. Bala, yaa y tẽed-n-taas sẽn zoe n mi yãmb la b nong-y wʋsgo. B na n goma bũmb kẽer yãmb sẽn bãng Biiblã zãmsg pʋgẽ wã yelle. Yaa sẽn na n ges y sã n wʋmda Biiblã sẽn yetã võore, la y sã n mii rɩk f meng n kõ a Zeova wã yõodo, la lisgã reegrã me yõodo. B sã n mik tɩ y sɩd segl n saame n tõe n deeg lisgu, b na n togs-y lame tɩ tigis-kãseng ning sẽn na n pʋglã, y tõe n deega lisgu.

Y SẼN SEGD N MAAN LISGÃ REEGR POORE

19-20. Lisgã reegr poore, bõe la y segd n maane, la bõe n na n sõng-yã?

¹⁹ La lisgã reegr poore, bõe la y segd n maane?d Tẽeg-y tɩ y sẽn dɩk y meng n kõ a Zeova wã, y pʋlm-a-la bũmbu, t’a rat tɩ y pidsi. Rẽnd y lisgã poore, y segd n maana wa y sẽn pʋlmã. Bõe n na n sõng-y tɩ y pids y pʋlengã?

²⁰ Kell-y n tall-y zood sõma ne y tigingã neba. Y sẽn deeg lisg n lebg kiris-nedã, yãmb ne “saam-biisã fãa” naaga taab n yaa a Zeova nin-buiidu. (1 Pɩy. 2:17) Yãmb ne y tigingã neb lebga wa zak a ye neba. Y sã n kẽnd tigissã n pa vaandẽ, y zoodã ne tigingã nebã na n paama pãnga. Karemd-y Wẽnnaam Gomdã daar fãa, la y bʋgsd a goamã zugu. (Yɩɩn. 1:1, 2) Y sã n karem bũmb Biiblã pʋgẽ bɩ y bao sẽk n bʋgs y sẽn karmã zug neere. Rẽ, goamã na n kẽe y sũurã. ‘Pʋʋsd-y wakat fãa.’ (Mat. 26:41) Y sã n pelgd y pʋg n pʋʋsd a Zeova wakat fãa, yãmb ne yẽ zoodã pãng na n paasdame. ‘Rengd-y n baood-y Wẽnnaam Rĩungã.’ (Mat. 6:33) Y sã n lʋɩɩsd koe-moonegã taoor y vɩɩmã pʋgẽ, yaa Wẽnnaam Rĩungã la y rengd n baoodẽ. Y sã n yit n moond koɛɛgã, y tẽebã na n kell n talla pãnga. Rẽ me, tõe tɩ y paam n sõng neb a taab tɩ b wa paam n vɩɩmd wakat sẽn kõn sa.—1 Tɩm. 4:16.

21. Y sã n deeg lisgu, bõe la y na n paame?

²¹ Bũmb kae y sẽn tõe n yãk yam n maan y vɩɩmã pʋgẽ, t’a yõod le ta y sẽn na n dɩk y meng n kõ a Zeova n deeg lisg ye. Yaa sɩd tɩ na n lebga tɩlɛ tɩ y sak n maan y “sẽn segd” n maanã fãa, la seka modgre. Bõe yĩnga? Bala, sẽn wa n yaa bũmb ning fãa n namsd tõnd dũni-kãngã pʋgẽ, “yaa wakat bilf yĩnga, n leb n yaa faasga.” (2 Kor. 4:17) Y sã n pʋd n deeg lisgu, y na n paamame tɩ y vɩɩmã tall bark masã menga, la y wa paam “vɩɩm hakɩɩkã.” (1 Tɩm. 6:19) Rẽ wã, bʋgs-y neer la y pʋʋs sõma, n tõog n bãng y sã n segl n saame n tõe n deeg lisgu.