Bɩ y nong taab wʋsgo!

1. No-bʋg sẽn yaa takɩ la a Zeezi kõ a karen-biisã? (Ges-y sebrã pipi neng fotã.)

YƲNG ning a Zeezi sẽn zĩnd ne a karen-biisã nand tɩ b wa yõk-a wã, a kõ-b-la noor sẽn yaa takɩ. A yeel-b lame yaa: “Nong-y taaba, wa mam sẽn nong yãmb to-to wã.” La a paas yaa: “Yãmb sã n nong taaba, nebã fãa na n bãngame tɩ yãmb yaa mam karen-biisi.”—Zã 13:34, 35.

2. Bõe yĩng tɩ d segd n modg n nong taaba?

² A Zeezi yeelame t’a karen-biis hakɩɩkã sã n nong taab ne nonglem ning yẽ sẽn tallã, rẽ n na n kɩt tɩ nebã bãng-b n bake. A gomdã yɩɩ sɩd pipi kiris-nebã wakatẽ, la rũndã-rũndã me, ket n yaa sɩda. Dẽnd segdame tɩ sẽn wa n yaa zu-loɛɛg ning fãa n kɩt tɩ yaa toog tɩ d nong taaba, bɩ d mao n tõoge.

3. Bõe yell la d na n gom sõs-kãnga pʋgẽ?

³ Ninsaal sẽn pa zems zãngã yĩnga, yaa toog ne-d tɩ d nong taab wʋsgo. Baasgo, segdame tɩ d modgd n na n dɩk Kiristã togs-n-taare. Sõs-kãnga pʋgẽ, d na n yãa nonglmã sẽn tõe n sõng-d to-to, tɩ d yɩ neb sẽn maood tɩ laafɩ zĩndi, neb sẽn pa tũusd neda, la neb sẽn deegd b taabã sõma. D na n goma d tẽed-n-taas yelle. B tõog n kell n nonga taab wʋsgo, baa ne yɛl kẽer sẽn kɩt tɩ ra yaa toogã. Sõsgã sasa, yɩta sõma tɩ ned fãa sok a meng yaa: Yam-bʋg la m tõe n dɩk b kibayã pʋgẽ?

D YƖ NEB SẼN MAOOD TƖ LAAFƖ ZĨNDI

4. Wa Matiye 5:23, 24 sẽn wilgdã, d saam-biig sũur sã n sãam ne-do, bõe yĩng tɩ d segd n mao tɩ laafɩ le zĩndi?

⁴ A Zeezi wilgame tɩ d saam-biig sũur sã n sãam ne-do, segdame tɩ d mao tɩ laafɩ le zĩndi. (Karm-y Matiye 5:23, 24.) A wilga vẽeneg tɩ d sã n dat tɩ Wẽnnaam sũur noom ne-do, segdame tɩ d kell n tall zood sõma ne d taabã. D sã n maand d sẽn tõe fãa sẽn na yɩl tɩ laafɩ zĩnd d sʋka, a Zeova sũur yaa noogo. D sã n tar sũ-kẽk ne d to, n pa mamsd meng n na n bao laafɩ, a Zeova sũur pa noom ne bũmb nins d sẽn maand n kõt-a tũudmã pʋgẽ wã ye.—1 Zã 4:20.

5. Bõe n kɩt tɩ yɩ toog ne d saam-biig a ye t’a tõog tɩ laafɩ le zĩnd yẽ ne saam-biig a to sʋka?

⁵ Wakat ninga, d tõe n getame tɩ yaa toog tɩ d tõog tɩ laafɩ le zĩndi. Bõe yĩnga? Ad saam-biig a ye kibar sẽn wilgd rẽ. A yʋʋr la a Marke.b Saam-biig n da sa n wɩd-a ne tigingã neba, n gom a yell wẽng hal tɩ sãam a sũur wʋsgo. A Mark manesem yɩɩ wãna? Ad a sẽn yeele: “M pa tõog n meng ye. M sũurã yikame tɩ m gom-a põaasa.” A Mark wa n maanda a bãngẽ ne manesem ning yẽ sẽn tallã, t’a mak n na n kos saam-biigã sugr sẽn na yɩl tɩ laafɩ le zĩndi. La saam-biigã pa sak ye. Rẽ poore, a Mark ra yeta a meng yaa: ‘A sẽn pa rat tɩ laafɩ le zĩndã, bõe yĩng tɩ m na n ket n modgdẽ?’ La b tigims sull yel-gɛtã sagl-a lame t’a ra koms raood n bas ye. Bõe la a Mark maan-yã?

6. a) Bõe la a Mark kell n maan sẽn na yɩl tɩ laafɩ le zĩnd yẽ ne a saam-biigã sʋka? b) Wãn to la a Mark tũ Kolos rãmb 3:13, 14 sẽn yetã?

⁶ A Mark bʋgsa yẽ tagsg sẽn yaa a soab yellã zugã, n bãng t’a pa tall sik-m-menga, la t’a mi n tagsdame t’a sãoo a taabã. A sak n deegame t’a segd n toeema a manesmã. (Kol. 3:8, 9, 12) A sɩd sika a meng yɛsa, n tɩ kos saam-biigã sugri, a sẽn da tall manesem ningã yĩnga. A gʋlsa lɛtr me n kõ saam-biigã, n yeel-a t’a sũur sãama wʋsgo, la t’a ratame tɩ b le lebg zo-rãmba. A Mark tol n baoo kado-bil a sẽn tagsd tɩ na n yɩɩ saam-biigã noogo, n tɩ kõ-a. La a kell n pa sak n na n kõ sugr ye. Baa ne rẽ, a Mark kell n tũu a Zeezi noor ning sẽn yet tɩ d maand sũ-mar ne taaba, la d sakd n kõt taab sugrã. (Karm-y Kolos rãmb 3:13, 14.) D sã n maood tɩ laafɩ zĩnd tõnd ne ned sʋka, t’a soab pa rat n sake, nonglem hakɩɩkã na n sõng-d lame tɩ d kell n kõ-a sugri, la d pʋʋsd n kotẽ tɩ yellã manege.—Mat. 18:21, 22; Gal. 6:9.

7. a) A Zeezi sagla tõnd tɩ d maan bõe? b) Yel-bʋg n paam d saam-bi-poak a ye?

⁷ A Zeezi sagla tõnd tɩ d sẽn dat tɩ nebã maan tõnd bũmb ningã, bɩ tõnd me maan-b woto. A yeelame me tɩ d pa segd n nong sẽn nong-b tõndã bal ye. (Luk 6:31-33) La tigingã ned sã n gind-yã, n pa rat n pʋʋs-yã? Yaa sɩd tɩ pa bũmb sẽn wae ye. La a buud sã n paam-yã, y maanda wãna? Yel-kãnga namsa saam-bi-poak yʋʋr sẽn boond t’a Laara. Ad a sẽn yeele: “Saam-bi-poak n da yõsd maam n pa pʋʋsd-ma, tɩ m da pa wʋmd a võor ye. Ra sãamda m sũur wʋsgo, tɩ tigissã kẽnd yamleoog pa tar-m ye.” Sɩngrẽ wã, a Laara ra yeta a meng yaa: ‘Pa maam la yellã ye. Tigingã neb a taab me n pʋd n getẽ tɩ saam-bi-poakã manesmã wae n pa lebd be ye.’

8. Bõe la a Laara maan sẽn na yɩl tɩ laafɩ le zĩndi? Yam bʋg la d tõe n dɩk a kibarã pʋgẽ?

⁸ A Laara maana bũmb sẽn na yɩl tɩ laafɩ le zĩndi. A pʋʋsa a Zeova, la a yãk yam n na n tɩ gom ne saam-bi-poakã. B yẽsa yellã zugu, n wa baas n mobg taaba, tɩ ned fãa yeel tɩ saame. Ra wõnda yellã sɩd manegame. La ad a Laara sẽn yeele: “Saam-bi-poakã manesem ne maam wa n le yaa wa pĩndã. Sãama m sũur wʋsgo.” A Laara ra tagsdame tɩ yaa saam-bi-poakã sã n toeem bal la yẽ sũur tõe n yɩ noogo. La a wa n bãngame tɩ sẽn são yaa yẽ sẽn na n ket n tar manesem sẽn wilgd t’a nong-a lame, la a ‘sakd n kõt-a sugri.’ (Efɛ. 4:32–5:2) A tẽegame tɩ nonglem hakɩɩk “pa bĩngd wẽng b sẽn maan-a a sũurẽ,” la tɩ ‘baa sẽn wa n yaa a soab fãa, a pa komsd raood n base, a tẽeda bũmb fãa, a saagda manegr bũmb fãa pʋgẽ, a tõogda toog bũmb fãa pʋgẽ.’ (1 Kor. 13:5, 7) Kɩtame t’a le paam sũur pʋgẽ bãane. Tarẽ-n-tarẽ, saam-bi-poakã manesem wa n wilgdame t’a rata a zoodo. Y sã n maood tɩ laafɩ zĩnd yãmb ne y tẽed-n-taasã sʋka, la y ket n nong-ba, y tõe n basa y yam tɩ “nonglem la laafɩ Wẽnnaamã na n zĩnda ne yãmba.”—2 Kor. 13:11.

D YƖ NEB SẼN PA TŨUSD NED YE

9. Wa Tʋʋm 10:34, 35 wã sẽn wilgdã, bõe yĩng tɩ d segd n yɩ neb sẽn pa tũusd neda?

⁹ A Zeova pa tũusd ned ye. (Karm-y Tʋʋm 10:34, 35.) Tõnd me sã n pa tũusd neda, wilgdame tɩ d yaa a Zeova kamba. Wilgdame me tɩ d tũuda noor ning sẽn yet tɩ d nong d to wa d mengã. Sõngdame me tɩ laafɩ kell n zĩnd d sʋka.—Rom. 12:9, 10; Zak 2:8, 9.

10-11. Bõe la saam-bi-poak a ye maan tɩ sõng-a t’a bas tags-kɛga?

¹⁰ Neb kẽer nengẽ, yaa toog tɩ b kell n tõog n da tũusd neb ye. Saam-bi-poak a Rut kibarã wilgda rẽ. A sẽn wa n tar yʋʋm piig la zaka, pag sẽn yit tẽn-zẽng n maan a zakã rãmb wẽng wʋsgo. Yellã maana a Rut bõe? Ad a sẽn yeele: “M da kisa b tẽngã bũmb fãa. M da tagsdame tɩ b tẽngã nebã fãa yaa wa pagã, hal baa saam-biisã la saam-bi-pogsã.” Bõe n sõng a Rut t’a bas tags-kɛg a woto?

¹¹ A Rut sak n deegame t’a segd n maoo a pãng tɛka, n bas tags-kɛg a woto. A karma kibay sẽn be aniyɛɛrã pʋgẽ n gomd tẽn-kãng yelle. A yeelame: “M wõra m meng sẽn na yɩl n tall tagsa sẽn yaa sõma tẽn-kãng nebã zugu. Wakat kãng tɛka, m yãame tɩ beenẽ saam-biisã la saam-bi-pogsã tũuda a Zeova ne yẽesem. Ra lebga vẽeneg ne maam tɩ bãmb me yaa d tẽed-n-taase.” Bilf-bilfã, a Rut bãngame t’a modgrã pa segd n tek woto ye. Ad a sẽn yeele: “Sẽn yaa zĩig ning fãa la m seg tẽn-kãng saam-biis bɩ saam-bi-pogse, m maanda m sẽn tõe fãa n gom ne-b noog-noogo. M sõsda ne-b sõma, sẽn na yɩl n bãng-b paase.” Wãn to la naf-a? A yeelame: “Tarẽ-n-tarẽ, m tags-kɛgã wa n saa fasɩ.”

12. Manesem bʋg la a Saara ra tara?

¹² Neb kẽer tõe n tũusda neb n yaool n pa miẽ ye. Wala makre, a Saara ra tagsdame t’a pa tũusd neba, bala a pa get ned yĩn-kõbgo, a tarem bɩ a sẽn tʋmd tʋʋmd ning n kao a bʋʋd ye. La ad a sẽn yeele: “Bilf-bilfã, m wa n bãngame tɩ m tũusda neba.” Wãn to? B zakã rãmb fãa karem n zãagame, t’a sẽn da rat yaa a be ne neb sẽn karem n zãag wa bãmba. Daar a ye, a yeela a zoa yaa: “Mam tẽed-n-taas nins m sẽn nong n be ne wã karem n zãagame. M lakda m meng ne sẽn pa karem-b n zãagã.” Yaa vẽeneg t’a Saara segd n toeema a manesmã. Bõe n sõng-a?

13. A Saara sẽn modg n toeem a manesmã zãmsda tõnd bõe?

¹³ Tigims sull yel-gɛt n sõng a Saara t’a rems a tagsgã. A Saara yeelame: “A pẽga maam m sẽn tũud a Zeova ne m sũur fãa wã, m sẽn kõt leoor sõma tigissã sasa wã, la m sẽn mi Biiblã sõma wã. Rẽ poore, a wilga maam tɩ d minimã sã n paasdẽ, d segdame me n bɩɩsd zʋg-sõma wala sik-m-menga, nimbãan-zoeere, la d sak n deeg tɩ bũmb kẽer la d pa tõe.” A Saara tũu tigims sull yel-gɛtã saglgã. Ad a sẽn yeele: “Mam bãngame tɩ d segd n nonga nebã la d maand-b neere. Rẽ n tar yõod n yɩɩda.” Woto kɩtame t’a sẽn tagsd to-to a tẽed-n-taasã zugã toeeme. A yeelame: “M modgdame n get b zʋg-sõma wã sẽn kɩt tɩ b tar yõod a Zeova nifẽ wã.” La tõnd yẽ? D pa segd n tags tɩ d sãoo d taabã, d sẽn karem n zãag yĩng ye. D sã n “nong d saam-biisã fãa,” d pa na n tũusd neb ye.—1 Pɩy. 2:17.

D REEGD NEBÃ SÕMA, N MAAND-B NEERE

14. Sẽn zems ne Ebre-rãmb 13:16, d sã n deegd nebã sõma n maand-b neere, a Zeova tagsg yaa wãna?

¹⁴ D sã n deegd nebã sõma n maand-b neere, nooma a Zeova. (Karm-y Ebre-rãmb 13:16.) A getame tɩ rẽ naaga bũmb nins d sẽn maand n waoogd-a wã, sẽn yɩɩd fãa d sã n sõngd naong rãmbã. (Zak 1:27; 2:14-17) Rẽ n so tɩ Biiblã sagend tõnd tɩ d ‘kɩt tɩ sãamb-reegr lebg d minungu.’ (Rom. 12:13) D sã n deegd nebã sõma n maand-b neere, wilgdame tɩ b yell pak-d lame, tɩ d nong-b lame, la tɩ d rata b zoodo. D sã n bool neb tɩ d naag taab n dɩ bɩ n yũ, baa yaa bũmb bilfu, wall n sõs ne taaba, nooma a Zeova. (1 Pɩy. 4:8-10) La bũmb kẽer n tõe n kɩt tɩ woto maaneg pa yɩ nana ye.

15-16. a) Bõe n kɩt neb kẽer tagsdẽ tɩ b pa tõe n deeg ned sãando? b) Bõe n sõng a Edit t’a wa tõog n lebg ned sẽn deegd a taabã sõma?

¹⁵ D yɛlã sẽn yaa to-to wã tõe n kɩtame tɩ d pa rat n deeg ned sãand ye. Ra yaa woto ne pʋg-kõor a ye yʋʋr sẽn boond t’a Edit. Nand t’a lebg a Zeova Kaset soaba, a ra pa wae n baood nebã zĩigẽ, n da tagsdẽ tɩ rẽ n são. Sã n yaa ne yẽ, yaa neb a taabã n são, n tõe n deeg neb sãando.

¹⁶ A Edit sẽn wa n lebg a Zeova Kaset soabã, a toeema a tagsgã. A modgame n lebg ned sẽn deegd a taabã sõma. A yeelame: “D Rĩungã roog meeb sasa, kãsem-soab a ye n yeel maam tɩ pag ne a sɩd n na n wa sõng ne tʋʋmã, la a sok maam n gese m sã n na n tõog n deeg-b-la semen a yiibu. Mam tẽega a Zeova sẽn ning Sarepta pʋg-kõorã bark to-to wã yelle.” (1 Rĩm 17:12-16) A Edit sak n deega pagã ne a sɩdã sãando. Naf-a lame bɩ? Ad a sẽn yeele: “Mam sũur yɩɩ noogo, hal tɩ m sak tɩ b zĩnd ne maam kiis a yiibu, la pa semen a yiib bal ye. Wakat kãnga, d lebga zo-rãmb hakɩɩka.” Sẽn paase, a Edit paama zo-rãmb hakɩɩk tigingã pʋgẽ. Masã a lebga so-pakda, n paamd tɩ neb nins sẽn moond koɛɛgã ne-a wã wat a zakẽ wã tɩ b rɩkd maasga. A yeelame: “M sã n maand neb a taabã neere, kõt-m-la sũ-noogo. Sɩd-sɩdã, barkã m sẽn paamdã pa tõe n bãng n bilg ye.”—Ebre. 13:1, 2.

17. Bõe la a Luk ne a pagã wa n bãnge?

¹⁷ Tõe tɩ d zoe n deegda nebã sõma n maand-b neere, la d tõe n kell n modga rẽ wɛɛngẽ n paase. Wala makre, a Luk ne a pagã ra nong n deegda nebã sõma. B ra wae n boonda b roagdba, b zakã neba, b zo-rãmba, la tigims sull yel-gɛtã ne a pagã b zakẽ wã. La a Luk yeelame: “D gũus n gesame tɩ yaa neb nins d sẽn zoe n minimã bal la d wae n boondẽ.” Sẽn na yɩl tɩ ra tek nin-kãens bala, bõe la a Luk ne a pagã maan-yã?

18. Bõe la a Luk ne a pagã maan-yã, sẽn na yɩl tɩ b sãamb-reegrã ra tek b sẽn minim-b rãmbã bala?

¹⁸ A Luk ne a pagã sẽn bʋgs a Zeezi goamã zugã, b bãnga b sẽn tog n maane. A Zeezi yeelame: “Yãmb sã n nong neb nins sẽn nong yãmbã bala, yãmb segda ne keoor sɩda?” (Mat. 5:45-47) B yãame tɩ b segd n dɩka a Zeova togs-n-taare, bala a maanda nebã fãa neere. Rẽ n so tɩ b yãk yam n na n bool b tẽed-n-taas nins b sẽn zɩ n boolã. Ad a Luk sẽn yeele: “D sã n wa be ne taaba, d fãa sũur noomame. Kɩtdame tɩ d zoodã paasdẽ. Leb n paasda tõnd ne a Zeova zoodã.”

19. Bõe la d tõe n maan tɩ wilg tɩ d sɩd yaa a Zeezi karen-biisi? La bõe la yãmb yãk yam n na n maane?

¹⁹ Sõs-kãngã pʋgẽ, d yãame tɩ d sã n nong d taabã, kɩtdame tɩ d yaa neb sẽn modgd tɩ laafɩ be d sʋka, neb sẽn pa tũusd neda, la neb sẽn deegd b taabã sõma. D segd n basa tags-kɛg buud fãa, la d nong d tẽed-n-taasã ne d sũur fãa. D sã n maan woto, d na n paama sũ-noogo. Leb n na n wilgame tɩ d sɩd yaa a Zeezi karen-biisi.—Zã 13:17, 35.