“Bɩ y kolg Wẽnnaam, la bãmb me na kolg yãmba.”—Zak 4:8.

Wẽnnaam kelgda d pʋʋsgã bɩ?

Yãmb zoe n soka y meng n ges Wẽnnaam sã n kelgda yãmba, y sã n wa pʋʋsdẽ fãa bɩ? Sã n yaa rẽ, bãng-y tɩ y pa y yembr ye. Neb wʋsg pʋʋsda b zu-loees kẽer yĩnga, tɩ zu-loeesã yaool n ketẽ. Woto rat n yeelame tɩ Wẽnnaam pa kelgd d pʋʋsgã bɩ? Ayo! Biiblã yeta vẽeneg tɩ d sã n pʋʋs Wẽnnaam wa sẽn segde, a kelgd-d lame. Bɩ d maneg n ges Biiblã sẽn yetã.

WẼNNAAM KELGDAME.

“Yãmb a Soab ning sẽn wʋmd pʋʋsgã, neb buud fãa na n waa yãmb nengẽ.” —Yɩɩn-sõamyã 65:3.

Neb kẽer yetame tɩ b sẽn pʋʋsdã, yaa tɩ sõngd-b lame tɩ b yam gãe bãane, baa ne b sẽn pa tẽed tɩ Wẽnnaam kelgd-b lame wã. La pʋʋsgã yaool n pa bũmb sẽn sõngd-d tɩ d yam gãe bãane, tɩ d tõe n mao ne d zu-loeesã bal ye. Biiblã wilgda vẽeneg t’a Zeovaa “pẽe ne neb nins sẽn boond bãmbã, b pẽe neb nins sẽn boond bãmb ne sɩdã. . . . B sã n bool-b n kos sõngre, bãmb wʋmdame n wa sõng-ba.”—Yɩɩn-sõamyã 145:18, 19.

D tõe n basa d yam tɩ Wẽnnaam a Zeova kelgda sẽn tũud-b yẽ wã pʋʋsgo. A sẽn nong-dã yĩnga, a yeta tõnd yaa: “Yãmb na n boola maam la y pʋʋs maam, la m na n leok-y lame.”—Zeremi 29:12.

**WẼNNAAM RATAME TƖ Y PƲƲSD-A.**

Ba sẽn zĩ a bi-pugl sɛɛgẽ, t’a reemd ne reem-teedo.

“Wɩng-y ne pʋʋsgo.”—Rom dãmbã 12:12.

Biiblã yetame tɩ d “pʋʋsd wakat fãa,” la d “pʋʋsd sasa buud fãa.”—Matiye 26:41; Efɛɛz rãmbã 6:18.

Bõe yĩng tɩ Wẽnnaam rat tɩ d pʋʋsd-a? D rɩk makre: Biig sã n kos a baaba sõngre, a ba wã sũur yaa noogo. Yaa sɩd tɩ ba wã zoe n mii a biigã sẽn date, la a sã n wʋm a biigã sẽn kot-a sõngrã, a bãngdame tɩ biigã teeg-a lame, la t’a tõe n kolg-a-la nana-nana. Woto me, d sã n pʋʋsd Wẽnnaam a Zeova, d wilgd-a lame tɩ d teeg-a lame, la tɩ d rat n kolg-a lame.—Yel-bũnã 15:8; Zak 4:8.

**WẼNNAAM SƖD GETA YÃMB YELLE.**

Rao sũur sẽn sãame, t’a zĩ ro-kẽeng rʋʋds zugu. A biru wã teed sẽn be kagtõ pʋgẽ n dɩg a sɛɛgẽ.

“Sik-y y yɩɩrã fãa n bas ne bãmba, bala bãmb geta yãmb yelle.”—1 Pɩyɛɛr 5:7.

Wẽnnaam ratame tɩ y pʋʋs-a, bala a nonga yãmba, la a get yãmb yelle. Wẽnnaam mii d zu-loeesã la d yɩɩrã, n dat n sõng tõndo.

Rĩm a Davɩɩd vɩɩmã tõre, a pʋʋsa a Zeova n kos sõngre, la a togs-a a sẽn da tagsde. (Yɩɩn-sõamyã 23:1-6) Wẽnnaam ra geta a Davɩɩd wãn to? A ra nonga a Davɩɩd wʋsgo, la a kelg a pʋʋsgã fãa a sẽn pʋʋs-a naoor wʋsgã. (Tʋʋma 13:22) Woto me, Wẽnnaam kelgda d pʋʋsgã, a sẽn get d yellã yĩnga.

‘MAM NONGA A ZEOVA, BALA A WƲMDA M KOƐƐGÃ’

Yaa woto la yɩɩn-gʋlsd a ye yeel-yã, tɩ be Biiblã pʋgẽ. A ra kɩsa sɩd tɩ Wẽnnaam kelgda a pʋʋsgã, la woto sɩd sõng-a-la wʋsgo. A ra getame t’a maneg n paama Wẽnnaam zoodo, la t’a ra paamda pãng n tõe n mao ne zu-loeesã la toogã.—Yɩɩn-sõamyã 116:1-9.

D sã n mi vẽeneg tɩ Wẽnnaam sɩd kelgda d pʋʋsgã, d na n kell n pʋʋsd-a-la wakat fãa. Ad rao a ye kibare. A bee Ɛspayn t’a yʋʋr boondẽ t’a Pedro. A bi-ribl sẽn tar yʋʋm 19 n maan agsɩdã tɩ tũ ne a yõore. A Pedro sũurã ra sãama hal wʋsgo. La a pelga a pʋg n pʋʋs Wẽnnaam n yɩlme, n kos sõngr la belsgo. Baasa wãna? A yeelame: “A Zeova tũnuga ne d tẽed-n-taasã n bels maam ne m pagã la a sõng-do, tɩ wilg t’a leoka m pʋʋsgã.”

Rao pag sẽn maan kaalem t’a zãad foto, t’a zo-rãmb belsd-a. — Naoor wʋsgo, Wẽnnaam tũnugda ne d zo-rãmbã n sõng tõnd la a bels-do, tɩ wilg t’a leoka d pʋʋsgo

Baa ne pʋʋsgã sẽn pa kɩt t’a Pedro biigã vʋʋgã, sõnga yẽ ne a zakã rãmb wʋsgo. A pag a Mariya Kaarmen yeelame: “Pʋʋsgã sõng-m lame tɩ m mao ne m toogã. Mam bãngame t’a Zeova ra kelgda maam, bala m sã n da pʋʋs-a fãa, m paamda sũur pʋgẽ bãane, tɩ m yam me ra gãe.”

Biiblã la bũmb ning neb wʋsg sẽn yã b vɩɩmã pʋgẽ wã wilgda vẽeneg tɩ Wẽnnaam kelgda d pʋʋsgã. La yaa vẽeneg tɩ Wẽnnaam pa leokd pʋʋsg fãa ye. Bõe yĩng tɩ Wẽnnaam leokd pʋʋsg kẽer la a pa leokd sãnda?

a Zeova wã yaa Wẽnnaam yʋ-peelle.—Yɩɩn-sõamyã 83:18, Traduction du monde nouveau.