Bõe yĩng tɩ pa pʋʋsg fãa la Wẽnnaam leokda?

D sã n pelgd d pʋg n pʋʋsd Wẽnnaam a Zeova sẽn yaa d saasẽ Ba wã, a na n dat n kelg-d-la ne a sũur fãa. La bũmb kẽer n tõe n kɩt t’a pa leok d pʋʋsg ye. Yaa bõe ne bõe, la bõe yell la d segd n tẽege, d sã n wa pʋʋsdẽ? Ad bũmb kẽer Biiblã sẽn yete.

Egiliiz neb sẽn get pʋʋsg sebr pʋgẽ n karemd b pʋʋsgã.

“Fo sã n wa pʋʋsdẽ, bɩ f ra togsd goam n yɩlemdẽ” ye.—Matiye 6:7.

A Zeova pa rat tɩ d pʋʋsgã yɩ goam d sẽn dɩk ne zug ye. A pa rat me tɩ d karem d pʋʋsg sebr pʋgẽ ye. A sẽn dat yaa d togs-a sẽn be d sũurẽ. Tags-y n ges-y wala yãmb zoa sẽn na n togsd yãmb gom-yɛng n yɩlemd beoog sẽn vẽeg fãa. Sãmbg kae tɩ pa na n yɩ-y noog ye. Zo-rãmb hakɩɩk pelgda b pʋs n gomd ne taaba. D sã n pelgd d pʋg n pʋʋsd Wẽnnaam, wilgdame tɩ d togsda d saasẽ Ba wã bũmb sẽn yit d sũurẽ.

Rao sẽn nak a neng n get yĩngr n bas n pẽegd lotori sebre.

“Yãmb sã n kos me, y pa paamd ye. Bala yãmb kota ne raab sẽn yaa wẽnga.”—Zak 4:3.

Yaa vẽeneg tɩ d pa na n gũudẽ tɩ Wẽnnaam leok d pʋʋsgo, sã n mikame tɩ d sẽn kos-a wã yaa bũmb a sẽn pa rat tɩ d maane, wall d paam ye. Wala makre, ned sã n tão lotori, n kos a Zeova t’a sõng-a t’a paam zu-noog n dɩ, rẽ yĩnga a Zeova na n leok-a lame sɩda? A Zeova yaool n wilga vẽeneg tɩ d zãag d mens ne rat tɩ looge, la nebã sẽn tẽed tɩ bũmb kẽer wata ne zu-noogo, sẽn yaa tẽeb ziri wã. (Ezayi 65:11, Sebr Sõngo; Luk 12:15) D sã n dat t’a Zeova leok pʋʋsg a woto, pa zems ye. Sẽn na yɩl t’a leok d pʋʋsgo, yaa tɩlɛ tɩ d sẽn kos bũmb ningã zems ne a sẽn yet tõnd bũmb ning Biiblã pʋgẽ wã.

Tũudum taoor soab sẽn pʋʋsd sodaas yĩnga.

“Ned sã n yẽd a tʋb n ka rat n kelg zãmsgo, a pʋʋsgã meng yaa yel-beedo.”—Yel-bũnã 28:9.

Pĩnd wẽndẽ wã, Wẽnnaam ra pa kelgd neb nins sẽn kɩɩsd a noyã pʋʋsg ye. (Ezayi 1:15, 16) Ket n yaa woto me rũndã-rũndã. (Malasɩ 3:6) D sã n dat tɩ Wẽnnaam leok d pʋʋsgã, yaa tɩlɛ tɩ d maan d sẽn tõe fãa n tũud a noyã. La sã n mikame tɩ d tʋma tʋʋm-wẽns pĩndã? Rat n yeelame tɩ Wẽnnaam pa tar daar n kelgd-d bɩ? Ayo! D sã n tek yam n kos sugri, la d maand d sẽn tõe fãa n na n ta a yam, a na n kõ-d-la sugri.—Tʋʋma 3:19.

“Ned ning fãa sẽn kolgd Wẽnnaam tog n tẽeme tɩ bãmb beeme, la tɩ b lebgda neb nins sẽn baood bãmb ne b sũy fãa wã roanda.”—Ebre-rãmbã 11:6.

Pa segd tɩ d sã n wa pʋʋsdẽ fãa bɩ yɩ d sẽn dat bal tɩ d yam gãand yĩng ye. D tũnugda ne pʋʋsgã n wilgd Wẽnnaam tɩ d tẽed-a lame, leb n naaga bũmb nins d sẽn maand n wilgdẽ tɩ d waoogd-a lame wã. A Zeezi karen-biig a Zak yeelame tɩ ned sã n pa “kell n kos ne tẽebo, . . . bɩ nin-kãng ra tags t’a na n paama bũmb a Zeova nengẽ ye.” (Zak 1:6, 7) Sẽn na yɩl n maneg n tẽ Wẽnnaam, d segd n modgame la d baood sẽk n zãmsd Biiblã, n paam n bãng Wẽnnaam sõma. D sã n maand woto, d na n bãnga a raabã sẽn yaa a soaba. D leb n na n basa d yam t’a na n kelga d pʋʋsg fãa.