Wãn to la y tõe n pʋʋs tɩ Wẽnnaam sak n kelg-yã?

PƲƲSD-Y A ZEOVA NE A ZEEZI YƲƲRÃ MAASEM

“Bũmb ning fãa yãmb sẽn kos Ba wã, b na n kõo yãmb rẽ mam yʋʋrã yĩnga.”—Zã 16:23.

A Zeezi sẽn yeel bũmb ningã wilgdame t’a Zeova ratame tɩ d sã n na n pʋʋs-a bɩ ra yɩ ne imaaz-rãmba, nin-sõmse, malɛgse, wall ne yaab-rãmbã maasem ye. Segd n yɩɩ ne a Zeezi Kirist yʋʋrã maasem. Woto, d wilgdame tɩ d miime tɩ Wẽnnaam sẽn kelgd d pʋʋsgã yaa a Zeezi sẽn maan bũmb ning n kõ-dã yĩnga. A Zeezi yeelame: “Ned baa a ye pa wat Ba wã nengẽ tɩ pa mam maasem yĩng ye.”—Zã 14:6.

GOMD-Y GOAM SẼN YIT Y SŨURẼ

‘Pelg-y y pʋs Wẽnnaam taoore!’—Yɩɩn-sõamyã 62:9.

D sã n wa pʋʋsd a Zeova, d segd n goma ne-a wa biig sẽn gomd ne a ba sẽn nong-a. D sã n wa pʋʋsdẽ, d pa segd n karemd pʋʋsgã sebr pʋgẽ, bɩ n togsd goam d sẽn dɩk ne zug ye. D segd n goma ne-a ne waoogre, la yɩ ne goam sẽn yit d sũurẽ.

PƲƲSD-Y TƖ ZEMSD NE WẼNNAAM DAABÃ

“Sẽn wa n yaa bũmb ning fãa la d kos bãmb tɩ zems b raabã, b kelgda tõndo.”—1 Zã 5:14.

Wẽnnaam a Zeova togsa a sẽn na n maan bũmb ning n kõ tõndo, la a sẽn dat tɩ tõnd me maan bũmb ning n kõ-a wã tɩ be Biiblã pʋgẽ. D sã n dat tɩ Wẽnnaam sak n kelg d pʋʋsgã, d segd n pʋʋsdame tɩ ‘zemsd ne a raabã.’ Sẽn na yɩl n tõog n maan dẽ, d segd n zãmsda Biiblã n tõog n bãng Wẽnnaam sõma. D sã n maan woto, d pʋʋsgã na n tata a yam.

BÕE YELL LA D TÕE N GOM D PƲƲSG PƲGẼ?

Pʋʋs-y n kos-y bũmb nins sẽn yaa tɩlɛ ne-yã: D tõe n pʋʋsa Wẽnnaam n kos bũmb nins sẽn yaa tɩlɛ ne-d daar fãa wã. Wala makre, rɩɩbo, futu, la gãag zĩiga. D leb n tõe n pʋʋs n kosa yam, sẽn na yɩl n bãngd n yãkd yam tɩ zemsdẽ, la d kos pãng me n tõog n mao ne d zu-loeesã. D tõe n pʋʋs n kosa tẽebo, d yel-wẽnã sugri, la Wẽnnaam sõngre.—Luk 11:3, 4, 13; Zak 1:5, 17.

Pʋʋs-y neb a taabã yĩnga: Roagdb sẽn nong b kamb sũy noomame, b kambã sã n nong taaba. A Zeova me ratame tɩ tõnd sẽn yaa a kambã nong taaba, la d get taab yelle. Zemsame tɩ d pʋʋs d pagã bɩ d sɩdã yĩnga, d zakã neba, d kambã la d zo-rãmbã me yĩnga. A Zeezi karen-biig a Zak yeelame tɩ d “pʋʋsd taab yĩnga.”—Zak 5:16.

Wilg-y Wẽnnaam tɩ y yaa sõm-mita: Biiblã goma d Naandã yell n yeel yaa: “B maana neer n kõt yãmb saag sẽn yit saasẽ la bõn-bɩʋʋng wakate, n kɩtdẽ tɩ rɩɩb sekd yãmb la b pidsd yãmb sũyã ne sũ-noogo.” (Tʋʋma 14:17) D sã n tags bõn-sõma nins fãa Wẽnnaam sẽn maan n kõ-dã yelle, na n kɩtame tɩ d wilg-a d pʋʋsgã pʋgẽ tɩ d yaa sõm-mitba. Sẽn paase, d segd n modgame tɩ d sẽn vɩ to-to wã wilg tɩ d yaa sõm-mitba.—Kolos rãmbã 3:15.

TALL-Y SŨ-MARE, LA Y KET N PƲƲSDẼ

Wakat ninga, d sũur tõe n sãamame, d sã n pelg d pʋg n pʋʋs Wẽnnaam, n yaool n pa paam d pʋʋsgã leoor tao-tao. Woto rat n yeelame tɩ Wẽnnaam toor kae ne-d bɩ? A bada! D ges neb kẽer kibaya, sẽn wilgd tɩ sã n wa yaa woto, d segdame bal n ket n pʋʋsdẽ.

A Stiiv, rao ning yell d sẽn gom pipi sõsgã pʋgẽ wã yeelame: “Sã n da pa pʋʋsgã yĩnga, woto tɩ m komsa raood hal daar zãra, n pa le tẽed manegr ye.” Bõe n sõng-a? A sɩnga Biiblã zãmsgo, n bãng tɩ yaa tɩlɛ t’a pʋʋsdẽ, la a ket n pʋʋsdẽ n pa basdẽ ye. A paasame: “Mam pʋʋsgã pʋgẽ, m pʋʋsa Wẽnnaam barka, a sẽn tũnug ne m zo-rãmbã n sõng maam tɩ wilg t’a sɩd nong-m lame wã yĩnga. Masã, m tara sũ-noog n yɩɩd pĩndã.”

La yɩɩ wãn to ne a Zeni, pag ning sẽn da tagsd t’a ka võore, la tɩ pa tar daar tɩ Wẽnnaam kelg a pʋʋsgã? Ad a sẽn yeele: “Mam sẽn da wa n tagsdẽ tɩ m ka võor baa bilfã, mam pʋʋsa Wẽnnaam n kos-a t’a sõng-m tɩ m bãng bũmb ning sẽn kɩt tɩ m tagsd woto wã.” Wãn to la rẽ sõng-a? A yeelame: “Mam sẽn pʋʋsd Wẽnnaamã, sõnga maam tɩ m get m meng wa a sẽn get maam to-to wã, n bãng tɩ baa mam sũurã sã n ningd-m taale, Wẽnnaam yẽ pa ningd-m taal ye. Leb n sõnga maam tɩ m kell n modge, n da koms raood n bas ye.” Baasa wãna? A yeelame: “Pʋʋsgã sõnga maam tɩ m bãng t’a Zeova sɩd beeme, t’a yaa m Ba, m zoa, la Wẽnnaam sẽn nong-m la a get m yelle, la t’a na n sõng-m-la wakat fãa, m sã n ket n modgd n maand a raabã.”

D gom a Izabɛll me yelle. A sẽn wa n tar pʋgã, logtoɛɛmbã yeel-a lame tɩ biig ning a sẽn na n dogã na n yɩɩ koamsa. A sũurã sãama wʋsgo. Neb n pʋd n sagl-a t’a yiis pʋgã. A yeelame: “M sũ-sãangã sẽn da yaa wʋsgã, kɩtame tɩ ra yaa wa m na n kiime.” Bõe la a maan-yã? A yeelame: “Mam pʋʋsa Wẽnnaam naoor ka tɛk n kos sõngre.” A Izabɛll wa n doga bi-ribla, n pʋd a yʋʋr t’a Zeraare. A sɩd ra yaa koamsa. La rẽ yĩnga a Izabɛll tagsame tɩ Wẽnnaam leoka a pʋʋsgã bɩ? N-ye. Wãn to? Ad a sẽn yeele: “Mam sã n get m biigã sẽn tar yʋʋm 14 masã wã sẽn tar sũ-noog baa ne a komslmã, m bãngda vẽeneg tɩ Wẽnnaam sɩd leoka m pʋʋsgã. M biigã sɩd yaa kũun-kãseng Wẽnnaam a Zeova sẽn kõ-ma.”

Kiba-kãensã sẽn kẽed sũurã kɩtdame tɩ d tags yɩɩn-gʋlsdã sẽn yeel bũmb ningã yelle. A yeelame: “Sẽn-Ka-Saabo, yãmb wʋmda nimbãan-dãmbã ratem! Yãmb kengda bãmb pelse, la y kɩllda y tʋbr n kelgd-ba.” (Yɩɩn-sõamyã 10:17) Woto fãa yaa kaset tɩ d segd n ket n pʋʋsda Wẽnnaam n pa basdẽ ye.

A Zeezi pʋʋsg wʋsg n be Biiblã pʋgẽ. Yaa pʋʋsg ning a sẽn zãms a karen-biisã la nebã mi n yɩɩda. Pʋʋs-kãng sõngda tõnd tɩ d bãng bõe?