Pʋʋsgã sẽn tõe n sõng-y to-to

A Pamela yeelame: “Mam sẽn wa n tɩpd m kãnsɛɛrã, m da maanda rabeem wʋsgo. La m sẽn pʋʋs Wẽnnaam a Zeova wã, mam yamã gãanda bãane, tɩ m paam raood n tõe n mao ne m bãagã. Mam ket n tara toogo, la pʋʋsgã sõngda maam tɩ m pa komsd raood ye. Neba sã n sok maam n gese m yĩns maana a wãna, mam leokdame yaa: ‘Pa são ye, la m yam gãee bãane.’”

D pa segd n gũ tɩ yɛl sẽn tõe n tũ ne d yõor wa tɩ d yaool n pʋʋs ye. D fãa paamda zu-loeese, bõones la kɛgemse, tɩ kɩt tɩ d mi n dat sõngr wakat ning n tõog n kell n mao. Pʋʋsgã tõe n sõnga tõnd bɩ?

Biiblã yetame: “Bas f yell ne Sẽn-Ka-Saabo, la bãmb na n kõo foom bũmb ning f sẽn date. Bãmb kõn tol n bas nin-tɩrg t’a miim ye.” (Yɩɩn-sõamyã 55:23) Ad sɩd yaa vɛrse sẽn kengd raoodo! La wãn to la pʋʋsgã tõe n sõng-yã? Y sã n pʋʋs a Zeova wa sẽn segdã, a na n kõ-y-la bũmb ning sẽn na n sõng-y tɩ y tõog n mao ne y zu-loeesã. Ges-y zĩ-gũbr ning sẽn yet tɩ: “Pʋʋsgã sẽn tõe n naf-y to-to.”