Wilg-y tɩ y yaa maan-neer soaba

PAG a ye yʋʋr sẽn boond t’a Lizaa yeelame: “Kiris-nebã sẽn maand taab neerã n da noom maam n tɩ yɩɩda.” A ra gomda bũmb ning sẽn kɩt t’a wa lebg a Zeova Kaset soabã yelle. Yɩɩ woto me ne pag a ye yʋʋr sẽn boond t’a Ann. Ad a sẽn yeele: “Yaa a Zeova Kaset rãmbã sẽn maand taab neerã n kɩt tɩ m sak sɩdã, n yɩɩd b sẽn da zãmsd-m bũmb ningã.” Rũndã-rundã, saam-bi-pog-kãensã nong n zãmsda Biiblã la b bʋgsd a zugu. La yaa b tẽed-n-taasã maan-neerã n sõng-b n yɩɩd tɩ b lebg a Zeova Kaset rãmba.

Wãn to la d tõe n maan neb a taabã neer tɩ keng b raoodo? Bɩ d ges d sẽn tõe n maan rẽ to-to ne d no-goamã la ne d tʋʋm-tʋmdɩ wã. Rẽ poore, d na n yãa neb nins d sẽn segd n maan neere.

WILG-Y NE Y NO-GOAMÃ TƖ Y MAANDA Y TAABÃ NEERE

Yel-bũn sak 31 wã pʋgẽ, b goma pʋg-sõng yelle, n yeel tɩ “sõmblem tõog” bɩ maan-neer tõog bee a zɩlemdã zugu. (Yel. 31:26, MN) A sẽn yet bũmb ninsã la a sẽn yet rẽ to-to wã wilgdame t’a yaa maan-neer soaba. Ba rãmbã me segd n maanda woto. Roagdb wʋsg bãngame tɩ b sã n gomd gãs-gãs ne b kambã, tõe n sãama kambã sũy, la pʋd n pa womd bi-sõma ye. Dẽnd roagdbã sã n dat tɩ b kambã yɩ sakdba, b segd n modg n gomd-b-la ne bʋgsem.

Y yaa roagd tɩ y pa roagd me, bõe n tõe n sõng-y tɩ y wa tõog n gomd ne bʋgsem? Yel-bũn 31:26 sɩngrã wilgda y sẽn tõe n maane. Be b yetame yaa: “Yẽnda gomda yam goamã.” Woto rat n yeelame tɩ d segd n bao n yãka d gom-biisã tɩ zemse, la d gomd ne bʋgsem. D tõe n mi n soka d meng yaa: ‘Mam sẽn dat n yeel bũmb ningã yikda sũur bɩ, bɩ sigsda sũuri?’ (Yel. 15:1) Yɩta sõma tɩ d deng n tags n yaool n gome.

Yel-bũnd a to pʋgẽ, b yeelame yaa: “Gom-to-ned goam pogenda wa zabr sʋʋga.” (Yel-bũnã 12:18) D sã n deng n tags n ges d goamã sã n na n namsa d kɛlgdbã wall n naf-ba, na n sõng-d lame tɩ d gũus ne d sẽn gomd to-to wã. D sã n nong n gomd ne bʋgsem, na n sõng-d lame tɩ d zãag d meng ne goam sẽn sãamd sũuri, la gom-kãse. (Efɛ. 4:31, 32) Na n kɩtame tɩ d bas tags-kɛg la gom-beedo, la d gomd ne bʋgsem, la goam sẽn kengd raoodo. A Zeova kõo tõnd mak-sõng rẽ wɛɛngẽ, a sẽn wa n gomd ne a no-rɛɛs a Eli n kengd a raoodã. Malɛk ning a Zeova sẽn tʋmã goma ne a Eli ne koe-bʋgsem. (1 Rĩm. 19:12) Maan-neerã pa f sẽn na n gomd ne bʋgsem bal ye. D segdame me n maand d taabã neere. Wãn to?

D SÃ N MAAND D TAABÃ NEERE, KENGDA B RAOODO

D sã n gomd ne bʋgsem la d maand d taabã neere, d rɩkda a Zeova togs-n-taare. (Efɛ. 4:32; 5:1, 2) Saam-bi-poak a Liza ning yell d sẽn gom tɩ loogã goma a Zeova Kaset rãmbã maan-neerã yell n yeel yaa: “Sẽn wa n lebg tɩlɛ tɩ d zakã rãmb yik n kẽng zĩig a to wã, tigingã saam-biis a yiib ne b pagb n kos sor b tʋʋmã zĩigẽ n na n wa sõng tõnd n sag d teedã. Wakat kãng tɩ m da nan pa sɩng Biiblã zãmsg ne a Zeova Kaset rãmbã ye.” Maan-neer a woto n sõng a Liza t’a wa sak n sɩng Biiblã zãmsgo.

Saam-bi-poak a Ann ning yell d sẽn gom tɩ loogã me sũur yɩɩ noogo, a Zeova Kaset rãmbã sẽn maan-a neerã yĩnga. Ad a sẽn yeele: “Duniyã sẽn lebg to-to wã kɩtame tɩ m gũusd m meng wʋsg ne nebã. Ra yaa toog tɩ m kɩs ned sɩda. M sẽn wa n seg a Zeova Kaset rambã, m da pa kɩs bãmb me sɩd ye. M da sokda m meng bõe yĩng tɩ b rat n sõng-ma? La sẽn da zãmsd-a maam Biiblã sẽn maan-m neerã kɩtame tɩ m wa kɩs-a sɩda.” Baasa wãna? A paasame yaa: “Kaoosg zugẽ, m wa n sɩngame n tagsd bũmb ning m sẽn da zãmsdã zug n tɩ yɩɩda.”

Tigingã nebã maan-neerã yɩɩ a Liza ne a Ann noog wʋsgo, tɩ b wa yãk yam n na n zãms Biiblã. Woto sõng-b lame tɩ b wa kɩs a Zeova ne a nin-buiidã sɩda.

D RƖK A ZEOVA TOGS-N-TAAR N MAAND D TAABÃ NEERE

Yaa nana ne neb kẽer tɩ b gomd noog-noogo, la b maan tɩ b nengã be laado, b sẽn wub-b to-to wã la b sẽn yit zĩig ningã yĩnga. D sã n waoogd d taabã b sẽn wub-d to-to wã yĩnga yaa sõma. La d sã n maand woto b sẽn wub-d to-to wã yĩng wall d sẽn yit zĩig ningã yĩng bala, pa wilgd tɩ d rɩkda a Zeova togs-n-taar maan-neerã wɛɛngẽ ye.—Ges-y Tʋʋm 28:2.

Maan-neerã yaa vʋʋsem sõngã bila. (Gal. 5:22, 23) Dẽnd yaa tɩlɛ tɩ d paam Wẽnnaam vʋʋsem sõngã sõngre, n tõog n bɩɩs zʋg-sõng-kãnga. D sã n maand woto, d rɩkda a Zeova ne a Zeezi togs-n-taare. Dẽnd wa a Zeezi, kiris-nebã maanda b taabã neere. Sẽn paase, yaa d sẽn nong d Wẽnnaam a Zeova la neb a taabã n kɩt tɩ d maand woto. Woto wã, d sẽn maand d taabã neer ne d sũur fãa wã, d tata Wẽnnaam yam.

ÃND DÃMB LA D SEGD N MAAN NEERE?

Yaa nana tɩ d maan ned neere, a soabã sã n zoe n maana tõnd neere, wall d sã n mii a soabã. (2 Sãm. 2:6) Bũmb a ye d sẽn tõe n maane, yaa d pʋʋs-a barka, a sẽn maan-d neerã yĩnga. (Kol. 3:15) La d sã n wa getẽ tɩ neb n be tɩ pa segd tɩ d maan b neere?

Tags-y n ges-y: A Zeova n kõt mak-sõng sẽn ka to maan-neerã wɛɛngẽ. La a Gomdã pʋgẽ, a wilga tõnd bũmb sẽn tar yõod wʋsg maan-neerã wɛɛngẽ. Biiblã babg ning b sẽn da gʋls ne gɛrkã pʋgẽ, b goma Wẽnnaam barkã bɩ a maan-neerã yell naoor wʋsgo. Wãn to la Wẽnnaam wilgd tõnd t’a yaa maan-neer soaba?

A Zeova maanda ãndũni wã gill nebã fãa neere, n kõt-b bũmb nins sẽn yaa tɩlɛ ne b vɩɩmã. (Mat. 5:45) Baa d sẽn da nan pa mi a Zeova wã, a maan-d-la neere. (Efɛ. 2:4, 5, 8) Wala makre, a kõo a sẽn da tar tɩ tar yõod n tɩ yɩɩdã, rat n yeel t’a Bi-ribl yendã, ãdem-biisã yĩnga. Tẽn-tʋmd a Poll yeelame t’a Zeova tʋma a Zeezi t’a wa ki n dol tõnd yel-wẽnã, tɩ “zems Wẽnnaam barkã sẽn yaa wʋsgã.” (Efɛ. 1:7) Sẽn paase, baa ne d sẽn maand yel-wẽn la d sãamd a Zeova sũurã, a ket n wilgd-d-la sore, la a sagend-do. A zãmsgã la a goamã yaa “wa saag sẽn niida.” (Tõo. 32:2) D pa tol n tõe n yao n dol a sẽn maan d neerã yĩng ye. Togs sɩdã, sã n da pa a Zeova maan-neerã yĩnga, d da pa na n saagdẽ tɩ beoog na n yɩɩ neer ye.—Ges-y 1 Pɩy. 1:13.

Sãmbg kae t’a Zeova maan-neerã kɩtame tɩ d maneg n nong-a la d rat n dɩk a togs-n-taare. Woto wã, d pa segd n tũus neb kẽer bal n maand-b neer ye. D segd n dɩka a Zeova togs-n-taare, n maand nebã fãa neer daar fãa. (1 Tes. 5:15) D sã n nong n maand nebã neere, d wõnda bugum waood sasa. D na n yɩɩ bark meng-meng d zakã rãmb yĩnga, d tẽed-n-taasã, d tʋmd-n-taasã, d karen-bi-taasã la d yagsã me yĩnga.

D tags d sẽn gomd ne bʋgsmã la d sẽn maand d taabã neerã sẽn nafd d zakã rãmb la d tigingã nebã to-to wã yelle. Tõe tɩ ned n be yãmb tigingã pʋgẽ, n dat tɩ b mi n sõng-a n maneg a roogo, n ges a tɩɩs yelle, bɩ n tɩ ra teed n wa kõ-a. Sẽn paase, koe-moonegã sasa y sã n seg ned sẽn dat sõngre, y tõe n maana bũmb n sõng-a.

Bɩ d rɩk a Zeova togs-n-taare, n wilgd ne d no-goamã la d tʋʋm-tʋmdɩ wã tɩ d maanda d taabã neere.