Y Tẽrame Bɩ?

Yãmb karma Gũusg Gasg nins b sẽn yiis yaoolmã sõma bɩ? Bɩ y ges y sã n tõe n leoka sogs-kãensã:

D sã n gomd a Zeova yelle, n kelgd-a la d tagsd a yelle, wãn to la na n naf-do?

Na n sõng-d lame tɩ d yam-yãkr fãa yɩ sõma, d na n paama minim n tõe n zãms nebã Biiblã sõma, d tẽebã pãng na n paasdame, la d na n maneg n nonga a Zeova.—w22.01, s.n. 30-31.

Tõnd sã n kɩs a Zeova la neb nins a sẽn yãk tɩ b lʋɩt tõnd taoorã sɩda, wãn to la na n sõng-do?

Yaa masã la d segd n kɩs sɩd n yɩɩd pĩndã t’a Zeova sẽn maand fãa yaa tɩrga, n da maand sãmb-sãmb ne kãsem-dãmbã sẽn na n yãk yam ningã, la b sẽn na n yeel tɩ d maan bũmb ningã ye. Bala to-kãsengã sasa, b tõe n kõ-d-la noy sẽn wõnd ka nenga, wall b tũub yaa toogo.—w22.02, s.n. a 4-6.

Malɛkã sẽn gom ne a Zakari “namdã sẽn be [guvɛrneer] a Zorobabɛll nugẽ wã” yellã, a ra rat n yeelame tɩ bõe? (Zaka. 4:8-10)

Malɛkã ra ratame tɩ Wẽnnaam nin-buiidã bãng tɩ baa kẽer sẽn get tɩ wẽnd-doogã pa ta a soab ning a Salomo sẽn me wã, b na n tõog n me-a lame n baase, tɩ zems ne a Zeova sẽn dat t’a yɩ to-to wã me.—w22.03, s.n. 16-17.

Wãn to la d tõe n kõ “mak-sõng no-goamã wɛɛngẽ?” (1 Tɩm. 4:12)

Yaa d sẽn na n gomd ne waoogr koe-moonegã sasa, n zẽkd d koɛɛg n yɩɩndẽ la d nong n leokd tigissã sasa, n togsd sɩd la d gomd goam sẽn kengd raoodo, la d zãagd d mens ne tʋy buud fãa.—w22.04, s.n. a 6-9.

Bõe yĩng tɩ we-rũms (goosneema-rãmb) a naasã yell b sẽn gomd Dãniyɛll sak a 7 pʋgẽ wã makd we-rũn-yɛng wa b sẽn bilg Vẽnegr 13:1, 2 pʋgẽ wã?

Vẽnegr sebrã sak 13 sẽn gomd we-rũng ning yellã pa makd goosneema-yɛng wa Rom ye. We-rũn-kãng makda dũni gill pãn-soaadbã fãa.—w22.05, s.n. a 9.

Bõe la d tõe n maan n wilg tɩ d kɩsa sɩd t’a Zeova sẽn maand fãa yaa tɩrga?

Ned sã n tʋʋs tõnd bɩ n beeg-d wall a maan bũmb n sãam d sũur hal wʋsgo, d basda taale, n pa tol n tall sũ-kẽk ne-a ye. D rɩkda d yɛlã fãa n bas ne a Zeova. A na n wa welga yɛl nins fãa yel-wẽnã sẽn wa ne wã.—w22.06, s.n. 10-11.

Bõe la saam-biig b sẽn yãk t’a na n lʋɩ taoor n pʋʋs tigsg sasa pa segd n yĩmi?

A tog n tẽegame tɩ d pa segd n tũnug ne pʋʋsg n sagl tigingã nebã, wall n taas koees ye. Sẽn yɩɩd fãa, tigissã sɩngrẽ, saam-biig ning sẽn na n pʋʋsã pa segd n ‘gom wʋsg’ ye. (Mat. 6:7)—w22.07, s.n. 24-25.

Bõe n na n paam neb nins sẽn na n ‘vʋʋg vɩɩm yĩnga,’ la neb nins sẽn na n ‘vʋʋg bʋʋd yĩngã’? (Zã 5:29)

B pa na n kao b bʋʋdã kɛgre, n tik bũmb nins b sẽn maan pĩndã n ning-b taal ye. B na n gũus n gesa b manesmã la b tʋʋm-tʋmdɩ wã sẽn yaa to-to b vʋʋgrã poore.—w22.09, s.n. 18.

Bõe la a Joseph Rutherford togs yʋʋmd 1922 bõn-bɩʋʋng kiuugã pʋgẽ tɩ kengd raoodo?

Tigis-kãseng a ye sẽn zĩnd Sedaar Põent Owayo, Etazĩni soolmẽ wã sasa, a yeelame: “Rĩmã rɩta naam masã! Yãmb yaa a koe-taasdba. Woto yĩnga, moon-y-yã, moon-y-yã, moon-y Rĩmã la a Rĩungã!”—w22.10, s.n. a 3-5.

Ezayi sak 30 wã wilgda bũmb a tãab Wẽnnaam sẽn maan n sõngd tõnd tɩ d tõogd toogo. Yaa bʋse?

Sag-kãng pʋgẽ b wilgame 1) t’a Zeova kelgda d pʋʋsgã la a leokdẽ, 2) t’a wilgd-d-la sore, la 3) t’a ningda tõnd bark masã menga, n na n le ning-d bark beoog sẽn wate.—w22.11, s.n. a 9.

Bõe yĩng tɩ d tõe n yeel tɩ goam nins sẽn be Yɩɩn-sõamyã 37:10, 11, 29 pidsa pĩnd wẽndẽ wã, n na n le pids ka la bilfu?

A Davɩɩd goamã wilgda bark nins Israyɛll nebã sẽn da paamd a Salomo naamã sasa. A Zeezi lebg n togsa vɛrse 11 wã pʋgẽ goamã, n gom arzãn sẽn wat beoog yelle. (Mat. 5:5; Luk 23:43)—w22.12, s.n. a 8-10, 14.