Segl-y y mens n sa a Zeova daarã yĩnga

1. Bõe la d segd n maan n wa paam n põs a Zeova daarã sasa?

BIIBLÃ pʋgẽ b sã n wa gomd “a Zeova daarã” yelle, yaa wakat ning a sẽn na n sãam a bɛɛbã, la a fãag a nin-buiidã yell la b gomda. Pĩnd wẽndẽ wã, wakat n zĩnd t’a Zeova sãam buud kẽere. (Eza. 13:1, 6; Eze. 13:5; Sof. 1:8) Tõnd wakatã, “a Zeova daarã” na n sɩnga ne Babilon-kãsengã sãoongo, n tɩ baas ne Armagedõ zabrã. D sã n dat n põs ‘ra-kãng’ sasa, yaa tɩlɛ tɩ d segl d mens masã tɛka. A Zeezi pa yeel tɩ d segl d mens bal “to-kãsengã” yĩng ye. A yeelame tɩ d ‘segl d mens n gũ.’—Mat. 24:21; Luk 12:40.

2. Bõe yĩng tɩ 1 Tesalonik rãmb sebrã goam tõe n naf tõndo?

² Pipi lɛtr ning tẽn-tʋmd a Poll sẽn gʋls n tool Tesalonik kiris-nebã pʋgẽ, a rɩka makr toor-toor n na n sõng-b tɩ b segl b meng n gũ a Zeova bʋ-kaoorã daar sẽn yaa ra-kãsengã. A Poll ra miime t’a Zeova daarã pa na n wa bãmb wakatẽ wã ye. (2 Tes. 2:1-3) Baa ne rẽ, a sagla a tẽed-n-taasã tɩ b segl b mens ra-kãng yĩng wa a wata beoogo. Tõnd me segd n tũu a saglgã. Bɩ d ges a goamã sẽn tõe n sõng tõnd tɩ d bãng 1) wãn to la a Zeova daarã wata? 2) Ãnd dãmb n pa na n põs a Zeova daarã sasa? La 3) bõe la d tõe n maan n wa paam n põse?

A ZEOVA DAARÃ SẼN WAT TO-TO

3. Wãn to la a Zeova daarã na n wa wa wadr sẽn wat yʋngo? (Ges-y fotã me.)

³ “Wa wagdr sẽn wat yʋng to-to.” (1 Tes. 5:2) Tẽn-tʋmd a Poll rɩka makr a tãab n na n gom a Zeova daarã sẽn wat to-to wã yelle. Pipi soabã la woto. Wagda wã wae n soosd n wata ne yʋngo, wakat ning neb nins b sẽn dat n zu wã sẽn pa tẽede. A Zeova daarã me na n tiig n waame, n ling nebã fãa la bala. Yɛlã sẽn na n pʋgl taab ne tʋʋlem to-to wã tõe n linga kiris-neb hakɩɩkã menga. La b pa na n sãam tõnd wa nin-wẽnsã ye.

4. Bõe yĩng tɩ d tõe n yeel t’a Zeova daarã wata wa rogem toogo?

⁴ “Wa rogem toog sẽn paamd pag sẽn tʋt to-to.” (1 Tes. 5:3) Pag sẽn tʋt pa tõe n bãng wakat ning takɩ rogmã sẽn na n yik-a ye. La a pa maand sãmbs ne wakat kãng sã na n waame ye. Wakatã sã n ta, rogmã yikda zĩig pʋgẽ n zabd wʋsg tɩ yaa wa bũmb pa tõe n kɩt tɩ sig ye. Woto me, d pa mi a Zeova daarã sẽn na n sɩng daar ning la lɛɛr ning takɩ wã ye. Baasgo, d kɩsa sɩd tɩ daar ning Wẽnnaam sẽn na n kao nin-wẽnsã bʋʋdã watame, t’a na n tiig n waame, la tɩ bũmb pa tõe n gɩdg-a ye.

5. Bõe yĩng tɩ d tõe n yeel tɩ to-kãsengã yaa wa beoog vẽegre?

⁵ Wa beoog vẽegre. A Poll makr a tãab-n-soabã pʋgẽ, a le goma wagda sẽn zuud ne yʋng yelle. La so-kãnga wã, wõnda a Poll maka a Zeova daarã ne beoog vẽegre. (1 Tes. 5:4) Wagda sã n wa zuuda, b yamã tõe n bee bũmb ning b sẽn maandã zugu, hal tɩ b yĩm tɩ wakatã loogdame. Beoogã vẽegr tõe n ling-b lame, tɩ b yã-b n yõge. To-kãsengã me na n linga neb nins sẽn nong lik wa wagda wã. Yaa neb nins sẽn tʋmd tʋʋm Wẽnnaam sẽn kisi, n pa basdẽ wã. La tõnd pa wa bãmb ye. D zãagda d mens ne manesem nins fãa a Zeova sẽn kisã, la d baood “sõmblem buud fãa la tɩrlem la sɩda,” n segend d mense. (Efɛɛ. 5:8-12) A Poll leb n dɩka makr a yiib n na n gom neb nins sẽn pa na n põsã yelle.

NEB NINS SẼN PA NA N PÕS A ZEOVA DAARÃ SASA WÃ

6. Bõe yĩng tɩ d tõe n yeel tɩ nebã fãa la bal gõee Wẽnnaam tũubã wɛɛngẽ? (1 Tesalonik rãmbã 5:6, 7)

⁶ “Neb nins sẽn gõe wã.” (Karm-y 1 Tesalonik rãmb 5:6, 7.) A Poll maka neb nins sẽn pa na n põs a Zeova daarã sasa wã ne neb sẽn gõe. Ned sẽn gõe pa mi bũmb nins sẽn maandã, la tɩ wakatã loogdame ye. Bũmb sẽn tar yõod sã n maane, a pa bãngd ye. Rẽ pa tõe n kɩt t’a maan bũmb ye. Rũndã-rũndã, nebã fãa la bal gõee Wẽnnaam tũubã wɛɛngẽ. (Rom. 11:8) B pa tẽed kaset ning sẽn wilgd tɩ d vɩɩ “yaoolem wakatã,” la tɩ to-kãsengã na n waa ka la bilfã ye. Bõn-kãsems sẽn maan dũniyã zug tõe n kɩtame tɩ neb kẽer neke, n baood n na n bãng bũmb sãnda Rĩungã koɛɛgã d sẽn moondã wɛɛngẽ. Baasgo, sãnda lebgd n gũsame. Baa kẽer sẽn tẽed tɩ bʋ-kaoor daar n watã, b tagsdame tɩ ket n zãrame. (2 Pɩy. 3:3, 4) La d kɩsa sɩd tɩ beoog sẽn vẽeg fãa, saglg ning Wẽnnaam sẽn vẽneg a Poll t’a kõ wã tũub manegd n lebga yãgb bũmbu.

7. Bõe yĩng tɩ neb nins Wẽnnaam sẽn na n sãamã yaa wa neb sẽn yũ rãam n tɩge?

⁷ “Neb nins sẽn yũud rãam n tɩgdã.” Tẽn-tʋmd a Poll maka neb nins Wẽnnaam sẽn na n sãamã ne rã-yũud-kãase. Ned sã n yũ rãam n su, bũmb sã n maane a tõeeme n pa bãng tao-tao ye. Sẽn paase, a tõe n yãka yam tɩ pa yɩ sõma ye. Woto me, nin-wẽnsã pa kelgd Wẽnnaam keoogrã ye. B rɩka sor sẽn na n wa ne b sãoongo. La b yeta kiris-nebã tɩ b yɩ neb yam sẽn vẽenẽ, la neb sẽn pa tɩg rãam ye. (1 Tes. 5:6) Biibl-mit a yembr yeelame tɩ ned yam sẽn vẽenẽ, “yaa ned sẽn tõe n maag a yĩng n tags bũmb zug n wʋm a võor sõma, tɩ rẽ sõng-a t’a yãk yam sẽn zemse.” Bõe yĩng tɩ d segd n maagd-d yĩnga, la d tagsd sõma? Rẽ na n sõng-d lame tɩ d ra kẽes d toog politikã yɛlẽ, la dũniyã nebã no-koɛɛmã pʋgẽ ye. A Zeova daarã sẽn kolgdã, b na n maneg n pẽdgda tõnd n dat tɩ d kẽes d toog yel-kãens pʋgẽ. La d pa segd n maan yɩɩr d sẽn na n tall manesem ningã wɛɛngẽ ye. Wẽnnaam vʋʋsem sõngã tõe n sõng-d lame tɩ d maag d yĩng la d tags sõma, n bãng n yãk yam tɩ zemse.—Luk 12:11, 12.

D SẼN TÕE N MAAN TO-TO N SEGL D MENS A ZEOVA DAARÃ YĨNGA

8. Wãn to la bũmb ning b sẽn yeel 1 Tesalonik rãmb 5:8 wã tõe n sõng-d tɩ d ra yɩ neb sẽn gõe, la d kell n yɩ neb yam sẽn vẽenẽ? (Ges-y fotã me.)

⁸ ‘D yeelg kut fuugã, la d fõgen kut puglã.’ A Poll maka tõnd ne sodaas sẽn yaa gũusdba, la sẽn yer b fut zabr yĩnga. (Karm-y 1 Tesalonik rãmb 5:8.) Zabr sasa, nebã fãa gũudame tɩ sodaag segl a meng n sa n na n zab wakat buud fãa. Yaa woto me ne tõndo. D yera tẽeb la nonglem kut fuugã, la d fõg saagrã kut puglã, tɩ wilgdẽ tɩ d segla d meng n gũud a Zeova daarã. Tẽebã, nonglmã la saagrã tõe n sõnga tõnd wʋsgo.

9. Wãn to la d tẽebã kogend tõndo?

⁹ Sodaag sã n yeelg kut fuugu, kogenda a sũurã. Tẽebã la nonglmã kogenda tõnd me sũurã. B tõe n sõnga tõnd tɩ d kell n tũ a Zeova, la d rɩk a Zeezi togs-n-taare. Tẽebã na n kɩtame tɩ d kɩs sɩd t’a Zeova na n keo-d lame, d sẽn baood-a ne d sũur fãa wã yĩnga. (Ebre. 11:6) Na n kɩtame tɩ d kell n maan sɩd ne a Zeezi sẽn yaa d taoor soabã, baa d sã n wa segd zu-loeese. Rũndã-rũndã, neb n kell n tall b burkĩndã baa b sẽn nams-b b tũudmã yĩnga, wall baa b sẽn segd ligd zu-loeesã. D sã n tags mak-sõng ning nin-kãensã sẽn kõ wã yelle, tõe n sõng-d lame tɩ d bɩɩs d tẽebã, n tõog n mao ne zu-loees buud toor-toore. D sã n dɩk neb nins sẽn pa gĩd b vɩɩmã ne bũmb wʋsgo, n lʋɩɩs Wẽnnaam Rĩungã yɛl taoorã togs-n-taare, d na n tõog n zãaga d meng ne ligdã la teedã nonglem.b

10. Wãn to la d sẽn nong a Zeova la d taabã sõngd tõnd tɩ d wɩngd ne koɛɛgã moonego?

¹⁰ D sã n dat n kell n yɩ neb sẽn pa gõe la neb yam sẽn vẽenẽ, yaa tɩlɛ tɩ d tall nonglem. (Mat. 22:37-39) D sẽn nong Wẽnnaamã sõngd-d lame tɩ d ket n moond koɛɛgã, baa sẽn yaa zu-loɛɛg ning fãa la d segd koɛɛgã mooneg pʋgẽ. (2 Tɩm. 1:7, 8) D sẽn nong baa neb nins sẽn pa d tẽed-n-taasã, d wɩngda ne koɛɛgã moonego, hal n moond ne telefõn la lɛta. D saagdame tɩ neb kẽer yam na n wa toeemame tɩ b sak sɩdã.—Eze. 18:27, 28.

11. Bõe la d tõe n maan n wilg tɩ d nonga d tẽed-n-taasã? (1 Tesalonik rãmbã 5:11)

¹¹ D nonga d tẽed-n-taasã me. D ‘kengda taab raood la d paasd taab tẽeb pãnga,’ n wilgdẽ tɩ d nonga taaba. (Karm-y 1 Tesalonik rãmb 5:11.) D kengda taab raoodo, wa sodaas sẽn yɛg taab n zabdẽ. Yaa sɩd tɩ sodaag tõe n pogla a soda-taag ne yĩdgu, la a pa na n tol n maan dẽ ne pʋ-toog ye. Woto me, d pa na n tol n maan bũmb ne pʋ-toog n sãam d tẽed-n-taag sũuri, wall d lebs-a wẽng wẽng yĩng ye. (1 Tes. 5:13, 15) D leb n waoogda d saam-biis nins sẽn lʋɩt taoor tigingã pʋgẽ wã, tɩ wilgdẽ tɩ d nong-b lame. (1 Tes. 5:12) A Poll sẽn wa n gʋlsd lɛt-kãngã wã tɩ Tesalonik tigingã luglgã nan pa ta yʋʋmd ye. D tõe n yeelame tɩ rap nins b sẽn da yãk tɩ b lʋɩt taoorã ra pa tar minim wʋsgo, la tɩ b ra tudgdame. La baa ne rẽ, b ra toga ne waoogre. To-kãsengã sẽn kolgdã, d segd n kelgda kãsem-dãmbã sagls n yɩɩd pĩndã. D tõeeme n wa pa le tõe n paam sagls sẽn yit Siglgã taoor lʋɩtb Sull wall filyallã taoor lʋɩtbã nengẽ ye. Dẽnd tara yõod wʋsg tɩ d wilg d kãsem-dãmbã masã meng tɩ d nong-b lame la d waoogd-ba. Sẽn wa n yaa a soab fãa, bɩ d modg tɩ d yamã ket n vẽenẽ, n da get kãsem-dãmbã pãn-komsmã ye. D segd n tẽegdame t’a Zeova tũnugda ne Kiristã n wilgd nin-kãensã sẽn maand sɩdã sore.

12. Wãn to la d sẽn saagd manegrã kogend d tagsa wã?

¹² D sẽn saagd tɩ manegr n watã kogenda d tagsa wã wa kut pugl sẽn kogend sodaag zug to-to wã. D sã n tẽed ne d sũur fãa tɩ manegr n wate, d sakd n deegame tɩ bũmb ning fãa d sẽn tõe n paam dũni-kãngã pʋgẽ wã yõod pa waoog ye. (Fili. 3:8) D sẽn saagd tɩ manegr n watã sõng-d lame tɩ d maagd d yĩng n tagsd sõma. Yɩɩ woto ne a Wallace ne a pag a Laurinda sẽn yaa Betɛllẽ tʋm-tʋmdb n be Afirik tẽng a ye pʋgẽ wã. Semen a tãab pʋgẽ, a Laurinda ma maana kaalem, t’a Wallace baaba me maan kaalem. Koronaviriisã bã-loangdgã yĩnga, b ra pa tõe n leb b ba-yirã n tɩ ges b zakã rãmb ye. A Wallace yeelame yaa: “M sẽn tẽed kũum vʋʋgrã sõngd-m lame tɩ m tagsd b yelle, la pa b sẽn da yaa to-to dũni-kãngã pʋgẽ b kũumã sẽn wa n kolgdẽ wã yell la m tagsd n yɩɩd ye. Yaa b sẽn na n yɩ to-to dũni-paalgã pʋgẽ wã. M sã n wa tagsd m roagdbã yell tɩ m sũurã sãamd wʋsgo, m sẽn tẽed kũum vʋʋgrã boogda m sũ-sãamsã.”

13. Bõe la d tõe n maan n paam vʋʋsem sõngã?

¹³ “Ra kiis-y vʋʋsem sõngã bugmã ye.” (1 Tes. 5:19) A Poll rɩka vʋʋsem sõngã n mak ne bugum sẽn be d pʋgẽ wã. D sã n tar Wẽnnaam vʋʋsem sõngã, kõt-d-la yẽesem tɩ d maand sẽn yaa tɩrga, la raood tɩ d tʋmd a Zeova tʋʋmã. (Rom. 12:11) Bõe la d tõe n maan n paam vʋʋsem sõngã? D tõe n pʋʋsda Wẽnnaam n kotẽ, n zãmsd a Gomdã, la d naagd a siglgã vʋʋsem sõngã sẽn wilgd sorã. D sã n maand woto, na n sõng-d lame tɩ d bɩɩs “vʋʋsem sõngã biisi.”—Gal. 5:22, 23.

14. D sã n dat n ket n paamd Wẽnnaam vʋʋsem sõngã, bõe la d pa segd n maane? (Ges-y fotã me.)

¹⁴ Wẽnnaam sã n kõ-d a vʋʋsem sõngã, d segd n gũusame n da wa ‘kiis vʋʋsem sõngã bugmã ye.’ Yaa neb nins sẽn tar tagsa sẽn yaa yɩlma, la manesem-sõngã bal la Wẽnnaam kõt a vʋʋsem sõngã. D sã n minim n tagsd bõn-dẽgd yell la d tʋmd tʋʋm-wẽnse, a pa na n le kõ-d a vʋʋsem sõngã ye. (1 Tes. 4:7, 8) D sã n dat n ket n paamd vʋʋsem sõngã d segd n gũusame me, n da ‘paoog bãngr-goamã ye.’ (1 Tes. 5:20) Vɛrse-kãngã pʋgẽ, “bãngr-goamã” yaa koees nins Wẽnnaam sẽn tũnug ne a vʋʋsem sõngã n taas nebã, wala makre, koees nins sẽn gomd a Zeova daarã yellã, la b rãmb nins sẽn wilgd tɩ d bee yaoolem wakatã. D pa tagsd t’a Zeova daarã bɩ Armagedõ pa na n wa tɩ d ket n vɩ ye. D pʋd n modgdame n tar manesem-sõngo, la d wɩngd n “tʋmd wẽn-sakr tʋʋm” daar fãa, tɩ wilgdẽ tɩ d ratame t’a wa tao-tao.—2 Pɩy. 3:11, 12.

“MAK-Y BŨMB FÃA N GESE”

15. Bõe la d tõe n maan tɩ goam sẽn pa sɩda, wall goam zĩn-dãmbã sẽn vẽneg ra kẽes-d moogo? (1 Tesalonik rãmbã 5:21)

¹⁵ Ka la bilfu, Wẽnnaam bɛɛbã na n wa wilgame tɩ “laafɩ la bãan” beeme masã. (1 Tes. 5:3) Goam zĩn-dãmb sẽn vẽneg n na n pid dũniyã, n kẽes nebã fãa la bal moogo. (Vẽn. 16:13, 14) La tõnd yẽ? D sã n ‘makd bũmb fãa n getẽ,’ b pa na n tõog n belg tõnd ye. (Karm-y 1 Tesalonik rãmb 5:21.) Gɛrɛk gom-bil ning b sẽn lebg tɩ ‘mak n gesã’ bilgda b sẽn na n mak sãnem bɩ wanzuri to-to n ges a sã n sɩd yaa halaale. Dẽnd d segd n vaeesa bũmb nins d sẽn wʋmdã la d sẽn karemdã n ges sã n sɩd yaa sɩda. Tesalonik kiris-nebã sã n da segd n maana woto, tõnd n segd n maan rẽ n yɩɩda, to-kãsengã sẽn kolgdã yĩnga. D pa segd n tẽed bũmb nins fãa d sẽn wʋmdã zond-yaar ye. D sã n karem bũmb wall d wʋm gomde, d segd n tagsa neer n ges sã n zemsa ne Biiblã, la a Zeova siglgã sẽn yetã. D sã n maand woto, goam nins zĩn-dãmbã sẽn vẽnegdã baa a ye pa na n tõog n kẽes-d moog ye.—Yel. 14:15; 1 Tɩm. 4:1.

16. D kɩsa sɩd tɩ d na n wa paama bõe, la bõe la d tʋll n maan ne d sũur fãa?

¹⁶ D miime t’a Zeova nin-buiidã na n põsa to-kãsengã sasa. La tõnd ned kam fãa yembr-yembrã pa mi a yɛlã sẽn na n yɩ to-to beoog sẽn wat ye. (Zak 4:14) La to-kãsengã sã n wa tɩ d ket n vɩɩme wall d kiime, sã n mikame tɩ d kell n maana sɩd ne a Zeova, d na n paama vɩɩm sẽn pa satã. Sẽn paam-b vʋʋsem sõngã zaeebã na n tɩ zĩnda ne Kiristã saasẽ. Piis a taabã na n vɩɩmda arzãnã pʋgẽ tẽngã zugu. Bɩ d ned kam fãa ket n tagsd beoog sẽn na n yɩ neer to-to wã yelle, la d segl d meng n gũ a Zeova daarã!