ZÃMSGÃ YĨNGA 34
YƖƖLL 107 D tall nonglem wa a Zeova
D sẽn tõe n wilg yel-wẽn-maand to-to tɩ d nong-a lame, la tɩ d zoeta a nimbãanega
“Wẽnnaam sẽn yaa sõmblem soabã rat n sõnga foo tɩ f tek yam n kos sugri.”—ROM. 2:4.
D SẼN NA N BÃNGE
Sõs-kãngã pʋgẽ d na n yãa kãsem-dãmbã sẽn tõe n sõng tigingã ned to-to, a sã n wa maan yel-wẽn-kãsenga.
1. Neb kẽer sã n maan yel-wẽn-kãseng poore, bõe la b maanda?
SÕSG ning sẽn loogã pʋgẽ, d yãa tẽn-tʋmd a Poll sẽn welg ned sẽn maan yel-wẽn-kãseng yell to-to Korẽnt tigingã pʋgẽ. Yel-wẽn-maandã ra pa tek yam, tɩ yɩ tɩlɛ tɩ b yiis-a tigingã pʋgẽ. La yel-wẽn-maandb kẽer nengẽ, b tõe n sõng-b lame tɩ b tek yam n kos sugri, wa tõnd sõsgã sẽn tik vɛrse ning zugã sẽn yetã. (Rom. 2:4) Bõe la kãsem-dãmbã tõe n maan n sõng-b tɩ b tek yam n kos sugri?
2-3. D sã n wa bãng tɩ d tẽed-n-taag n maan yel-wẽn-kãsenga, bõe la d segd n maane, la bõe yĩnga?
2 Ned sã n maan yel-wẽn-kãsenga, yaa tɩlɛ tɩ kãsem-dãmbã bãng tiir n yaool n tõog n sõng-a. Woto wã, d sã n wa bãng tɩ d tẽed-n-taag n maan yel-wẽn-kãsenga, yel-wẽnd poorẽ b sẽn tõe n yiis-a tigingã pʋgẽ, d maanda wãna? D segd n sagla ned ning sẽn maan yel-wẽn-kãsengã t’a tɩ togs kãsem-dãmbã tɩ b sõng-a.—Eza. 1:18; Tʋʋ. 20:28; 1 Pɩy. 5:2.
3 La yel-wẽn-maandã sã n zãgs t’a kõn tɩ togs yẽ? Sã n yaa woto, d segd n kẽnga d toor n tɩ togs kãsem-dãmbã tɩ b sõng-a. D sã n maan woto, d wilgdame tɩ d nonga d saam-biigã wall d saam-bi-poakã, bala d miime tɩ kãsem-dãmbã tõe n sõng-a lame. Yel-wẽn-maandã sã n ket n maand yel-wẽndã, a na n sãama yẽ ne a Zeova zoodã n paase. A tõe n sãama tigingã yʋʋr me. Rẽ n so tɩ d na n tall raood n tɩ togs kãsem-dãmbã, d sẽn nong a Zeova la d tẽed-n-taagã yĩngã.—Yɩɩn. 27:14.
KÃSEM-DÃMBÃ SẼN SÕNGD SẼN MAAN-B YEL-WẼN-KÃSEMSÃ TO-TO
4. Kãsem-dãmbã sã n wa sõsd ne ned sẽn maan yel-wẽn-kãsenga, b raabã yaa bõe?
4 Tigingã ned sã n maan yel-wẽn-kãsenga, kãsem-dãmbã na n yãka neb a tãab bãmb sʋkã tɩ b yɩ kãsem-dãmb sulla n welg yellã. Kãsem-dãmb nins b sẽn na n yãkã segd n yɩɩ sik-m-mens rãmba. B sã n wa sõngd ned ning sẽn beegã sẽn na yɩl t’a tek yam n kos sugri, b segd n tẽegame tɩ b pa tõe n modg a soabã ye. (Tõo. 30:19) Kãsem-dãmbã miime tɩ pa yel-wẽn-maandbã fãa n na n tek yam n kos sugr wa rĩm a Davɩɩd ye. (2 Sãm. 12:13) Yel-wẽn-maandb kẽer yãkda yam n zãgs a Zeova saglsã tũubu. (Sɩng. 4:6-8) La kãsem-dãmbã raabã yaa b maan b sẽn tõe fãa n sõng yel-wẽn-maandã t’a tek yam n kos sugri. Kãsem-dãmbã sã n wa sõsd ne ned sẽn maan yel-wẽn-kãsenga, bõe la b segd n ning b yamẽ?
5. Kãsem-dãmbã sã n wa sõsd ne ned sẽn maan yel-wẽn-kãsenga, b manesem segd n yɩɩ wãna? (2 Tɩmote 2:24-26) (Ges-y fotã me.)
5 Kãsem-dãmbã miime tɩ ned sã n wa maan yel-wẽn-kãsenga a yaa wa pesg sẽn meneme, n ket n tar yõod a Zeova nifẽ. (Luk 15:4, 6) Rẽ n so tɩ kãsem-dãmbã sã n wa sõsd ne ned a woto, b na n modgame tɩ b no-goamã la b manesmã wilg tɩ b nand-a lame. B pa na n tags tɩ b sẽn tigim taabã yaa sẽn na n sok sogsg n wʋm yellã vɩʋʋg bal ye. B na n wilgame tɩ b tara zʋg-sõma nins yell b sẽn gom 2 Tɩmote 2:24-26 pʋgẽ wã. (Karm-y-yã.) Kãsem-dãmbã na n talla bʋgsem ne yel-wẽn-maandã, bala b ratame tɩ b goamã kẽ a sũurã.
Kãsem-dãmbã maanda b sẽn tõe fãa n na n sõng ned sẽn maan yel-wẽn-kãsenga, wa pĩnd wẽndẽ pe-kɩɩmbã sẽn da gẽesd pesg sẽn menem to-to wã (Ges-y sull a 5)
6. Bõe la kãsem-dãmbã tõe n maan n segl b mense, nand tɩ b tigim ne ned sẽn maan yel-wẽn-kãsenga? (Rom dãmbã 2:4)
6 Kãsem-dãmbã rengd n segla b mense. B rɩkda a Zeova togs-n-taar bũmb fãa pʋgẽ, b manesem sẽn yaa to-to ne yel-wẽn-maandã. B tẽegda a Poll sẽn yeel bũmb ningã. A yeelame yaa: “Wẽnnaam sẽn yaa sõmblem soabã rat n sõnga foo tɩ f tek yam n kos sugri.” (Karm-y Rom dãmb 2:4.) Kãsem-dãmbã segd n tẽegame tɩ sẽn yɩɩd fãa b yaa pe-kɩɩmba, n segd n sak sor ning Kiristã sẽn wilgd-bã. (Eza. 11:3, 4; Mat. 18:18-20) Nand tɩ kãsem-dãmb sullã tigim ne yel-wẽn-maanda, b na n pʋʋsa a Zeova n kos t’a sõng tɩ b bõn-daabã pidi, rat n yeel tɩ b tõog n sõng yel-wẽn-maandã t’a tek yam n kos sugri. B na n maana vaeesg Biiblã la siglgã sɛb pʋsẽ, la b pʋʋs a Zeova n kos yam-vẽenem. B na n bao n bãnga bũmb ning sẽn na n sõng-b tɩ b wʋm a soabã tagsgã, a manesmã la a tʋʋm-tʋmdɩ wã võore.—Yel. 20:5.
7-8. Kãsem-dãmbã sã n wa na n sõng yel-wẽn-maanda, wãn to la b tõe n dɩk a Zeova togs-n-taar sũ-marã wɛɛngẽ?
7 Kãsem-dãmbã rɩkda a Zeova togs-n-taar sũ-marã wɛɛngẽ. B tẽegda a Zeova sẽn sõng yel-wẽn-maandb pĩnd wẽndẽ wã to-to wã yelle. Wala makre, a Zeova maana sũ-mar ne a Kayẽ. A wilg-a-la bũmb ning sẽn tõe n maane, a sã n pa toeeme. La a wilg-a t’a sã n tek yam a na n paama barka. (Sɩng. 4:6, 7) A Zeova tʋma no-rɛɛs a Natã t’a tɩ sagl a Davɩɩde. A Natã tũnuga ne makre, sẽn na yɩl t’a goamã kẽ rĩmã. (2 Sãm. 12:1-7) Sẽn paase, a Zeova ‘tʋma’ a no-rɛɛsdbã “naoor wʋsgo,” sẽn na yɩl tɩ b rems Israyɛll nebã sẽn da yaa tõatbã. (Zer. 7:24, 25) A pa gũ t’a nin-buiidã tek yam n kos sugr t’a yaool n sɩng b sõngr ye. Baa b sẽn wa n ket n maand yel-wẽnã, a sagl-b lame tɩ b tek yam.
8 Kãsem-dãmbã sã n wa sõngd ned sẽn maan yel-wẽn-kãsenga, b rɩkda a Zeova togs-n-taare. B segd n talla sũ-mar ne-a wa 2 Tɩmote 4:2 sẽn wilgdã. Rẽnd kãsem-soab sã n dat n sõng yel-wẽn-maand t’a bas wẽngã n maan sẽn yaa tɩrga, a segd n talla bʋgsem la sũ-mar ne-a. Kãsem-soabã sã n bas t’a sũurã yik t’a pa maan sũ-mar ne-a, tõe n kɩtame t’a pa tũ a saglsã wall n kɩt t’a zãgs t’a kõn tek yam n kos sugr ye.
9-10. Wãn to la kãsem-dãmbã tõe n sõng ned sẽn maan yel-wẽnd t’a tags a sẽn maanã zugu?
9 Kãsem-dãmbã modgdame n na n bãng sẽn sɩng to-to t’a wa maan yel-wẽndã. Wala makre, a basame t’a tẽebã boog bil-bilfu, a sẽn da reemd ne Biiblã zãmsg la koɛɛgã mooneg yĩng bɩ? A basame n pa le pʋʋsd a Zeova wakat fãa, wall n pa le pelgd a pʋg n pʋʋsdẽ bɩ? A basame t’a tʋls-wẽnsã paam pãng bɩ? A tara tũud-n-ta-wẽns wall a maand bũmb sẽn pa sõma n kokd pemsem bɩ? Wãn to la tũud-n-ta-wẽnsã la bũmb nins a sẽn maand n kokd pemsmã toeem a tagsa wã la a tʋlsmã? A miime t’a yam-yãkr toor-toorã la a tʋʋm-tʋmdɩ wã sãama a Zeova sẽn yaa a Ba wã sũur bɩ?
10 Kãsem-dãmbã tõe n sok-a-la sogsg sẽn na n kɩt t’a tags bũmb ning sẽn boog a tẽebã pãng n wa kɩt t’a maan yel-wẽndã zugu. La b na n maana rẽ ne gũusgu, n da wa feesd-a bũmb sẽn pa tɩlɛ tɩ b bãng wɛɛngẽ ye. (Yel. 20:5) Sẽn paase, b tõe n dɩka makr n sõng yel-wẽn-maandã t’a yã a sẽn maan bũmb ningã sẽn yaa wẽngã võore, wa a Natã sẽn maan ne a Davɩɩdã. Pipi tigsgã sasa, yel-wẽn-maandã sũur tõe n sɩnga sãoong ne bũmb ning a sẽn maanã. A tõeeme meng n tek yam n kos sugri.
11. A Zeezi manesem yɩɩ wãn ne yel-wẽn-maandbã?
11 Kãsem-dãmbã modgd n dɩkda a Zeezi togs-n-taare. A Zeezi vʋʋgrã poore, a sẽn wa n na n sõng Tars rao a Sollã, a sok-a-la sokr sẽn kɩt t’a tagse. A sok-a lame yaa: “Solle, Solle, bõe yĩng tɩ fo namsd maam?” A Zeezi sẽn sok-a woto wã sõng-a lame t’a bãng t’a sẽn da maand bũmb ningã yaa wẽnga. (Tʋʋ. 9:3-6) Sẽn paase, a Zeezi goma “pag a Zezabɛllã” yell n yeel yaa: “Mam kõ-a-la weer t’a tek yam n kos sugri.”—Vẽn. 2:20, 21.
12-13. Wãn to la kãsem-dãmbã tõe n kõ ned sẽn maan yel-wẽnd weer t’a tek yam n kos sugri? (Ges-y fotã me.)
12 Kãsem-dãmbã sẽn dɩkd a Zeezi togs-n-taarã, b pa yɩt tao-tao n yeel tɩ yel-wẽn-maand pa na n tek yam n kos sugr ye. Yel-wẽn-maandb kẽer tekda yam b sã n tigim ne kãsem-dãmb sullã pipi wã bala. La sãnda nengẽ, kaoosda bilf tɩ b yaool n wa tek yam. Dẽnd kãsem-dãmbã tõe n tigma ne yel-wẽn-maandã n yɩlme. Tõe tɩ pipi tigsgã poore, sẽn maan-a yel-wẽndã na n tagsa bũmb ning b sẽn yeel-a wã zug neere. A tõe n sika a meng n pʋʋs a Zeova. (Yɩɩn. 32:5; 38:18) Woto, tigsg ning sẽn na n pʋglã sasa, a manesmã tõe n yɩɩ toor ne pipi wã.
13 Sẽn na yɩl n sõng yel-wẽn-maandã t’a tek yam n kos sugri, kãsem-dãmbã na n talla bʋgsem ne-a la b wilg tɩ b kʋmd-a lame. B pʋʋsda a Zeova t’a ning b modgrã barka, n saagdẽ tɩ sẽn beeg-a wã yamã na n vẽnegame, t’a tek yam n kos sugri.—2 Tɩm. 2:25, 26.
Kãsem-dãmbã tõe n tigma ne yel-wẽn-maand n yɩlme, sẽn na yɩl n kõ-a weer t’a tek yam n kos sugri (Ges-y sull 12)
14. Yel-wẽn-maand sã n tek yam n kos sugri, ãnd n so pẽgrã, la bõe yĩnga?
14 Yel-wẽn-maandã sã n tek yam n kos sugri, wata ne sũ-no-kãsenga. (Luk 15:7, 10) Sã n wa yaa woto, ãnda soab n segd ne pẽgrã? Yaa kãsem-dãmbã bɩ? Tẽeg-y bũmb ning a Poll sẽn yeel yel-wẽn-maandbã wɛɛngẽ wã. A yeelame yaa: “Daar ninga, Wẽnnaam na kɩt tɩ b tek yam.” (2 Tɩm. 2:25) Yaa a Zeova n sõngd ned sẽn maan yel-wẽnd t’a toeem a tagsa wã la a tʋʋm-tʋmdɩ wã, pa ninsaal ye. Rẽnd yaa a Zeova n segd ne pẽgre, pa ninsaal ye. Bala yaa yẽ n sõng kiris-ned ning sẽn da lakã t’a toeeme. A Poll wilga tek yam n kos sugrã sẽn wat ne bark ninsã kẽere. Wala makre, sõngda sẽn maan-a yel-wẽndã t’a paam bãngr hakɩɩk sɩdã zugu. Sõngd-a lame t’a yamã vẽnege, la sõng-a t’a yiis a meng Sʋɩtãanã bẽdsã pʋsẽ.—2 Tɩm. 2:26.
15. Wãn to la kãsem-dãmbã tõe n kell n sõng yel-wẽn-maand sẽn tek yam n kos sugri?
15 Yel-wẽn-maand sã n tek yam n kos sugri, kãsem-dãmb sullã na n gesame tɩ kãsem-dãmb kẽnd n kaagd-a, sẽn na yɩl n sõng-a t’a bãng n gil Sʋɩtãanã bẽdsã, la a kɩt t’a naoã kẽn so-tɩrs zutu. (Ebre. 12:12, 13) Yaa sɩd tɩ kãsem-dãmbã pa na n vẽneg yel-wẽn-maandã sẽn maan bũmb ningã n togs neb a taab ye. La tõe tɩ bõe la tigingã neb segd n bãnge?
WILG NED A KONGR “NEBÃ FÃA TAOORE”
16. A Poll sẽn gom “nebã fãa” yell 1 Tɩmote 5:20 pʋgẽ yaa ãnd dãmba?
16 Karm-y 1 Tɩmote 5:20. A Poll gʋlsa gom-kãensã n tool a kãsem-soab taag a Tɩmote, n wilg-a a manesem sẽn segd n yɩ to-to ne “neb nins sẽn maand yel-wẽnã.” A gomdã võor yaa bõe? A Poll gomdã pa rat n yeel tɩ yaa tɩlɛ tɩ yɩ tigingã “nebã fãa” taoor ye. Yaa neb nins fãa sẽn bãng yel-wẽndã tiirã yell la a ra gomda. Wakat ninga yaa neb sẽn maan kaset ne rẽ, wall yaa yel-wẽn-maandã n togs-ba. Kãsem-dãmbã na n togs-b lame tɩ b welga yellã, la tɩ yel-wẽn-maandã paama kiblgu.
17. Bõe n tõe n kɩt tɩ b togs tigingã taoor tɩ b kibla neda, la bõe yĩnga?
17 Wakat ninga, tigingã neb mii yellã, wall b na n wa bãngame. Sã n yaa woto, “nebã fãa” wã tõe n yɩɩ tigingã tõre. Rẽ n so tɩ kãsem-dãmbã segd n togs tigingã taoor tɩ b kibla saam-biigã wall saam-bi-poakã. Bõe yĩnga? A Poll yeelame tɩ yaa sẽn na yɩl “tɩ yɩ keoogr neb a taabã yĩnga,” tɩ bãmb me ra wa maan yel-wẽnd ye.
18. Biig sẽn pa ta yʋʋm 18 sã n maan yel-wẽn-kãsenga, wãn to la kãsem-dãmbã na n welg yel-kãnga? (Ges-y fotã me.)
18 La biig sẽn pa ta yʋʋm 18 sẽn deeg lisg sã n maan yel-wẽnde, wãn to la b welgd yellã? Kãsem-dãmbã sull na n yãka kãsem-dãmb a yiib tɩ b naag a roagdbãb sẽn yaa kiris-nebã tɩ b sõs ne-a. Kãsem-dãmb a yiibã na n bao n bãnga roagdbã sẽn zoe n maan bũmb nins n na n sõng b biigã t’a tek yam n kos sugrã. Sã n mik tɩ biigã tara yam-sõngo, t’a roagdbã me mi b sẽn na n sõng-a to-to, kãsem-dãmb a yiibã tõe n gesame tɩ pa tɩlɛ tɩ b lugl kãsem-dãmb sull n sõs ne biigã la a roagdbã ye. Sɩd me, yaa roagdbã la Wẽnnaam yeel tɩ b kibl b kambã ne nonglem. (Tõo. 6:6, 7; Yel. 6:20; 22:6; Efɛɛ. 6:2-4) La kãsem-dãmbã segd n sõsda ne roagdbã wakat-wakate, n bao n bãng biigã sã n ket n paamda sõngr ning a sẽn dat tẽebã wɛɛngẽ wã. La biig sẽn deeg lisg sã n maan yel-wẽnd n pa rat n toeeme, kãsem-dãmbã segd n maana wãna? Sã n yaa woto, kãsem-dãmb sull n na n naag a roagdbã sẽn yaa kiris-nebã tɩ b sõs ne-a.
Biig sã n maan yel-wẽnde, kãsem-dãmb a yiib n na n naag a roagdbã sẽn yaa kiris-nebã n sõs ne-a (Ges-y sull 18)
‘A ZEOVA TARA NONGLEM WƲSGO, N YAA NIMBÃAN-ZOƐTA’
19. Kãsem-dãmbã sã n wa sõngd yel-wẽn-maanda, wãn to la b rɩkd a Zeova togs-n-taare?
19 A Zeova ratame tɩ kãsem-dãmbã ges tɩ tigingã kell n yɩ yɩlemde. (1 Kor. 5:7) Bãmb me ratame tɩ sã n tõe bɩ b sõng yel-wẽn-maandbã tɩ b tek yam n kos sugri. Rẽ n so tɩ b sã n wa sõngd yel-wẽn-maand bɩ b saagdẽ t’a na n toeemame. Bõe yĩnga? Bala b rat n dɩka a Zeova sẽn ‘tar nonglem wʋsgo, n yaa nimbãan-zoɛtã’ togs-n-taare. (Zak 5:11) Tẽn-tʋmd a Zã sẽn wa n kʋʋlã, a wilgame t’a tara yam a woto buudu. A yeelame: “Mam kom-bõonego, mam gʋlsda yãmb bõn-kãensã sẽn na yɩl tɩ y ra maan yel-wẽnd ye. La ned sã n baas n maan yel-wẽnde, tõnd tara sõangd sẽn be Ba wã nengẽ: Yaa a Zeezi Kirist sẽn yaa tɩrgã.”—1 Zã 2:1.
20. Bõe yell la d na n gom sõsg ning sẽn pʋgdã pʋgẽ?
20 Zu-bʋko, kiris-ned ning mi n maana yel-wẽnde, n zãgs t’a kõn tek yam n kos sugr ye. Sã n wa yaa woto, b segd n yiis-a-la tigingã pʋgẽ. Bõe la kãsem-dãmbã segd n maan yell a woto taoore? D na n goma rẽ yell sõsg ning sẽn pʋgdã pʋgẽ.
YƖƖLL 103 Kãsem-dãmbã yaa Wẽnnaam kũuni
a Pĩndã d ra boonda sul-kãng tɩ bʋ-kaoor sulli. La sẽn mik tɩ b tʋʋmdã pa bʋ-kaoor balã, d pa le yet woto ye. Masã d boond-b lame tɩ kãsem-dãmb sulli.
b B sẽn yeel tɩ roagdbã ka wã tõe n yɩɩ neb laloa wã sẽn kõ sor tɩ b ges biig yelle, pa rẽ bɩ neb b sẽn bobl biiga.