Yãmb ra miime bɩ?

Pĩnd wẽndẽ wã, yɩɩl yõod ra taa zĩ-bʋg ne Israyɛll nebã?

ISRAYƐLL nebã ra nonga yɩɩl la yʋʋm-teed wẽebo. Biiblã pʋgẽ, b goma yʋʋm-teed wẽeb la yɩɩl yell naoor wʋsgo. Sɩd me, Biiblã babs wʋsg n yaa yɩɩla. Wala makre, b gʋlsa Yɩɩn-sõamyã sebrã, a Salomo yɩɩllã la Wiisg sebrã tɩ yaa yɩɩla. Sebr a yembr sẽn gomd nebã sẽn da vɩ to-to Biiblã gʋlsg wakatã yell yeelame tɩ Biiblã wilgdame tɩ Israyɛll nebã sã n da tʋmd tʋʋm buud toor-toore, b ra nong n yɩɩndame.

B ra yɩɩnda b raar fãa tʋʋmã sasa. Israyɛll nebã sã n da rat n wilg b sũ-noogo, b sũ-sãang wall bũmb a to, b mi n yɩɩndame la b wẽed yʋʋm-teedo. (Eza. 30:29) B sã n da na n zĩnig naab a naamẽ, tigr sasa wall b sã n da tõog zabre, pagbã ra wae n wẽeda bembendo, n yɩɩnd ne sũ-noog la b saoodẽ. (Bʋ. 11:34; 1 Sãm. 18:6, 7; 1 Rĩm. 1:39, 40) Ned sã n da ki me, Israyɛll nebã ra yɩɩnda kʋʋr yɩɩl sẽn sidgd yĩnga. (2 Kib 35:25) Yaa vẽeneg tɩ Ebre-rãmbã ra yaa buud sẽn nong yɩɩl la yʋʋm-teed wẽebo.

B ra yɩɩnda na-yirã. Israyɛll rĩm-dãmbã ra nonga yɩɩl la yʋʋm-teed kelgre. Rĩm a Sayull kɩtame tɩ b tall a Davɩɩd n wa a na-yirã sẽn na yɩl t’a wẽed pɛndg t’a kelgdẽ. (1 Sãm. 16:18, 23) A Davɩɩd meng sẽn wa n lebg rĩmã a maana yʋʋm-teedo, a gʋlsa yɩɩn-noodo, la a sigl yɩɩn-yɩɩndb la yʋʋm-te-wẽedb tɩ b ra be wẽnd-doogẽ wã n pẽgd a Zeova. (2 Kib 7:6; Amos 6:5) Rĩm a Salomo ra tara pagb la rap sẽn yaa yɩɩn-yɩɩndb tɩ b be a na-yirã n yɩɩndẽ.—Koɛ. 2:8.

B ra yɩɩnd n waoogda Wẽnnaam. Sẽn yɩɩd fãa, Israyɛll nebã ra wẽeda yʋʋm-teed la b yɩɩnd n waoogd a Zeova. Sɩd me, neb tus a naas n da be Zerizalɛm wẽnd-doogẽ wã n wẽed yʋʋm-teed la b yɩɩndẽ. (1 Kib 23:5) B ra tara waase, yʋʋm-teed sẽn tar rissi, pends la tãntãado. (2 Kib 5:12) La ra pa nin-kãens sẽn mi yɩɩl sõma wã bal n da yɩɩnd n waoogd a Zeova ye. Yaa vẽeneg tɩ Israyɛll neb wʋsg sã n da rabd Zerizalɛm yʋʋmd-yʋʋmd tigã yĩnga, b ra yɩɩnda Rʋʋbã yɩɩla. (Yɩɩn. 120–134) Seb-gʋlsdb sẽn yaa Zʋɩf-rãmb n yeel tɩ Israyɛll nebã ra yɩɩnda Halɛll Yɩɩn-sõamyãa Pakã rɩɩb sasa.

Yɩɩl ket n tara yõod wʋsg ne Wẽnnaam nin-buiidã rũndã-rũndã. (Zak 5:13) D yɩɩnda yɩɩl n waoogd a Zeova. (Efɛɛ. 5:19) D sã n naag d tẽed-n-taasã n yɩɩnd n pẽgd a Zeova, paasda d zems-n-taarã. (Kolo. 3:16) Sẽn paase, yɩɩl tõe n sõng-d lame tɩ d mao ne zu-loeese. (Tʋʋ. 16:25) D tõe n tũnuga ne yɩɩlã n wilg a Zeova tɩ d tẽed-a lame, la tɩ d nong-a lame.