D rɩk malɛgsã togs-n-taare

1-2. a) Bõe n kɩt tɩ tõnd ne malɛgsã pa wõnd taaba? b) Zĩ-bʋs wɛɛngẽ la d wõnd malɛgsã?

D SẼN lebg a Zeova Kaset soabã, d paam n naaga a zakã rãmb sẽn nong taabã. A Zeova zakã rãmb yaa d saam-biisã la d saam-bi-pogsã sẽn be dũniyã gill zugã, n paas malɛgs milyõ-rãmbã. (Dãn. 7:9, 10) D sã n tagsd malɛgsã yelle, d wae n getame tɩ tõnd ne bãmb pa wõnd taab ye. Wala makre, b naana malɛgsã n kaoos wʋsgo, n yaool n naan ninsaalbã. (Zoob 38:4, 7) B pãngã yɩɩda tõnd hal zĩig sẽn zãre. B yaa sõamyã la tɩrse, n yɩɩd ninsaalbã sẽn pa zems zãngã.—Luk 9:26.

² Yaa sɩd tɩ bũmb wʋsg n kɩt tɩ malɛgsã yaa toor ne tõndo. La bũmb wʋsg wɛɛngẽ, d wõnda taaba. Wala makre, tõnd me tõe n dɩka a Zeova togs-n-taar wa malɛgsã. Tõnd ne malɛgsã fãa tõe n yãka d toorẽ yam. Malɛk fãa tara a yʋʋre, n yaa toor ne a taabã. B tʋmda tʋʋm toor-toor me. Yaa woto ne tõnd me. Tõnd ne malɛgsã fãa miime tɩ d segd n waooga d Naandã.—1 Pɩy. 1:12.

3. Yam-bʋg la d tõe n dɩk malɛgsã nengẽ?

³ Sẽn mik tɩ bũmb wʋsg wɛɛngẽ la tõnd ne malɛgsã wõnd taabã, b mak-sõngã tõe n kenga d raoodo, la sõng-d tɩ d bãng bũmb wʋsgo. Sɩd me, d tõe n dɩka yam b nengẽ. Sõs-kãngã pʋgẽ, d na n yãame tɩ malɛgsã yaa sik-m-mens rãmba, tɩ b nonga neba, tɩ b tõogda toogo, la tɩ b modgdame sẽn na yɩl tɩ tigingã kell n yɩ yɩlemde. D na n yãa d sẽn tõe n dɩk b togs-n-taar to-to me.

MALƐGSÃ YAA SIK-M-MENS RÃMBA

4. a) Bõe la malɛgsã maand tɩ wilgdẽ tɩ b yaa sik-m-mens rãmba? b) Bõe yĩng tɩ malɛgsã yaa sik-m-mens rãmba? (Yɩɩn-sõamyã 89:7)

⁴ Malɛgs nins sẽn maand sɩd ne Wẽnnaamã yaa sik-m-mens rãmba. Baa malɛgsã sẽn tar minim, pãng wʋsg la yamã, b sakda a Zeova noyã. (Yɩɩn. 103:20) B sã n wa tʋmd tʋʋm nins a Zeova sẽn kõ-bã, b pa wukd b mens bũmb nins b sẽn tõogd n maandẽ wã yĩng ye. B leb n pa tũnugd ne b pãngã n maan bũmb sẽn na yɩl tɩ nebã kils-b ye. Wẽnnaam sã n kõ malɛk tʋʋmde, a tʋmda ne sũ-noogo, baa a sã n miẽ tɩ nebã pa na n tol n bãng a yʋʋrã.a (Sɩng. 32:24, 29; 2 Rĩm. 19:35) B pa sakd tɩ nebã waoog-b ne waoogr ning sẽn yaa a Zeova bal n segd ne wã ye. Bõe yĩng tɩ malɛgsã yaa sik-m-mens rãmba? Yaa b sẽn nong a Zeova la b waoogd-a ne b sũy fãa wã yĩnga.—Karm-y Yɩɩn-sõamyã 89:7.

5. Malɛkã sẽn wa n na n dems a Zã wã, wãn to la a wilg t’a yaa sik-m-meng soaba? (Ges-y fotã me.)

⁵ Ad kibar sẽn wilgd tɩ malɛgsã yaa sik-m-mens rãmba. Yʋʋmd 96 sẽnese, b kɩtame tɩ malɛk wilg tẽn-tʋmd a Zã vẽnegr toor-toor sẽn kẽesd rabeem, la b pa togs malɛg-kãng yʋʋrã ye. (Vẽn. 1:1) A Zã sẽn yã bõn-kãensa wã, a manesem yɩɩ wãna? A baoome n na n waoog malɛkã. La malɛkã sẽn maand sɩdã yɩɩ tao-tao n gɩdg-a n yeele: “Gũusi! Ra maan woto ye! Mam yaa fo yem-taag bala, la fo saam-biisã . . . yem-taaga. Waoog Wẽnnaam!” (Vẽn. 19:10) Ad sɩd yaa sik-m-meng tɛkẽ! Malɛkã ra pa rat ziir wall waoogr ye. A yɩɩ tao-tao n yeel a Zã t’a waoog Wẽnnaam a Zeova. Sẽn paase, malɛkã pa paoog a Zã ye. Baa a sẽn tũ a Zeova n kaoos yʋʋm wʋsg la a tar pãng wʋsg n yɩɩd a Zã wã, a sika a meng n bool-a t’a yem-taaga. Baa malɛkã sẽn da segd n dems a Zã wã, a pa maan dẽ ne toolem ye. A bʋka a meng n gom ne-a. Yaa vẽeneg t’a bãngame tɩ yaa a Zã sẽn yã bũmb ninsã n kɩt t’a wõgemd a taoorã.

6. Bõe la d tõe n maan n wilg tɩ d tara malɛgsã sik-m-mengã buudu?

⁶ Bõe la d tõe n maan n wilg tɩ d tara malɛgsã sik-m-mengã buudu? Tõnd me segd n tʋmda tʋʋm nins Wẽnnaam sẽn kõt-dã n pa wukd-d mense, la d pa baoodẽ tɩ nebã pẽg-d rẽ yĩng me ye. (1 Kor. 4:7) D pa segd n tagsdẽ me tɩ d sãoo d taabã d sẽn tũ a Zeova n kaoos n yɩɩd-ba, wall d sẽn tʋmd tʋʋm kẽer tigingã pʋgẽ yĩng ye. Sɩd-sɩda, d sã n paamd tʋʋm tigingã pʋgẽ n paasdẽ, d segd n sikda d meng n paasdẽ. (Luk 9:48) D ratame n sõngd d taabã wa malɛgsã. D pa rat n maan wa d são d taabã ye.

7. D sã n wa segd n dems ned wall d sagl-a, wãn to la d tõe n wilg tɩ d yaa sik-m-meng soaba?

⁷ D sã n wa segd n dems ned wall d sagl-a, tɩ yaa d tẽed-n-taag tɩ yaa d biiga, d segd n talla sik-m-menga. Wakat ninga yaa tɩlɛ tɩ d sagl ned vẽeneg-vẽenega. La d segd n maana wa malɛk ning sẽn dems a Zã ne bʋgsmã. D tõe n togsa a soabã saglgã vẽenega, la d pa segd n maan t’a koms raood ye. D sã n pa tagsdẽ tɩ d sãoo d taabã, na n sõng-d lame tɩ d tik Biiblã zug n kõ saglgã ne waoogr la nonglem.—Kolo. 4:6.

MALƐGSÃ NONGA NEBA

8. a) Sã n yaa ne Luk 15:10, wãn to la malɛgsã wilgd tɩ b nonga ninsaalbã? b) Bõe la malɛgsã maand n sõngd tõnd koɛɛgã mooneg sasa? (Ges-y fotã me.)

⁸ Malɛgsã pa maand b toog kae ne ninsaalbã ye. B pa tagsd me tɩ ninsaalbã ka yõod ye. B pʋd n nonga neba. Yel-wẽn-maand sã n tek yam n kos sugri, rat n yeel tɩ ned sẽn bas a Zeova tũub sã n yãk yam n na n lebg n wa a nengẽ, wall ned sã n yãk yam n na n sɩng a Zeova tũubu, malɛgsã kɩdemda sũ-noogo. (Karm-y Luk 15:10.) Malɛgsã sõngda tõnd koɛɛgã mooneg pʋgẽ me. (Vẽn. 14:6) Baa b sẽn pa moond koɛɛgã b toorã, b tõe n sõnga koe-moond t’a yã ned sẽn dat n bãng a Zeova. Yaa sɩd tɩ d sã n yã ned sẽn dat n bãng a Zeova, d pa tõe n yeel vẽeneg tɩ yaa malɛgsã n tall tõnd n kẽng nin-kãng nengẽ ye. A Zeova tõe n tũnuga ne manesem a to n sõng ned sẽn dat n bãng-a, bɩ n wilg koe-moondbã sor tɩ b yã ned a woto buudu. Wala makre a tõe n tũnuga ne a vʋʋsem sõngã. (Tʋʋ. 16:6, 7) Baasgo, a tũnugda ne a malɛgsã n sõngd tõnd koe-moonegã sasa. Dẽnd d sã n wa moond koɛɛgã, d tõe n kɩsa sɩd tɩ malɛgsã bee ne-d n sõngd tõndo.—Ges-y zĩ-gũbrã: “Wẽnnaam leoka b pʋʋsgã.”b

9. Bõe la d tõe n maan n wilg tɩ d nonga nebã wa malɛgsã?

⁹ Bõe la d tõe n maan n wilg tɩ d nonga nebã wa malɛgsã? B sã n wa togs tɩ ned b sẽn da yiis tigingã pʋgẽ la b lebs n deege, d tõe n kɩdma sũ-noog wa malɛgsã. D tõe n wilga nin-kãng tɩ d nong-a lame, la tɩ d sũur nooma ne a sẽn lebg n wa a Zeova nengẽ wã. (Luk 15:4-7; 2 Kor. 2:6-8) D leb n tõe n maanda d sẽn tõe fãa koɛɛgã mooneg pʋgẽ, n wilgdẽ tɩ d rɩkda malɛgsã togs-n-taare. (Koɛ. 11:6) Tõnd me tõe n sõnga d tẽed-n-taasã koɛɛgã mooneg pʋgẽ wa malɛgsã sẽn sõngd tõndã. Wala makre, d tõe n naaga sẽn pa tar-b minim wʋsg koɛɛgã mooneg pʋgẽ wã n moone. D leb n tõe n sõnga d tẽed-n-taas nins sẽn kʋʋl wall sẽn yaa koms-rãmbã tɩ b moon koɛɛgã.

10. Yam-bʋg la d tõe n dɩk a Saara kibarã pʋgẽ?

¹⁰ La d yɛlã sẽn yaa to-to wã sã n kɩt tɩ d pa tõe n moon wʋsg wa d sẽn datã, d maanda wãna? D tõe n basa d yam tɩ malɛgsã ket n sõngd-d-la koɛɛgã mooneg pʋgẽ.c D gom saam-bi-poak sẽn be Ẽnd t’a yʋʋr boondẽ t’a Saara yelle. A Saara sẽn yɩ so-pakd n maan yʋʋm 20 poore, a lʋɩɩ bã-kɛgeng n pa le tõe n yik n zĩnd meng ye. A sũurã sãama wʋsgo, n be bʋʋm me. La ne a tẽed-n-taasã sõngre, n paas a sẽn da karemd Biiblã n pa vaandẽ wã, a le wa n paama sũ-noogo. Yaa vẽeneg t’a toeema a koɛɛgã mooneg tɩ zems ne a yɛlã sẽn yaa to-to wã. A sẽn da pa tõe n yik n zĩnd meng n gʋls lɛtrã, yaa ne telefõn bal la a ra moonda. Rẽ n so t’a bool neb nins a sẽn da kẽnd n kaagdẽ wã n kos-b tɩ b sã n mi ned sẽn dat n zãms Biiblã bɩ b togs-a. A sẽn maan woto wã woma biis bɩ? Kiis a wãn poor bala, a Saara paama Biibl karen-biis 70. A ra pa tõe n zãms nin-kãensã fãa a toor ye. Rẽ n so t’a yãk kẽer n kõ tigingã neb a taaba. A Biibl karen-biis wʋsg wata tigissã. D saam-biis la d saam-bi-pogs wʋsg maanda b sẽn tõe fãa koɛɛgã mooneg pʋgẽ wa a Saara. Yaa vẽeneg tɩ malɛgsã sẽn paam n teend nin-kãensã noom-b-la wʋsgo.

MALƐGSÃ TÕOGDA TOOGO

11. Wãn to la Wẽnnaam malɛgsã wilgd tɩ b tõogda toogo?

¹¹ Malɛgs nins sẽn maand sɩd ne Wẽnnaamã kõta mak-sõng tõog-toogã wɛɛngẽ. B tõoga toog yel-kɛgã la wẽnemã taoor yʋʋm tusa. B yãa a Sʋɩtãan la malɛgs wʋsg sẽn da naag-b n tũud a Zeova sẽn lebg tõatba. (Sɩng. 3:1; 6:1, 2; Ziid 6) Biiblã goma Wẽnnaam malɛk sẽn zab ne malɛg-wẽng n maan rasem yelle. (Dãn. 10:13) Sẽn paase, a Ãdem ne a Awa wakatã tɛk n tãag rũndã, malɛgsã yãame tɩ neb nins sẽn yãk yam n na n tũ a Zeova wã sõor paoodame. Baa ne rẽ, b ket n tũuda a Zeova ne sũ-noog la yẽesem. B miime tɩ wakat ning a Zeova sẽn yãkã sã n ta, a na n kɩtame tɩ wẽnem buudã fãa sa.

12. Bõe n tõe n sõng-d tɩ d tõog toogo?

¹² Wãn to la d tõe n tõog toog wa malɛgsã? Tõnd me nee yel-kɛg wa malɛgsã, la d paamd namsg d tũudmã yĩnga. La tõnd me kɩsa sɩd tɩ wakat ning Wẽnnaam sẽn yãkã sã n ta, a na n kɩtame tɩ wẽnem buudã fãa sa. Rẽ n so tɩ d rɩkd malɛgsã togs-n-taare, n pa “komsd raood n bas sẽn yaa sõma maaneg ye.” (Gal. 6:9) Sẽn paase, Wẽnnaam pʋlm-d lame t’a na n sõng-d lame tɩ d tõog toogo. (1 Kor. 10:13) D tõe n pʋʋsa a Zeova n kos t’a kõ-d a vʋʋsem sõngã tɩ sõng-d tɩ d bɩɩs sũ-mar la sũ-noogo. (Gal. 5:22; Kolo. 1:11) La b sã n namsd yãmb y tũudmã yĩnga, bõe la y tõe n maane? Kɩs-y-yã a Zeova sɩd zãng-zãng la y ra yɛɛs ye. A na n kell n sõng-y-la wakat fãa, la a keng y raoodo.—Ebre. 13:6.

MALƐGSÃ SÕNGDA SẼN NA YƖL TƖ TIGINGÃ KELL N YƖ YƖLEMDE

13. Tʋʋm-bʋg sẽn tar yõod wʋsg la malɛgsã tʋmd yaoolem wakatã? (Matiye 13:47-49)

¹³ A Zeova kõo malɛgsã tʋʋm-kãseng b sẽn segd n tʋm yaoolem wakatã. (Karm-y Matiye 13:47-49.) Neb milyõ-rãmb sẽn be tẽngã zug n kelgd koe-noogã. B sʋkã, kẽer yãka yam n lebg kiris-neb hakɩɩka, tɩ sãnda pa maan woto ye. Wẽnnaam yãka malɛgsã tɩ b na n yiis nin-wẽnsã nin-tɩrsã sʋka. Rat n yeelame t’a yãk-b lame tɩ b kogl tigingã t’a kell n yɩ yɩlemde. Woto pa rat n yeel tɩ ned sã n bas a Zeova tũubu, a pa tol n tõe n lebg n wa ye. Leb n pa rat n yeel tɩ zu-loɛɛg pa na n tol n zĩnd tigingã pʋgẽ ye. La d tõe n basa d yam tɩ malɛgsã tʋmda wʋsg sẽn na yɩl n kogl tigimsã tɩ b kell n yɩ yɩlma.

14-15. Wãn to la d tõe n dɩk malɛgsã togs-n-taar n wilg tɩ d ratame tɩ tigingã neb kell n yɩ yɩlem vɩɩm manesmã pʋgẽ, la tũudmã wɛɛngẽ? (Ges-y fotã me.)

¹⁴ Wãn to la d tõe n dɩk malɛgsã togs-n-taare, n wilg tɩ d ratame tɩ tigingã kell n yɩ yɩlemde? Yaa d sẽn na n maand d sẽn tõe fãa tɩ tigingã neb kell n yɩ yɩlem vɩɩm manesmã pʋgẽ la tũudmã wɛɛngẽ. Rẽ n so tɩ d maand d sẽn tõe fãa n kogend d sũurã, n baood zo-sõma, la d zãagd d mens ne bũmb nins fãa sẽn tõe n dẽgem-do. (Yɩɩn. 101:3) D leb n tõe n sõnga d tẽed-n-taasã tɩ b kell n maan sɩd ne a Zeova. D sã n bãng tɩ d tẽed-n-taag n maan yel-wẽn-kãsenga, bõe la d segd n maane? D sẽn nong-a wã yĩnga, d na n sagl-a lame t’a tɩ togs kãsem-dãmbã. A sã n pa tɩ togse, tõnd n segd n tɩ togse. D ratame tɩ d tẽed-n-taagã paam sõngr tao-tao n maneg yẽ ne a Zeova zoodã.—Zak 5:14, 15.

¹⁵ Zu-bʋko, mii n yaa tɩlɛ tɩ b yiis kẽer tigingã pʋgẽ. Sã n wa yaa woto, d ‘pa le maand tũud-n-taar ne’ nin-kãens ye.d (1 Kor. 5:9-13) B sẽn yiisd neb tigingã pʋgẽ wã yaa sẽn na yɩl tɩ tigingã kell n yɩ yɩlemde. Sẽn paase, d sẽn pa le maand tũud-n-taar ne neb nins b sẽn yiis tigingã pʋgẽ wã, sɩd-sɩda d maand-b-la neere. D sã n tũ a Zeova noyã n pa maan tũud-n-taar ne-ba, tõe n sõng-b lame tɩ b bãng tɩ b segd n lebg n waa a Zeova nengẽ. B sã n maan woto, d na n naaga a Zeova ne malɛgsã n kɩdem sũ-noogo.—Luk 15:7.

16. Zĩ-bʋs wɛɛngẽ la y na n modg n dɩk malɛgsã togs-n-taare?

¹⁶ A Zeova sẽn kɩt tɩ d tõe n bãng bũmb wʋsg malɛgsã zug la d naag-b n tʋmdã yaa zu-zẽkr tɛkẽ! Bɩ d rɩk b togs-n-taar n yɩ sik-m-mens rãmba, n nong nebã, n tõogd toogo, la d wilgdẽ tɩ d ratame tɩ tigingã neb kell n yɩ yɩlem vɩɩm manesmã pʋgẽ la tũudmã wɛɛngẽ. D sã n dɩkd malɛgs nins sẽn maand sɩd ne a Zeova wã togs-n-taare, d na n kell n yɩɩ a zakã rãmb wakat sẽn kõn sa yĩnga.