Watchtower SƐB VAEESG ZĨIGA
Watchtower
SƐB VAEESG ZĨIGA
Moore
  • BIIBLE
  • SƐBA
  • TIGISSÃ
  • w25 Sigr kiuugu s.n. 14-19
  • D sak n deeg bũmb nins d sẽn pa mi wã ne sik-m-menga

Video pa be zĩ-kãngã ye.

Video wã pa tõog n yi ye.

  • D sak n deeg bũmb nins d sẽn pa mi wã ne sik-m-menga
  • Gũusg Gasgã moonda a Zeova Rĩungã (Zãmsgã rẽnda)—2025
  • Gom-zu-bõonesã
  • Bũmb sẽn wõnd woto
  • D PA MI DŨNIYÃ SAAB DAAR YE
  • D PA MI A ZEOVA SẼN NA N SÕNG-D TO-TO YE
  • D PA MI SẼN WAT BEOOG YE
  • D PA TÕE N BÃNG A ZEOVA SẼN MI-D TO-TO WÃ SÕMA YE
  • Yam-yãkr sẽn wilg tɩ d teega a Zeova
    2023 Kiris-nebã vɩɩm la b tʋʋma: Tigissã na-kẽndre
  • Tẽegd-y t’a Zeova n yaa “Wẽnnaam ning sẽn vɩ wã”
    Gũusg Gasgã moonda a Zeova Rĩungã (Zãmsgã rẽnda)—2024
  • Bõe la d mi a Zeova sẽn na n kao nebã bʋʋd to-to ka la bilfã wɛɛngẽ?
    Gũusg Gasgã moonda a Zeova Rĩungã (Zãmsgã rẽnda)—2024
  • D rɩk yam wẽn-sakdb yaoolem goam pʋgẽ
    Gũusg Gasgã moonda a Zeova Rĩungã (Zãmsgã rẽnda)—2024
Bũmb a taaba
Gũusg Gasgã moonda a Zeova Rĩungã (Zãmsgã rẽnda)—2025
w25 Sigr kiuugu s.n. 14-19

ZÃMSGÃ YĨNGA 26

YƖƖLL 123 D sak a Zeova sẽn sigl yɛlã to-to wã

D sak n deeg bũmb nins d sẽn pa mi wã ne sik-m-menga

“Tõnd pa tõe n wʋm bũmb fãa võor Sẽn-tõe-a-fãa wã zug ye.”—ZOOB 37:23.

D SẼN NA N BÃNGE

Baa d sẽn pa mi bũmb nins fãa sẽn na n maanã, d sã n tagsd bũmb nins d sẽn mi wã yell la d teeg a Zeova, d na n tõog n maoo ne zu-loeesã.

1. A Zeova naana tõnd tɩ d tõe n maan bõe, la bõe yĩnga?

A ZEOVA naana tõnd tɩ d tõe n tagse, tɩ d tõe n paas d bãngre, n bao n wʋm bũmb võor la d tʋm ne yam. Bõe yĩng t’a naan tõnd woto? A ratame tɩ d “paam Wẽnnaam bãngrã” la d tũ-a ne d yamã.—Yel. 2:1-5; Rom. 12:1.

2. a) Bõe la d segd n sak n deege? (Zoob 37:23, 24) (Ges-y fotã me.) b) D sã n sik d meng n sak n deeg tɩ d bãngrã tara koaka, wãn to la na n naf-do?

2 Baa d sẽn tõe n zãms n bãng bũmb wʋsgã, d bãngrã tara koaka. (Karm-y Zoob 37:23, 24.) Tags-y-yã a Zoob yelle. A Zeova sok-a-la sogsg wʋsgo, tɩ sõng-a t’a bãng tɩ bũmb wʋsg la a pa mi. Rẽ sõnga a Zoob t’a sik a menga, la a rems a tagsgã. (Zoob 42:3-6) Tõnd me sã n sik d meng n sak n deeg tɩ d pa mi bũmb fãa, na n naf-d lame. Sik-m-meng a woto na n sõng-d lame tɩ d kɩs sɩd t’a Zeova na n wilg-d-la bũmb nins sẽn yaa tɩlɛ tɩ d bãng sẽn na yɩl n tõog n bãng n yãk yamã.—Yel. 2:6.

Vẽenem sẽn yit sawatẽ wã n teesd a Zoob a Zeova sẽn wa n gomd ne-a wã. A Elihu ne a Zoob zo-rãmb a tãabã sẽn yeel tɩ b wa n na n bels-a lame wã bee yambẽ n getẽ.

D sã n sak n deeg bũmb nins d sẽn pa mi wã, tõe n nafa tõnd wa a Zoobe (Ges-y sull a 2)


3. Bõe yell la d na n gom sõs-kãngã pʋgẽ?

3 Sõs-kãngã pʋgẽ, d na n goma bũmb kẽer d sẽn pa mi yelle, la d bao n bãng d sẽn pa mi bõn-kãensã sẽn tõe n wa ne zu-loees ninsi. Sẽn paase d na n yãame tɩ d sẽn pa mi bũmb kẽerã yaa sõma. D sẽn na n gom bõn-kãens yellã na n kɩtame tɩ d maneg n kɩs sɩd t’a Zeova sẽn yaa “Soab ning sẽn mi bũmb fãa wã” wilgda tõnd bũmb nins sẽn yaa tɩlɛ tɩ d bãngã.—Zoob 37:16.

D PA MI DŨNIYÃ SAAB DAAR YE

4. Matiye 24:36 wilgame tɩ bõe la d pa mi?

4 Karm-y Matiye 24:36. D pa mi dũniyã saab sẽn na n yɩ wakat ningã takɩ ye. A Zeezi meng sẽn wa n be tẽngã zugã, a yeelame t’a pa mi “daar-n-kãng la lɛɛr-kãng” ye.a Kaoosg zugẽ, a yeela a tẽn-tʋmdbã tɩ yaa a Zeova sẽn yaa Soab ning sẽn so wakatã “bal n tar sor n na n yãk wakat nins bũmb sẽn na n maane.” (Tʋʋ. 1:6, 7) A Zeova yãka dũni-kãngã saabã sẽn na n yɩ wakat ningã, la tõnd pa tõe n bãng daarã takɩ ye.

5. D pa mi dũniyã saabã sẽn na n yɩ daar ningã ye. Wãn to la rẽ tõe n nams tõndo?

5 A Zeezi sẽn yeel bũmb ningã kɩtame tɩ d miẽ tɩ d pa tõe n bãng d sẽn segd n gũ dũniyã saabã tɩ kaoos to-to ye. Rẽ tõe n kɩtame tɩ d pa le maand sũ-mare, wall d koms raoodo, sẽn yɩɩd fãa d sã n sɩng n gũuda a Zeova daarã hal sẽn kaoose. D zakã rãmb wall neb a taab sã n yaand tõnd d sẽn gũud dũniyã saab tɩ ket n nan pa wa wã yĩng me, tõe n komsa d raoodo. (2 Pɩy. 3:3, 4) D tõe n tagsdame tɩ d sã n da mi dũniyã saab sẽn na n yɩ daar ningã takɩ, na n yɩɩ nana tɩ d maag d meng n gũ, tɩ neb a taab sã n yaand-d me bɩ d ra koms raood wʋsg ye.

6. Bõe yĩng tɩ d sẽn pa mi dũniyã saab sẽn na n yɩ daar ningã takɩ wã yaa sõma?

6 Sɩd-sɩda, a Zeova sẽn pa wilg tõnd dũniyã saab sẽn na n yɩ daar ningã takɩ wã, a kõ-d-la weer tɩ d tõe n wilg tɩ d tũud-a-la d sẽn nong-a la d kɩs-a sɩdã yĩnga. D rat n tũu a Zeova wakat sẽn kõn sa yĩnga, pa hal n tãag saabã ye. D pa segd n tagsd “a Zeova daarã” sẽn na n wa wakat ningã yell wʋsg ye. D segd n tagsda bõn-sõma nins sẽn na n maan daar-n-kãng loogr poorã yell n yɩɩda. Rẽ na n sõnga tõnd tɩ d paasd d wẽn-zoeerã pãnga, la d maand d sẽn tõe fãa n tat a Zeova yam.—2 Pɩy. 3:11, 12.

7. Bõe la d mi-yã?

7 Yɩta sõma tɩ d tagsd bũmb nins d sẽn mi vẽenegã yelle. D miime tɩ yaoolem wakatã sɩnga yʋʋmd 1914. A Zeova togsa bãngr-goam Biiblã pʋgẽ sẽn wilgd vẽeneg tɩ yaoolem wakatã sɩnga yʋʋm-kãnga, la sẽn wilgd yɛlã sẽn na n yɩ to-to tẽngã zug yʋʋm-kãng tɛka. Rẽ kɩtame tɩ d kɩs sɩd t’a “Zeova ra-kãsengã kolgame.” (Sof. 1:14) Sẽn paase d mii tʋʋmd ning a Zeova sẽn dat tɩ d tʋmã. A ratame tɩ d moon ‘Rĩungã koe-noogã’ tɩ neb wʋsg wʋme. (Mat. 24:14) D moonda koe-kãng na maan tẽns kobs-yi la pis-naas pʋsẽ, ne buud-goam tusr la zaka. Pa tɩlɛ tɩ d bãng “daar-n-kãng la lɛɛr-kãng” n yaool n tõog n tall yẽesem tʋʋm-kãng sẽn fãagd yõyã pʋgẽ ye.

D PA MI A ZEOVA SẼN NA N SÕNG-D TO-TO YE

8. “Wẽnnaam . . . tʋʋmdã” yaa bõe? (Koɛɛg soaba 11:5)

8 Pa wakat fãa la d mi “Wẽnnaam . . . tʋʋmd ye.” (Karm-y Koɛɛg soab 11:5.) Ka wã, Wẽnnaam tʋʋmdã yaa bũmb nins a Zeova sẽn kɩtd tɩ maan wall a sẽn basd tɩ maan sẽn na yɩl n pids a raabã. D pa mi bũmb ning sẽn mi n kɩt t’a Zeova bas tɩ bũmb kẽer maanã vẽenega, pa rẽ bɩ a sẽn na n maan bũmb ning takɩ n sõng-dã ye. (Yɩɩn. 37:5) Bõn-kãens bãngr yɩɩda d nugu, wa d sẽn pa tõe n bãng biig sẽn bɩt a ma pʋgẽ to-to wã. Baa siãnsã bãngdb ket n nan pa wʋmd rẽ võor sõma ye.

9. D sẽn pa mi a Zeova sẽn na n maan bũmb ning n sõng-dã yĩnga, d tõe n wa tara tags-bʋs buudu?

9 D sẽn pa mi a Zeova sẽn na n maan bũmb ning n sõng-dã tõe n kɩtame tɩ d yamã yuusdẽ. D tõe n yɛɛsdame n pa rat n mong d meng bũmb kẽer sẽn na yɩl n paas d koe-moonegã pãng ye. Wala makre, n boog d bũmb kẽere, wall d yik n tɩ sõng zĩig koe-moondbã sẽn pa waooge. Bũmb kẽer tõe n wa kɩtame tɩ d sãmbd a Zeova sũur sã n sɩd nooma ne tõndo. Wala makre d sã n yãk bũmb n dat n maan a Zeova tʋʋmdã pʋgẽ n pa tõog n maane, d sã n modgd wʋsg koɛɛgã mooneg pʋgẽ n pa ne tɩ womda biisi, pa rẽ bɩ d sã n tʋmd tʋʋmd ning tũudmã yĩng tɩ zu-loeesã yaa wʋsgo.

10. D sẽn pa mi a Zeova sẽn na n maan bũmb ningã sõngda tõnd tɩ d bɩɩsd zʋg-sõma-bʋs sẽn tar yõod wʋsgo?

10 Sɩd-sɩda, d sẽn pa mi a Zeova sẽn na n maan bũmb ningã sõngda tõnd tɩ d bɩɩsd zʋg-sõma sẽn tar yõod wʋsgo. Wala makre, sik-m-menga. Sõngda tõnd tɩ d sak n deeg t’a Zeova tagsa wã la a soayã sõmblem yɩɩda tõnd dẽndã hal zĩig sẽn zãre. (Eza. 55:8, 9) Kɩtame me tɩ d kɩs a Zeova sɩd zãng-zãnga, n teeg-a sẽn na yɩl t’a sõng-d tɩ d paam tõogr bũmb ning fãa d sẽn maand pʋgẽ. D koe-moonegã sã n womd biisi, wall d sã n tõog n tʋm tũudmã tʋʋmd a to sõma, d miime tɩ yaa a Zeova n segd ne pẽgrã. (Yɩɩn. 127:1; 1 Kor. 3:7) Bũmb kẽer sã n pa yɩ wa d sẽn da tagsdã, d segd n tẽegame t’a Zeova mii bũmb fãa. (Eza. 26:12) D maanda d sẽn tõe, n kɩs sɩd t’a Zeova na n maana sẽn ketã. D kɩsa sɩd t’a Zeova na n wilg-d-la sore, baa sã n pa na n yɩ ne yel-solemd wa a sẽn da wae n maand pĩnd wẽndẽ wã.—Tʋʋ. 16:6-10.

11. Bõe la d mi tɩ tõe n sõng-do?

11 D miime t’a Zeova sẽn maand fãa yaa ne nonglem, tɩrlem la yam. D miime t’a sũur nooma wʋsg ne bũmb nins d sẽn maand a yĩng la d tẽed-n-taasã yĩngã. Sẽn paase, d miime t’a Zeova keooda neb nins sẽn maand sɩd ne-a wã wakat fãa.—Ebre. 11:6.

D PA MI SẼN WAT BEOOG YE

12. Zak 4:13, 14 yeelame tɩ bõe la d pa mi?

12 Karm-y Zak 4:13, 14. D pa mi d vɩɩmã sẽn na n yɩ a soab beoog ye. Dũni-kãngã pʋgẽ, ‘yel-lingdem tõe n tiig n paam-d lame.’ (Koɛ. 9:11) Rẽ kɩtame tɩ d pa tõe n bãng d magbã sã n na n yãka nenga, wall d sã n na n tõog n maana rẽ nand tɩ d ki meng ye.

13. Wãn to la d sẽn pa mi sẽn wat beoogã tõe n namsd-do?

13 D sẽn pa mi sẽn wat beoogã tõe n yɩɩ zu-loɛɛg meng-menga. Bõe yĩnga? D tõe n wa maanda yɩɩr bũmb ning sẽn tõe n wa beoogã wɛɛngẽ, tɩ kɩt tɩ d pa le tar sũ-noog ye. D vɩɩmã tõe n tiig n toeemame, wall yel-beed tõe n tiig n maaname tɩ sãam d sũur wʋsgo. Sẽn paase d sã n gũud bũmb tɩ kaoosd n pa watẽ, tõe n sãama d sũur la koms d raood wʋsgo.—Yel. 13:12.

14. D sã n dat n paam sũ-noog hakɩɩka bõe la d segd n maane? (Ges-y fot-rãmbã me.)

14 D sã n tõogd toog zu-loeesã pʋsẽ, d wilgdame tɩ baa sẽn wa n yaa a soaba, d tũuda d saasẽ Ba wã d sẽn nong-a wã yĩnga, la pa tõnd mengã nafr yĩng bal ye. Biiblã kibayã wilgdame t’a Zeova pa na n kogl tõnd ne zu-loeesã fãa, la t’a pa pʋlem d vɩɩmã sẽn na n yɩ to-to wã ye. A miime tɩ pa d sẽn na n mi sẽn wat beoog la d paamd sũ-noog ye. Yaa d sẽn na n baood t’a wilgd-d sore, la d tũud a noyã. (Zer. 10:23) D sã n baood sagls a nengẽ nand tɩ d yãk yam fãa, yaa wa d sẽn yet yaa: “A Zeova sã n data, d na n vɩɩmdame, n maan woto wall woto.”—Zak 4:15.

Fot-rãmbã: 1. Rao ne a biig sẽn naag taab n segend zoees korgo. B ningda Biibl la teed a taab korgã pʋgẽ. 2. Raoã ne a pagã la b biigã sẽn soond fu-roog tẽngr tɩ saagã niid wʋsgo. B rɩta bũmb nins b sẽn ning zoees korgẽ wã yõodo.

D sã n baoodẽ t’a Zeova wilgd-d sor la d tũud a noyã, d tõe n paama koglgo (Ges-y sull 14-15)b


15. Bõe la d mi beoog-daarã wɛɛngẽ?

15 Baa d sẽn pa mi sẽn wat beoogã, d mii vẽeneg t’a Zeova pʋlem-d-la vɩɩm sẽn kõn sa saasẽ wall tẽngã zugu. D miime t’a pa tõe n yag ziri, la tɩ baa fʋɩ pa tõe n gɩdg-a t’a pa pids a pʋlemsã fãa ye. (Tɩt 1:2) Yẽ bal n tõe n ‘togs bũmb baasgo, la a togs bũmb nins sẽn nan pa maanã tɩ ket n zãra.’ A sẽn yeel tɩ bũmb nins na n maana pĩnd wẽndẽ wã pidsame, tɩ bũmb nins a sẽn yeel tɩ na n maana beoog-daarã me na n pidsi. (Eza. 46:10) D mii vẽeneg tɩ baa fʋɩ pa tõe n kɩt t’a Zeova bas n pa le nong tõnd ye. (Rom. 8:35-39) Sẽn wa n yaa zu-loɛɛg ning fãa la d tara a na n bels-d lame la kõ-d yam la pãng tɩ d tõog toogo. D tõe n kɩsa sɩd t’a Zeova na n sõng-d lame la a ning-d barka.—Zer. 17:7, 8.

D PA TÕE N BÃNG A ZEOVA SẼN MI-D TO-TO WÃ SÕMA YE

16. Bõe la a Zeova mi tɩ d pa tõe n wʋm a võor sõma? (Yɩɩn-sõamyã 139:1-6)

16 Karm-y Yɩɩn-sõamyã 139:1-6. D Naandã mii a sẽn naan tõnd to-to wã, la bũmb nins sẽn kɩt tɩ d yalẽ wã la d tagsa wã yaa b sẽn yaa a soabã. Wakat fãa a mii tõnd sẽn maande. A mii d no-goamã la bũmb ning sẽn be d sũurẽ wã. A mii d sẽn maand bũmb ninsã, la bũmb ning sẽn kɩt tɩ d maand bõn-kãensa. Yaa wa rĩm a Davɩɩd sẽn yeelã. A Zeova nee tõnd wakat fãa n get d yelle, tɩ zĩig kae d sẽn na n be t’a pa tõe n sõng-d ye. Yãmb sẽn mi tɩ yĩngr la tẽng Naab sẽn ka to wã, sẽn naan-a bũmb fãa wã geta yãmb yell woto wã, y tagsg yaa wãna? A Davɩɩd yeelame yaa: “Bãngr a woto võor yɩɩda mam sẽn tõe n wʋme. A yaa wʋsg n yɩɩd mam sẽn tõe n make.”—Yɩɩn. 139:6, notã.

17. Bõe yĩng tɩ tõe n yɩ toog tɩ d tẽ t’a Zeova mii tõnd sõma?

17 Tõe tɩ bũmb kẽer kɩtame tɩ yaa toog tɩ d sak n deeg t’a Zeova yaa Ba sẽn nong-do, sẽn get d yelle. Wala makre d zakã rãmb yɛl sẽn da yaa to-to wã, d minundã la tũudum ning pʋgẽ d sẽn da be nand tɩ d bãng sɩdã. Tõe me tɩ d tagsdame tɩ yel-wẽn nins d sẽn maan pĩndã yaa wẽns wʋsgo, hal t’a Zeova pa na n tol n sak tɩ d lebg a zoa, la t’a zãra ne tõndo. Wakat n zĩnd t’a Davɩɩd meng ra tar tagsa a woto buudu. (Yɩɩn. 38:18, 21) Ned sẽn modgd wʋsg sẽn na yɩl n toeem n tũ a Zeova noyã me tõe n soka a meng yaa: ‘Wẽnnaam sã n sɩd mii maam, bõe yĩng t’a na n dat tɩ m toeeme, baa sẽn yaa toog wʋsg ne-mã?’

18. D sã n kɩs sɩd t’a Zeova mii tõnd n yɩɩd tõnd mengã, wãn to la na n naf-do? (Ges-y fot-rãmbã me.)

18 D tõe n modgame n wa kɩs sɩd t’a Zeova mii tõnd n yɩɩd tõnd menga, la t’a nee zʋg-sõma nins d sẽn tarã n yɩɩd tõndo. Baa a sẽn ne d pãn-komsem toor-toorã la a wʋmd d tagsa wã la d manesmã võorã, a miime tɩ d tõe n toeemame, n sõngd-d ne nonglem. (Rom. 7:15) D sã n ning d yamẽ t’a Zeova nee ned ning buud d sẽn tõe n wa lebga, d na n maneg n kɩsa sɩd tɩ d tõe n tũ-a-la ne d sũur fãa, la tɩ d tõe n maana rẽ ne sũ-noogo.

Fot-rãmbã: 1. Saam-biig sẽn koms raood sẽn lɩkd fenetrẽ n get saag niib wakat tɩ zĩigã yaa lika. 2. Saam-biigã sẽn be arzãnã pʋgẽ n kẽnd ne a zo-rãmba, n get zĩigã sẽn yaa neerã.

Baa d sẽn pa mi d vɩɩmã sẽn na n yɩ a soab beoogã, a Zeova sõngda tõnd tɩ d kɩs sɩd ne bõn-sõma nins d sẽn na n paam dũni-paalgã pʋgẽ wã, tɩ belsd tõndo (Ges-y sull 18-19)c


19. Bõe la d mi vẽeneg a Zeova zugu?

19 D miime t’a Zeova yaa nonglem. D pa sãmbd ne rẽ ye. (1 Zã 4:8) D miime t’a sẽn kõt tõnd a noyã yaa a sẽn nong tõndo, n dat d neer wakat fãa wã yĩnga. D miime t’a Zeova ratame tɩ d wa paam vɩɩm sẽn ka sɛtã. A kɩtame t’a Zeezi wa ki tɩ yɩ maoong rẽ yĩnga. A Zeezi sẽn ki tõnd yĩngã kɩtame tɩ d tõe n bas d yam tɩ baa ne d sẽn yaa koangdbã, d tõe n taa a Zeova yam. (Rom. 7:24, 25) Sẽn paase d miime tɩ “Wẽnnaam yɩɩda tõnd sũyã, la a mii bũmb fãa.” (1 Zã 3:19, 20) A Zeova mii bũmb fãa tõnd zugu, la a kɩs sɩd tɩ d na n tõog n maana a raabã.

20. Bõe la d tõe n maan tɩ sõng-d tɩ d ra maan yɩɩr tɩ loog noore?

20 A Zeova pa solg tõnd bũmb sẽn yaa tɩlɛ tɩ d bãng ye. D sã n sik d meng n sak n deeg rẽ, d pa na n maan yɩɩr tɩ loog bũmb nins d sẽn pa tõe n toeemã wɛɛngẽ ye. D na n tagsda bũmb nins sẽn sɩd tar yõod n yɩɩdã yelle. Woto, d wilgdame tɩ d kɩsa a Zeova sẽn yaa “Soab ning sẽn mi bũmb fãa wã” sɩd zãng-zãnga. (Zoob 36:4) Yaa sɩd tɩ d sẽn tõe n bãng bũmb nins rũndã-rũndã wã tara koaka. La d miime t’a Zeova na n ket n zãmsda tõnd wakat sẽn kõn sa yĩnga. D sũy yaa noogo, bala d na n ket n bãngda bõn-paal d Wẽnnaamã sẽn yaa kãsengã zugu.—Koɛ. 3:11.

BÕE LA YÃMB BÃNG-YÃ?

  • Bõe yĩng tɩ d sẽn pa mi dũniyã saab sẽn na n yɩ daar ningã takɩ wã yaa sõma?

  • Bõe yĩng tɩ pa tɩlɛ tɩ d bãng sẽn wat beoog n yaool n paam sũ-noogo?

  • Bõe yĩng tɩ d sã n ning d yamẽ t’a Zeova mii tõnd sõma bɩ na n naf-do?

YƖƖLL 104 Vʋʋsem sõngã yaa Wẽnnaam kũuni

a A Zeezi n na n lʋɩ taoor tɩ b sãam a Sʋɩtãan dũniyã. Rẽnd d tõe n yeelame tɩ masã a mii Armagedõ zabrã sɩngr daare, la wakat ning a sẽn na n “baas a tõogrã.”—Vẽn. 6:2; 19:11-16.

b FOT-RÃMBÃ BILGRI: Rao ne a biig sẽn naag taab n segend zoees korgo, sẽn na yɩl tɩ yell sã n wa wa bɩ mik tɩ b zakã rãmb segl n saame n na n zoe.

c FOT-RÃMBÃ BILGRI: Saam-biig sẽn tar zu-loees sẽn tagsd sũ-noog ning a sẽn na n paam dũni-paalgã pʋgẽ wã yelle.

    Moorã Sɛba (1991-2025)
    Pag-y
    Pak-y
    • Moore
    • Toole
    • Y sẽn date
    • Copyright © 2025 Watch Tower Bible and Tract Society of Pennsylvania
    • Y sẽn segd n sake
    • Noy d sẽn tũudi
    • Paramètres de confidentialité
    • JW.ORG
    • Pak-y
    Toole